單睇門面，深灰色雲石牆身，襯以一粒粒波浪紋木條，配上石英射燈，已型格十足，原來粒粒木條喻意師傅做串燒灑鹽時嘅動態，所以，入到室內，天花之上，如出一徹，做出同樣效果，既有藝術感，又有立體動感，甚有心思而富風格嘅裝修。整間店舖唔算好大，一入門口左邊喺開放式廚房，有數個吧位，再轉入去就喺一字長形大概有20個位嘅主廳，另外仲有一個箱房，可以坐上8人。
開放式廚房
天花上浪紋木條，喻意師傅做串燒灑鹽時嘅動態。
箱房環境
正所謂「功慾善其事，必先利其器！」要做好啲串燒，硬件當然重要，不惜工本從日本訂製購返嚟高達攝氏千多度嘅烤爐，輕易將食材嘅肉汁鎖緊；加上師傅手勢嘅配合下，透過燒烤時間嘅長短，做出不同效果。
最特別喺店家嘅所有串燒堅持唔醃，希望讓客人一嚐原汁原味，除黑、白胡椒以外，主要就喺採用日本直送嘅竹炭鹽調味，何謂「竹炭鹽」？小弟見識少，都喺第一次認識這種材料，借用餐牌內頁嘅描述，佢就喺「以含豐富礦物質的日本深海鹽為原料，放進生長三年以上的青竹筒，以松木為燃料，加上黃土製成的窯，經過三整天以攝氏1,000-1,500度高溫燃燒後提煉出來的食鹽。竹炭鹽不但含富礦物含量豐富，並具抗氧化及排毒功效。日本人相信竹炭鹽有助釋放人體正能量，提升免疫力。」此外，店家亦另備一小罌竹炭鹽供客人使用，方便一啲想重味啲嘅客人。
竹炭鹽介紹
竹炭鹽真身
前菜小食（6款）
枝豆（$38）：有啲似間場嘅花生，咬開中間嘅豆粒，腍腍哋，鹹鹹哋，串燒與串燒之間不停咁食；
沙甸魚乾（$48）：以魚仔壓成薄薄一片再燒，好似食熨一片片餅乾，好鬼鬆脆，沾啲沙律醬仲好食；
麥粒味噌青瓜（$48）：青瓜粒好爽脆，加埋啲撈過味噌嘅麥粒，挺有趣嘅口感，不過面豉味頗鹹。
沙律（3款）
紅菜頭大根沙律（$62）：3款沙律之中，店方為我哋準依款備甚搶眼嘅沙律，以紅菜頭絲、白蘿蔔絲、紫蘇葉絲做成，紅紅白白綠綠，幼細晶瑩，絲絲盡顯刀功，入口極之清爽，清甜多汁，值得一試。
海鮮（4款）
白鱔（$45串）：每串有3舊，幾厚肉，件件燒至肉香皮脆，咬落又滿口油香，微鹹而惹味，正呀！
肉類 （6款）
牛舌（$48串）：肉類一欄唔喺好多嘢揀，先嚟個燒牛舌，好濃味，有種彈牙又煙韌嘅口感，火喉掌握得好好；
豚肉露筍卷（$32串）：是晚驚喜之一，因為初初望上去，以為只喺燒露筍，原來露筍之上包咗薄到透明嘅一層豚肉，所以，爽嫩嘅露筍中，有幾分鹹香油潤，故此喺小弟嘅心水推介之一。
雞鴨（14款）
由於燒鳥喺黑炙嘅招牌，所以雞鴨類就陣容最龐大，足有14款選擇之多，由雞翼、雞肉、雞皮、軟骨、內臟，到鵪鶉蛋都有，所以，今次店家亦刻意準備多少少燒鳥款式俾我哋試，大飽口福之餘，更大開眼界。
雞翼（$30串）：咪以為只喺普通嘅燒原隻雞翼，據介紹喺選用日本山口縣長州嘅走地雞，雖然雞味較淡，身型較瘦，但皮下脂肪少，肉質較嫩，而且對身體健康啲。最特別喺個拮法，兩條骨燒前已分開，所以食時變為方便得多，加上外皮甘香，肉嫩多汁，好味！好味！
雞骹軟骨（$22串）：如一般常食到嘅雞軟骨，細細粒，燒得香口又鹹鹹爽爽；
日本長州雞肝（$38串）：雞肝燒好後，淋上以雞骨熬煮過濃郁雞汁，所以賣相比較黝黑，而味道變得濃郁，質感非常之粉，鍾愛食肝臟嘅人應該好對胃口；
帶子釀雞翼（價錢待定）：驚喜以外，就喺正，雞翼之內釀入鮮帶子，手功已經唔容易，仲要燒得外脆（雞翼）內軟（帶子），既有甘香（雞翼），又有鮮甜（帶子），有創意嘅配搭，值得推介，只希望定價唔好太高啦；
溏心鵪鶉蛋（$28串）：有驚喜自然要推介，依款串燒鵪鶉蛋又喺一例，鵪鶉蛋先烚再燒，但師傅鑽研出做到流心效果，仲要好流心嗰隻，再淋上雞骨濃汁，效果一流，不得不佩服師傅嘅心思及膽識。
蔬菜（9款）
豆腐（$20串）：雖然蔬菜類有9款供應，如冬菇、日本長蔥、蕃薯、粟米……等等，但燒菜今晚只預備咗一款「豆腐」，其實喺餐牌上嘅主廚推介之一。唔講唔知，店家唔用來貨嘅炸豆腐，豆腐都喺自家先炸後燒，燒時同樣掃上薄薄一朕雞骨濃汁，務求令味道富層次。
熱食（6款）
鹽燒秋刀魚（價錢待定）：採用日本秋刀，比台灣貨貴10倍，可見店方真喺不惜工本，況且，11月秋刀當造，正正不時不食。唔開肚原條鹽燒，做法簡單，最能帶出魚嘅鮮味，外皮焦香，做到皮脆肉嫩，嗒到點點鹽香，再唧啲檸汁，更能提鮮。內臟會有點點苦澀，更要滴多幾滴檸汁，緩和咗朕異味，效果唔同。
（8款）
竹炭稻庭烏冬（冷）（$68份）：烏冬雖然唔喺自家製，但仍以高成本購自日本，質感煙韌滑溜；而蘸麵湯汁就堅持自家做，以木魚花、鯖魚花、秘製醬油混合而成，烏冬沾過湯汁，香甜鮮美，涼快透心。食完一大輪串燒，一份冷烏冬，適合不過；
燒飯團（$32個）：大大個嘅燒飯團一開二，燒得帶點焦香，不過個人感覺整體有啲硬實，另外， 飯團本身無乜點調味，較為淡口，建議糝少少竹鹽，效果更好。
甜品（4款）
除幾款雪葩，就有自家製雪糕（$32客）。今晚分別試到芝麻味及薑汁味兩款，長條形，賣相精巧。總結一句，超出預期。前者，芝麻味香濃不在話下，嗒落有粒粒芝麻口感；後者，薑味本身已經頗為突出，帶微辣，意外位喺食落有幼細薑絲、薑粒，就算唔可以驅寒，做得咁有誠意都叫人窩心啦。
啤酒、紅酒、白酒、清酒、梅酒、燒酌、泡盛、威士忌及非酒精飲品，一應俱全。小弟是晚因事唔方便飲酒，所以點咗沖繩石榴汁（$38），原枝日本直送，雖然註明果汁成份只佔20%，但飲落石榴味濃郁，微酸，我就覺得幾適合食串燒時飲，可以解解油膩感。
除湯類（味噌湯及大蜆清湯）以外，基本上每一類食物都試咗一款以上，雖然日本串燒一向都唔便宜，但計及舒適環境、貼心服務、用料高質、技巧上乘、創作特別……等等，「黑炙」嘅竹炭鹽燒，都有能力直捲全城。
個人評分
味道：8/10
環境：9/10
服務：8/10
抵食：8/10
平均每人消費：HK$0（試食邀請）
味道：8/10
環境：9/10
服務：8/10
抵食：8/10
平均每人消費：HK$0（試食邀請）
餐廳資料：
黑炙 ABURI
黑炙 ABURI
灣仔謝斐道266號地下
2877 0077
沒有留言:
發佈留言