馬來一菜館Cafe Malacca：起航．再回味馬六甲海峽的滋味

猶記得2008年第一次去馬來西亞，第一站唔喺去首府吉隆坡，而喺先去檳城，對檳城印象好唔錯，市中心喬治市細細，行路都大致行得晒，仲保留咗好多舊建築，幾有50、60年代香港舊城風情，而且當地唔少華人仲喺講廣東話，幾易溝通呀；海灘區景觀又靚，水上活動多籮籮；另一邊郊區有個熱帶果園，俾幾十蚊有得睇又有得食，爽囉！但講到食，檳城嘅新關仔角、吉隆坡嘅阿羅街、新加坡嘅熟食中心及牛車水……等等，小弟能有機會到訪，實在滋味滿地。今次有幸經食友轉介，並得公關邀請嚟試菜，實在好期待，因為馬來一就喺主打此等地區嘅美食，餐廳英文名字正正由馬六甲海峽而嚟，起航，再回味星馬美食，或者改口叫新馬美食！

檳城新關仔角嘅檔口及當地所賣嘅「囉吔」

檳城新關仔角賣亞參喇沙嘅檔口

吉隆坡嘅阿羅街，一街兩邊盡是美食檔

餐廳處於西環盛貿酒店2樓，嚟到先發覺盛貿喺香格里拉集團旗下嘅副線酒店，對其出品就更有信心，亦怪不得管理方理俾人感覺良好。雖然西環對很多人嚟講都比較吊腳、偏遠，不過對返中環工，家住美孚嘅我，又OK喎，收工過嚟有好多條巴士線都經盛貿，回程隧巴905經西隧一車話咁快就直達屋企樓下，異常方便囉，哈哈！

馬來一嘅前身喺Café 508，而再前身叫Jen Café，當時酒店仲叫緊仁民飯店，睇番小弟嘅飲食足跡，2009年都曾晌Jen Café食過一次下午茶自助餐。對比今次再嚟，竟然發覺餐廳環境無乜點變喎，依舊一邊長枱無靠背梳化椅，另一邊則2、4、6人或方或圓木餐枱配木椅，以柔和燈光襯托，牆身只掛上星馬街邊檔黑白相，無乜一般好東南亞風情嘅擺設，以簡約舒適嘅環境，令食客品嚐到多元嘅星馬正宗風味。此外，由香格里拉依個品牌管理，服務水準有一定保證。

餐牌都幾得意，以硬皮製作，內頁有一幅馬六甲海峽嘅地圖，印有檳城、吉隆坡及新加坡嘅位置，兼一段餐廳介紹。再向內揭，3張A4呎吋嘅菜單，涵括所以地道星馬美食，及全彩頁食物圖片介紹。不過，再往後揭，又有另外2張A4呎吋嘅西式菜單，原來星馬菜以外，亦有西餐提供，話晒前身都喺做西餐，讓客人多個選擇。

薏米水（熱）$23
老婆喜歡熱飲多啲，所以佢一眼睇中依個地道馬來西亞飲品，外表可謂平平無奇，但飲落你就知薏米味何其突出，飲到底就知下咗幾多豆大嘅薏米。薏米其實幾有益，上網查查就知有利水消腫、健脾去濕、舒筋除痹、清熱排膿……等功效。所以，喜歡健康嘅人，薏米水喺一個極好選擇。

香茅特飲（凍）$23
我就一向鍾意試啲特色嘢，香茅特飲以香茅煲水，伴以青青哋嘅斑蘭味果凍，一入口香茅味衝著味覺而嚟，感覺幾特別，清爽得嚟又有朕香茅芳香，有趣！

囉惹醬蔬果沙律 $53
檳城當地都沿用好多中文，所以搵食唔難，依個「囉惹醬蔬果沙律」晌當地叫「囉吔」（Rojak），周圍都食到，現場即點即切即撈，多數都會用啲爽脆嘅硬水果，減低出水情況，第一次食覺得好古怪，甜甜酸酸鹹鹹，但又好過癮。今晚再試到，實在好開心，蔬果有菠蘿、番石榴、青瓜、楊桃、蓮霧、土魷，以檳城蝦醬加馬六甲棕櫚糖撈埋拌勻，後加油炸鬼，撤上花生碎同芝麻就搞掂，味道頗複雜，但食落真喺幾過癮，對未試過嘅人會有份驚喜。

咖喱香葉炒茄子 $45
有別中式嘅炒茄子，茄子先蘸脆漿輕炸，再用香蒜、蔥粒同咖喱葉爆炒，灑上炸蝦乾便成。其實啲茄子所帶嘅香味唔算重，但佐以檳城蝦醬同食，又別有風味，檳城蝦醬質感較杰身，帶鹹香。茄子嘅脆漿挺薄，唔油膩，好香口，口感軟到好似食豆腐咁，確喺幾好食！

馬拉盞炒羊角豆 $45
公關極力推介依道菜，果然有驚喜。羊角豆喺俗名，正名喺秋葵，香港普遍叫毛茄，真身喺長形細細條2、3吋左右長，其實小弟都唔識，喺老婆教番我。好簡單以檳城蝦醬、辣椒香炒，所以味道較為香口惹味，而羊角豆咬落喺爽爽哋，但又滑潺潺，鹹鹹辣辣，值得一試。

羊角豆真身

檳城亞參喇沙 $82

公關另一重點推介，全因為個亞參（一種熱帶果實：羅望子，有啲人叫酸子），因為唔喺度度都有供應，佢哋仲喺飛機貨返嚟。據講個湯喺選用較幼嫩嘅細鮫魚拆肉嚟熬製，所以都頗鮮味，味道又幾對辦，帶酸味就喺因為啲亞參，當然仲有其他香料如：辣椒、香茅、黃薑……等等一齊熬煮個魚湯先得咁濃香酸辣。叻沙通常配米線或米粉，馬來一就選用米線，口感滑嘟嘟，配菜仲有埋新鮮菠蘿、青瓜絲、洋蔥絲、薄菏葉，可能你會話無乜料，但焦點就放晌個湯頭度，老婆就讚個湯確喺幾得。公關仲講，佢哋啲湯粉麵，配合唔同味道，個個都用唔同湯底，有用魚、有用鴨，成本唔少，所以先賣到$70-$80一碗。

星洲香辣烤魚（2件） $32
同樣選用鮫魚，不過就唔使揀啲細嫩嘅，將魚肉以地道辣醬調味後，再用蕉葉包實燒香。三十零蚊已有2大件，其實都幾抵食，材料、手功都抵番啦，烤魚口感有啲似蛋餅，不過，蕉葉香未及預期。

椰漿飯拼盤 $82
嗰時去馬來西亞食過兩次椰漿飯，第一次由檳城返吉隆坡時晌機場食，唔喺好得，所以當晚再晌阿羅街食多次，果然正好多。今回再點椰漿飯，實在喺想回憶嗰份滋味，馬來一嘅椰漿飯絕對要試，從飯中滲出嘅椰香極之濃郁，未食都聞到，飯粒又鬆軟，淨食飯都正囉。配菜仲有香辣多汁嘅馬來炸雞、花生粒、酥徇嘅炸鳳尾魚仔、青瓜，以及一隻流心荷包蛋，伴以既香且辣自家製嘅參巴醬，瓦碟之上都放塊蕉葉，為保正宗。整體飯香、料足、味好，真喺值得推介。

流心荷包蛋，正！撈飯，有椰香，又有蛋香！

香蘭椰絲卷（3件） $28
馬來西亞甜品及西式甜品都各有5 款，嗜甜嘅我當然樣樣都想試啦，可惜始終胃就得一個。先嚟招牌香蘭椰絲卷，喺以棕櫚糖炒過嘅鮮椰絲，加班蘭班戟皮做成嘅組合，外表青青綠綠頗搶眼，整條椰絲卷都喺暖暖哋，外皮散發班蘭微微清香，內裡嘅椰絲勁香，口感軟糯，味道香甜，好有特色嘅甜品。3件先賣$28，非常抵食。

榴槤布甸 $38
喺餐牌以外精選，由於做法唔屬於馬拉嘢，所以暫時無放晌個餐牌度，但就喺店方嘅甜品推介。選用咗貓山王榴槤果肉，所以榴槤味極之濃郁，與其話喺布甸，小弟就覺得似奶凍多啲，因為又富奶香，兩者味道平衡，質感挺身而軟滑，用料不賴，絕對喺誠意之作。幾啱啲喜歡榴槤嘅香，但怕榴槤嘅質嘅人去食！

菜式上有啲喺店方推介，有啲喺小弟想試，所以今餐都點咗幾多美食，3-4個人都夠食，可惜只有我倆公婆，小弟已發揮出小宇宙，但老婆胃納有限，仲有多款星馬菜未有試到。雖然菜式已包含好多類別，除粉麵類，每類嘅款式約有三、五款，唔算太多，但勝在夠精！
飯後，都跟總廚謝偉強師傅聊吓天，學吓嘢偷偷師。據講，菜式都喺由一位檳城人作顧問，佢都有跟埋一齊走訪當地觀摩、考察，全部菜式都依當地做法，大部份用料都沿於當地，好似啲班蘭葉、棕櫚糖、咖央醬……等；再者，馬來西亞及新加坡駐港領事久唔久都會晌度訂枱食飯，可見其菜式正宗程度。當大家講番晌檳城、吉隆坡飲飲食食時，就不期然提到檳城有好多好似香港「冬菇亭」嘅熟食檔……等等經歷，馬來西亞，我會再嚟！在此，再次多謝公關嘅安排、謝師傅嘅解說、食友嘅舉薦！

個人評分
味道：9/10
環境：8/10
服務：8/10
抵食：8/10
平均每人消費：HK$225 (試食邀請)

餐廳資料：
馬來一菜館Cafe Malacca
西環皇后大道西508號香港盛貿飯店2樓
2213 6613