潮江春 Chiuchow Garden Restaurant ：水準潮點

食過一次美心系嘅「潮庭」，老婆對美心系嘅潮州菜館幾有好感，所以，就趁返完教會拉多個姊妹嚟綠楊坊嘅潮江春食晏，多個人，可以點多兩、三樣嘢，試多幾款點心。美心食肆晌綠楊坊都有幾高佔有率，有東海堂、美心MX、美心皇宮同潮江春，後兩者尤其晌星期日茶市，等位等到癲，今次嚟潮江春，都要等咗30分鐘咁滯呀！

室內環境，保持美心中菜系一貫典雅裝潢，不過未嚟過食晚飯，午市所見，座位有啲逼，好似我對住嗰兩枱，唔喺座位背貼背咁簡單，直頭啲位「咔啦」伸到隔離枱。

點心紙一大一細兩張睇晒，大嗰張喺基本點心紙，清楚列明各級點心售價，小點$19.8、中點$24.8、大點$28.8、特點$32.8共4級，已包括晒蒸點、煎炸、腸粉、潮州點心、灼菜、推介、甜品、早市粥飯近70款。而細嗰張除炒粉飯麵、精緻小食推介外，仲有啲應節嘅節令食物。

茶錢收$8位，前菜就收$15一碟，前菜跟之前晌潮庭食嘅差唔多，有花生、毛豆、鹹酸菜、粒粒豆腐乾，不過嗰邊晚市收$26碟，唔知潮江春晚市又收幾多。花生鹹脆，鹹酸菜酸香，醒醒胃嘅餐前小食。

潮州蒸粉果 $28.8
先嚟一籠潮州點心，潮州蒸粉果一客4個，個個包得外形飽滿，外皮薄透又唔黏牙，內裡餡料十足，豬肉、沙葛粒、冬菇、花生、蝦米、菜蒲都不缺。

蒸潮州笋粿 $28.8
再嚟都喺潮州點心，笋粿較少聽到，印象中小弟都好似第一次食，跟蒸粉果差唔多，不過外形如餃子，而且內餡無粉果咁豐富，以竹筍粒同豬肉為主，加入少少冬菇粒，但喺味道都幾好喎，較為清啲。

蜜汁叉燒包 $24.8
人人對最好食嘅叉燒包都有唔同嘅定義或標準，眼前依籠叉燒包，送嚟夠熱辣，麵身鬆軟，叉燒鬆化，汁醬無過多，咁就絕對滿意收貨。

安蝦咸水角 $24.8
唔知點解，飲茶叫點心，都總要叫番籠炸嘢，唔喺春卷就咸水角。咸水角做得亦唔錯，外皮炸得唔油又軟糯，豬肉跟蝦米做嘅餡料，雖則唔多，不過鹹香夠味。題外話，可能荃灣依間潮江春都喺做本地客為主，所以點心紙都毋須中英對照，不過曾見過有兩種對咸水角嘅譯法，音譯為Fried Ham Sui Gok，另一個意譯為Fried Meat Dumplings，總覺得意譯有意思得多，尤其對遊客而言！Ham Sui Gok，仲以為跟火腿有關添呀！

鮮雜菌腸粉 $28.8
依碟素腸粉喺小弟依餐嘅第二推介，睇樣已經覺得佢好得。腸粉標明即點即拉，腸粉皮拉得非常之薄，薄到透呀，而且，口感非常滑溜，加入磨菇、冬菇……等等，清淡得嚟唔會太寡太單一。

蠔仔肉碎粥 $36雜菌腸粉喺第二推介，咁第一推介喺乜？就喺個蠔仔肉碎粥，蠔仔粥一向都喺潮州出名嘅粥品，潮州粥特色，米粒唔會煲到爆晒米花，質感亦唔會太綿，個蠔仔肉碎粥就完成達標。再者，首先個湯底夠鮮甜，料極多，蠔仔、肉碎、柴魚乾感覺撈極都有，尤其蠔仔，真喺估唔到咁多，而且頗鮮味。所以，點會唔值得推介吖！

因為我哋都算喺晌午市尾段幫襯，陸續走咁幾枱人，環境又再靜啲，好啱我哋幾個人慢慢傾、慢慢食，飲茶就勝在「襟」坐。

個人評分
味道：8/10
環境：8/10
服務：8/10
抵食：8/10
平均每人消費：HK$73

餐廳資料：
潮江春 Chiuchow Garden Restaurant
荃灣蕙荃路22-26號綠楊坊2樓S10-12號舖
2498 3381