既然喺食午餐，當然瞄住午餐餐牌。所謂「假日星級午餐」，即喺星期六、日、公眾假先有，實際就喺可以賣貴啲。套餐A其實有3個主菜選擇，分$89 / $98，定價唔關主菜事，視乎揀咩餐湯，揀意大利菜湯就收前者定價，而小龍蝦湯就喺後者價錢。至於套餐 B同樣原則，但比套餐Ａ貴10蚊，共4個主菜選擇，揀意大利菜湯就收$99，而揀小龍蝦湯就收$108，無論邊個午餐，都包一杯即磨咖啡或茶。
不過，老婆話今朝晌酒店嘅講座，中段休息有茶點招呼，所以，佢晏晝唔算好肚餓。我哋改改策略，點一份輕怡少少嘅午餐，揀套餐 B要意大利菜湯，主菜要沙律，貪佢包湯，我又可以嘆杯咖啡，盛惠$99，再加多一個散叫菜式，食完睇睇情況先再追加。
意大利菜湯（跟餐）
個意大利菜湯色澤嫣紅，睇落幾對辦，呷一啖，味道濃郁酸香，而且，內裡都有幾多蔬菜，仲加有蝴蝶粉，我哋兩公婆共享一碗，都夠飲喎。
香草烤雞凱撒沙律（煙肉碎）配蒜茸多士 $99
個賣相令小弟有少少疑惑，點解啲香草烤雞中間好似少咗件咁款，不過，我哋無考究依個問題。其實，個凱撒沙律做得唔錯，除咗沙律菜新鮮爽脆之外，醬汁撈得「勻巡」，刨上芝士薄片，唔喺糝普通芝士粉；而件香草烤雞醃得入味，香草味輕輕滲出，肉質又無「嚡霎霎」嘅問題，配埋兩件香脆滿蒜香嘅蒜茸多士，整體水準中上。
咖啡（跟餐）
即磨咖啡，新鮮醇香，連解奶都熱過嚟，雖然唔喺咩特別事，總俾壺仔凍奶好。
芝士焗三文魚帶子牛油果特色飯 $98
依個飯由老婆負責揀，問佢點解揀依個，心水來源喺啲牛油果，家下近排佢好鍾意食牛油果。啲特色飯又唔覺有咩好特色，感覺有少少黃薑味，但飯質就焗得唔錯，配合埋半溶芝士，柔香綿綿。此外，3款餡料中，三文魚及帶子落得份量足，味道又幾好，無交行貨，只喺覺得牛油果實在落得少，唯有犧牲小弟，揀晒啲牛油果俾佢，以滿足佢想食牛油果嘅期望。
本來，個午餐仲可以加$13要多客檸檬芝士餅，但實在食得好飽，甜品？有機會再試！
個人評分
味道：8/10
環境：7/10
服務：7/10
抵食：7/10
平均每人消費：HK$110
味道：8/10
環境：7/10
服務：7/10
抵食：7/10
平均每人消費：HK$110
餐廳資料：
意粉屋 Spaghetti House
葵芳興芳路223號新都會廣場533號舖
2610 2733
意粉屋 Spaghetti House
葵芳興芳路223號新都會廣場533號舖
2610 2733
沒有留言:
發佈留言