美心西餅 Maxim's Cake Shop：哈囉吉蒂的摩天輪

原來哈囉吉蒂喺晌11月生日，又襯著聖誕快到，美心西餅特別推出咗Hello Kitty x Maxim's Cakes Party系列，有主題蛋糕、可愛嘅杯子蛋糕、特色甜品（Hello Kitty馬卡龍），讓大家無論晌生日派對，抑或聖誕派對都大派用場，令氣氛更歡樂。就算唔喺佢嘅死硬粉絲，見到咁可愛嘅吉蒂貓，小朋友都會開心不已。

當中嘅兩款主題蛋糕，「Hello Kitty 彩虹」（$228）就用咗美心嘅皇牌產品彩虹蛋糕做出Hello Kitty版，配合埋DIY套裝（Hello Kitty馬卡龍、彩虹朱古力牌、心心碎糖和彩色棉花糖），睇得人心花怒放；而另一款「開心Hello Kitty」（$168）喺白朱古力士多啤梨慕絲蛋糕，賣點喺以吉蒂嘅招牌貓樣做出3D蛋糕，外形非常討好。 

今次就有幸獲邀試試名為「Hello Kitty摩天輪Cupcake套裝」（$298）嘅杯子蛋糕，一大個寧搭搶眼嘅粉紅吉蒂手抽紙袋，裝好晒成份套裝。8個杯子蛋糕以粉紅、白色間條長型紙盒盛載，紙盒又印滿吉蒂貓公仔，而旋轉摩天輪Cupcake座要自行組裝，所有組件全部一個透明膠封套包好晒。

個旋轉摩天輪唔難砌，有晒說明書，按圖索驥，非常簡單，三幾下手勢就砌好。砌好原來都幾大座架，仲真喺轉得添，8個杯子蛋糕放番好8個懸掛式小卡座，就大功告成。摩天輪11月份喺生日版，12月份吉蒂就會換上聖誕老人裝變身為聖誕版，到時就更加襯番晒聖誕節啦！

個套裝好睇就絕對喺架啦，但啲杯子蛋糕又點先？8個杯子蛋糕，4個原味，4個朱古力味。原味面層蓋上粉紅色白朱古力，加埋一片吉蒂貓朱古力片，十分卡娃兒，粉紅色白朱古力層一咬即裂，脆卜卜，不過味道頗甜，原味蛋糕鬆軟富牛油香，比起朱古力面層，甜度啱啱好；另一款朱古力味，面層當然用番黑朱古力啦，而裝飾換上吉蒂貓個粉紅蝴蝶結，由於成個蛋糕都以朱古力為主，所以好濃郁朱古力味，面層黑朱古力亦比原味嘅白朱古力面層無咁漏，所以，個人覺得朱古力味好食啲！一個原味，一個朱古力味，加杯咖啡，今個晏晝嘅下午茶特別富足。

題外話，美心依次吉蒂系列，唔止睇得、食得，仲可以用得，就喺凡購買任何Hello Kitty蛋糕或Cupcake套裝，加$78就可以換購別緻限量版嘅大手挽袋Tote Bag一個，美觀實用，相信必成一眾吉蒂粉絲囊中物。溫馨提示，就喺依個袋同樣有分灰色嘅彩虹版（1/11-1/12換購）及紅色嘅聖誕版（2/12-31/12），唯一奇怪嘅，彩虹版點解會用灰色呢？

雖然小弟唔喺吉蒂迷，食完啲杯子蛋糕，個摩天輪好似嘥咗，其實一啲都唔嘥，用嚟做個順水人情送俾個吉蒂迷老友，放晌屋企做裝飾之餘又可以擺吓啲小飾物。我就大膽少少醒佢兩句，不如等過年當埋全盒啦，一來8個小卡座就放到8樣全盒零食，8字好意頭吖，二來啲人當佢轉風車，轉幾個圈轉轉運嘛（當然，我同佢都喺宗教原因，唔信依家嘢），三來嚟拜年嘅細路見到都開心好多啦！

個人評分
味道：7/10
環境：7/10
服務：8/10
抵食：7/10
平均每人消費：HK$298（試食活動）

餐廳資料：
美心西餅 Maxim's Cake Shop
葵涌港鐵葵興站KWH 1號舖
2427 2989