餐前唔喺小食，喺生果嚟！夠晒健康！
陸陸雞煲 $128（例）/ $188（大）
火鍋鍋底其有7款，陸陸雞煲必然喺店方推介之一，為適合唔同人嘅需要，有小辣、中辣、大辣，今次所試到嘅喺小辣例牌份量。據介紹，雞煲醬底喺用上事先炒好鹹鮮、辛辣、酥麻嘅3款醬汁，再加入多種香料做成，一有單就以依個醬底做雞煲，因為喺即叫即做，所以需時約20min。店長將雞煲送上，吱吱作響，香氣四溢，雞件選上三黃雞，又以多種香料醃過夜，入味非常，肉質嫩滑唔嚡；而醬汁入口無想像中咁啃，麻辣味溫和，無話大辣大麻，有點甜甜鹹鹹嘅感覺，似乎喺以適合大部份港人為定位，兼且濃稠度適中，雞件掛滿醬汁，極之惹味。食完個雞煲，可加入辣湯嚟打鞭爐，因為喺辣湯，所以唔會越食越淡，怕辣嘅，亦可以加清湯繼續，但求取個味嚟烚吓烚吓！
蕃茄薯仔牛腩鍋 $98
依款蕃茄薯仔牛腩鍋亦喺店方另一推介，湯底放有大量蔬菜，如鮮蕃茄、粟米、冬菇、薯仔，又因為用咗大量鮮蕃茄嚟熬製，並強調無用茄汁、茄膏，所以蕃茄味鮮活，湯底鮮甜。最特別喺啲牛腩切成一片片，另碟上，煮透後嘅牛腩片，肉味濃郁，仲擔心煮得佢唔夠耐會唔腍，估唔到又唔喺喎。店方嘅其他湯底推介，仲有雞煲追加豬軟骨及沙嗲肥牛湯鍋，相信都同樣值得留意。
打鞭爐又豈可以無醬料，一盆8盅醬料加一壺醬油，鍾意點溝就點溝，醬料有葱花、蒜蓉、炸蒜、指天椒、花生醬、麻辣醬、沙嗲醬、XO醬，嚟個大混醬之後，火鍋起動！
陸陸招牌肥牛及豚肉
1.陸陸手切肥牛（例$158）- 油脂較多，所以食落富油香，肉味亦不俗；
2.頂級肩胛肥牛（例$118）- 色澤紅潤，油脂分佈平均，因為非常薄切，輕淥十數秒，入口嫩滑。
2.頂級肩胛肥牛（例$118）- 色澤紅潤，油脂分佈平均，因為非常薄切，輕淥十數秒，入口嫩滑。
陸陸手切肥牛
頂級肩胛肥牛
陸陸火鍋配料1.花雕醉雞翼（$58）- 一客得5支，認真唔平，不過酒味突出醇香，入晒落雞翼內，而且，師傅為求大家食得方便，更將雞翼反起；
2.鮮鵝腸（$58）- 鮮鵝腸幾新鮮，煙韌爽口，不過肥膏頗多；
3.火炙煙鴨胸（$48）- 火炙後嘅煙鴨胸，用嚟打鞭爐，唔覺有咩特別啫；
4.百花釀油條（$58）- 蝦膠釀入油炸鬼，估唔到淥完油炸鬼仲喺脆，而蝦膠爽彈，值得「安哥」。
花雕醉雞翼
鮮鵝腸
火炙煙鴨胸
百花釀油條
海鮮水產1.大蜆（$68）- 一客6隻，又大又新鮮，避免用雞煲汁淥，個人覺得冚過咗啲鮮甜；
2.日本廣島蠔（$68）- 大大隻有睇頭，就算淥完仍有咁上下份量，入口肥美飽滿，有蠔鮮味；
3.桂花蚌+珊瑚蚌（$88）- 兩者食起嚟都喺口感脆脆，幾款海鮮水產用料不賴。
大蜆
日本廣島蠔
桂花蚌+珊瑚蚌
火鍋丸類及餃類1.手打墨丸（$88）- 一客8粒，加入墨汁搓成黑色，黑白相間，賣相有特色，墨魚鮮味逼人；
2.陸陸六寶丸（$88）- 大包圍嘅心水，有蝦丸、墨丸、龍蝦丸、貢丸、牛丸、炙燒芝心丸，樣樣兩粒，味道唔錯，啱晒多心嘅食友；
3.手打墨魚滑（$68）- 又玩陰陽太極兩色，其實試咗手打墨丸，墨魚滑可以改點其他嘢；
4.魚片頭（$38）- 厚實大粒，爽口彈牙，魚味鮮濃，食得過。
手打墨丸（後）、陸陸六寶丸（前）。
手打墨魚滑
魚片頭
精選火鍋配料1.野生竹笙皇（$78）- 果然竹笙皇，實物又大，淥完漲起仲大，入口非常爽，索滿蕃茄湯，正呀；
2.自家炸響鈴（$38）- 店長介紹喺自家炸，無用來貨，果真有誠意，淥幾秒，脆卜卜；
3.日本蟹柳棒（$38）- 由於好多時啲蟹柳都喺溝粉，所以一向都甚少點，眼前嘅蟹柳棒亦都無試；
4.日本稻庭烏冬（$28）- 滑嘟嘟嘅烏冬，配濃郁蕃茄湯，墊肚之選。
野生竹笙皇
自家炸響鈴
日本蟹柳棒
日本稻庭烏冬
新鮮蔬果類1.陸陸鮮菜籃（$68）- 蔬果類有近廿款，如果人少又想試多幾款菜，鮮菜籃都喺一個幾好選擇，一籃就有齊蕃茄、冬菇、粟米、金菇、生菜、油麥菜、娃娃菜。
2.窩筍（$28）- 即喺油麥菜嘅莖部，外芑有點似西芹條，烚一烚就可以食，口感帶脆；試咗一條生食，仲更加清新爽脆添。
綠茶紅豆雪米糍
陸陸嘅火鍋都有其特色，試咗兩款鍋底都甚有水準，而火鍋配料方面，用料新鮮，部份款式都令人留下印象，定價都跟市面相約。就以今餐為例俾大家一個參考，以上份量夠8-10個人食，當每人飲兩罐汽水或其他嘢食，醬芥，加一，拉勻8個人計，大概每人$250左右，實屬合理，所以，絕對值得一試！
個人評分
味道：9/10
環境：7/10
服務：8/10
抵食：8/10
平均每人消費：HK$250（試食活動）
環境：7/10
服務：8/10
抵食：8/10
平均每人消費：HK$250（試食活動）
餐廳資料：
陸陸雞煲火鍋 66 Hot Pot
尖沙咀柯士甸道124號地下D舖
2702 9666
陸陸雞煲火鍋 66 Hot Pot
尖沙咀柯士甸道124號地下D舖
2702 9666
沒有留言:
發佈留言