Dabyida Restaurant and Bar：Brunch定喺Lunchea？

近來生活有啲忙亂，近年尾有啲工作積壓住，唔喺唔積極做，只喺老細放大假拖住啲嘢，但又有唔少「死線」趕埋身。不過，點都好，工作時工作，搵食時搵食，星期六、日總要調劑一下。依次調劑地點就喺尖沙咀隱蔽酒吧街棉登徑嘅Dabyida，喺睇見食友嘅食評所以揀咗依度，原本打算嚟食午餐嘅，點知11月中開始，星期六都改埋Brunch Buffet（半自助午餐），消息比食午餐高少少，但都無所謂啦！

星期六中午嘅棉登徑真喺好靜局，唔講真喺唔知身處晌尖沙咀。Dabyida揉合餐廳加酒吧，所以一入門口左邊一列吧位、酒櫃甚搶眼，而右邊為多張2或4人枱，絨梳化搭咕臣配木枱，棗紅、軍藍、深啡配襯，閒適得嚟幾型格，再者，樓底高，街外夠靜，予人有種寫意悠閒嘅感覺。

半自助午餐只晌星期六、日及公眾假期供應，除一系列沙律、芝士盤、意式凍肉腸外，仲有數款甜品任食，而收費取決於所揀選嘅主菜，共有6款選擇，定價由$168-$288。另加$150仲可免費任飲指定香檳2小時，當然，加一服務費就走唔甩啦。主菜喺指定必選，唔似得同區嘅La Villa可以唔要主菜，俾少啲錢只食頭盤、沙律、甜品……等等。最吊詭喺佢依個名叫Brunch Buffet享用時間喺12:30pm -4:30pm，較一般常見Brunch嘅11:00am開始得為晏，所以，與其叫Brunch，小弟就覺得叫Lunchea適合啲，個時間直頭Lunch + Tea啦，仲可以好hea咁嘆喎！（註：實際無Lunchea依個字。）

 Brunch Buffet餐牌及A La Carte餐牌

全部自助食物放晒晌吧枱之上，唔算好多，一眼睇晒，算喺貴精不貴多嘅格局。不過，由於張吧枱本身都已經幾高，而芝士盤、意式凍肉腸及甜品仲要放晌啲三層架之上，對稍為矮小嘅女仕真喺有啲唔方便。

沙律

據餐牌描述一共有4款，分別喺凱撒沙律、意大利沙律、什菜沙律粉及華都夫雞絲沙律。小弟一向好鍾意食沙律，食親自助餐一定以一大碟沙律為首發，不過Dabyida嘅沙律不單陣容比較弱，亦未見好突出，只可以話用料算得上新鮮。就以凱撒沙律為例，唔喺預製好，只喺提供羅馬生菜、煙肉碎、麵包粒及沙律汁，由自己撈，至少都提供埋巴馬臣芝士粉先夠全套，猶幸凱撒沙律個靈魂-「醬汁」，做得不俗，應該有加到銀魚柳，因為帶點鹹香；此外，意大利沙律只喺一大堆沙律菜伴上意大利油醋汁；而什菜沙律粉喺用上長通粉，加埋紅、黃燈籠椒及青瓜絲，唔算有咩賣點，啲長通粉入口仍有點點生硬；但講到較失望喺個華都夫，無合桃之餘，仲要以紅蘋果代替青蘋果，個人覺得唔喺嗰種味道囉！

凱撒沙律

意大利沙律

什菜沙律粉

華都夫雞絲沙律

芝士

沙律失分唔少，幸而芝士搶番唔少分，共5款芝士，包括巴馬臣芝士、布旺倫芝士、方天娜芝士、藍芝士，都配以水餅伴食，同埋鮮蕃茄配水牛芝士。小弟對芝士唔喺好有研究，但都好鍾意食，濃淡、軟硬都喜歡。當中以布旺倫芝士及藍芝士最得歡心，因為小弟較喜歡軟芝士配水餅食，而且味道較濃夠出。不過，淡味嘅水牛芝士搭上鮮蕃茄我都鍾意，因為店方一啲無手緊，大大舊水牛芝士入口柔軟富奶香，加少少青瓜絲多咗層爽脆感，真喺好唔錯。

意式凍肉

凍肉同樣有水準喎，尤其啲24個月熟成嘅巴馬風乾火腿，薄薄一片油潤鹹香，夾少少沙律菜就更平衡，所以小弟都食完再添。另外，仲有燈籠腸、莎樂美及辣味莎樂美，少有哋啲莎樂美無話過鹹，而辣味嘅莎樂美又幾得意，食到尾會有啲微辣湧出嚟。

6款主菜有白菌辣肉腸烤脆皮比薩（$168）、香蒜意大利腸炒意粉（$168）、海蝦脆煙肉粒辣鮮茄意粉（$178）、焗海鮮配香蒜露絲瑪麗鮮檸汁（$188）、碳燒肉眼牛扒配紅酒牛油（$198）、西班牙黑毛豬配藍啤梨燒汁（$288）。小弟鍾意食肉，就揀咗肉眼，老婆喜歡魚鮮好啲，所以要焗海鮮，食完沙律、芝士盤、意式凍肉得八八九九，就叫得起主菜。

焗海鮮配香蒜露絲瑪麗鮮檸汁

咪睇個焗海鮮好似細細包，裡面有齊鱸魚、魷魚圈、青口、鮮蝦、帶子，香蒜味唔多覺，但露絲瑪麗份香草味就非常突出，再唧埋少少鮮檸汁，令啲海鮮更清新。幾款海鮮都好唔錯，尤其件鱸魚同帶子，前者好嫩滑，後者好鮮甜，最弱喺啲青口，好細粒，無乜肉地。焗海鮮嘅伴菜喺油醋沙律菜同連皮炸薯，啲炸薯幾有薯味，粉腍好食！

碳燒肉眼牛扒配紅酒牛油

問過侍應，肉眼喺澳洲貨，小弟要5分熟，碳燒效果唔錯，肉內仲帶有少少血汁，而且肉質軟腍，可惜下鹽應該重手咗，入口過鹹，唯美中不足之處，而醬汁嘅紅酒牛油香得嚟帶點點紅酒味，可惜太少呢！伴菜除連皮炸薯外，配以炒洋蔥、紅、黃燈籠椒及青瓜絲。

甜品

平時晌自助餐上食甜品都幾瘋，不過今日瘋極有個譜，因為一碟試晒。3款凍餅：朱古力慕絲蛋糕、藍啤梨芝士餅、意大利芝士餅，另外又3款馬卡龍，以及1款鮮果撻。等小弟逐樣評評，朱古力慕絲蛋糕兩層蛋糕兩層慕絲，其實都幾平凡，慕絲部份OK，整體朱古力味都算香濃，但面層嘅鏡面朱古力就好乾，一啲都唔滑，可能擺得耐被冷氣吹到乾晒；藍啤梨芝士餅則相對好，芝士味幾濃，挺身而軟滑，面面藍莓果肉好足；意大利芝士餅又點呢？無乜酒味已覺得唔多對板！馬卡龍意外地覺得唔錯，咬落外層極薄極脆，再入口煙韌煙韌，啡色喺朱古力，紅色喺紅莓，亦喺當中較好味嘅一款，杏色喺榛子，都幾香榛子味；鮮果撻原以為都無咩好講，但食落撻殼唔脆，需要改善一下。

Mövenpick咖啡

老婆例飲檸水，不過，以不銹鋼杯盛載，有啲茶記款，有種降格嘅感覺。而既然有得揀Mövenpick咖啡，自然首選，伴以熱奶，咖啡味道香濃醇厚，帶少少甘苦，有個唔錯嘅結尾。

作為一個午餐Brunch Buffet，無一啲歐陸包點，亦缺少個性餐湯，讓人感覺未及完整。而且食物方面，水準有高有低，仍有好些地方需要改善或調整，尤其以此刻價位，加上同區亦有相類似嘅半自助午餐，晌比較之下會有點輸蝕。但喺，服務方面不得不一讚，尤其喺個女侍應，跟啲嘢比較妥貼，又會詢問一下啲嘢有無問題，啱唔啱食，最深印象喺我哋反映完件肉眼有啲過鹹，佢事後真喺走嚟同我哋講已經同經理及主廚反映咗，比人感覺佢都好認真對待份工。希望晌不斷改善吓，佢哋可以做得更好、更全面。

個人評分
味道：7/10
環境：8/10
服務：9/10
抵食：7/10
平均每人消費：HK$215

餐廳資料：

Dabyida Restaurant and Bar
尖沙咀棉登徑5-6號鋪地下
2739 1228