曲奇四重奏 Cookies Quartet：物重心意濃

古人有云：「物輕情意重，千里送鵝毛。」今勻小弟改一改：「物重心意濃，一票換雜錦。」此話何解？事緣又喺啲網上遊戲，意外獲得幾張澳門威尼斯展覽館入場券，因為短期都無打算過大海，發個電郵問問有邊位朋友有興趣，其中一位有興趣嘅朋友Iki竟然連啲展覽館飛都未拎，先送我一盒「曲奇四重奏」嘅雜錦酥盒（$148），好墜手，點可以唔形容為「物重心意濃」吖。反倒我就收得有啲唔好意思囉！

曲奇四重奏嘅背景，唔使多講好多人都知。以美國有機麵粉、法國及新西蘭優質牛油、加入健康元素如亞麻籽、葵花子、榛子……，以至其他食材均採用全天然貨色嚟做曲奇，全人手製作，少油少糖，務求更健康，再者款式多樣化，味道夠特別，故此都有不少人追捧。

內附一張介紹所有產品嘅小卡

曲奇故之然喺店中招牌名物，但蝴蝶酥同樣幾耍家。手中嘅雜錦酥盒，內藏７款蝴蝶酥或酥條，以下跟大家逐一分享。

原味蝴蝶酥（6件）
原味，最能食出基本味道。層層酥皮清晰可見，雖然喺手做，但形狀、大細勻一，烘得金黃亮麗，咬一口，確實酥脆非常，少甜而富牛油香，卻喺食多幾件都未見油膩。

黑白芝蔴蝴蝶酥（3件）
蝴蝶酥中間沾滿細細粒炒香過嘅黑白芝蔴，雖然說明上話加入咗果皮蓉，不過似乎唔喺好明顯，但芝蔴味道本身都好唔錯嘅。

椰絲芝蔴蝴蝶酥（3件）
晌黑白芝蔴裡面再加入椰絲，比起上面嗰款加入果皮蓉，依隻椰絲芝蔴蝴蝶酥就突出少少，椰絲帶來多一份清甜，襯黑白芝蔴都幾夾。

黃金亞麻籽蝴蝶酥（3件）
亞麻籽依個名真喺好陌生，除咗聽人講過亞麻籽油之外，所知不多。但原來頗為健康有益，可幫助舒解風濕樣關節炎、牛皮癬、過敏及其他發炎性疾病，又癌症預防、降低患心臟病風險、降低血壓（撮自網上）。亞麻籽比芝蔴大粒好多，能夠食得健康，自然最好不過。

黑合桃蝴蝶酥（3件）
據介紹，黑合桃採用美國野生貨色，可謂不惜工本。但你話喺咪比一般合桃更香濃，分野似乎唔算好大，但烘過嘅合桃碎，加埋蝴蝶酥，口感寧捨鬆脆。

玉桂酥條（4條）
兩款酥條都有獨立包裝，一包內共有4條，外形扭紋狀。酥條外層沾滿玉桂糖粉，玉桂味濃有個性，而酥條跟蝴蝶酥同樣極之鬆脆。

杏仁酥條（4條）
外形無玉桂酥條咁扭紋，但成條酥條都沾滿杏仁碎，外表雖然「岩岩巉巉」，但食落滿嘴杏仁香。

兩公婆當下午茶猛咁食，真喺好易食唔停口，再次多謝Iki嘅厚禮。

個人評分
味道：8/10
環境：7/10
服務：7/10
抵食：8/10
平均每人消費：HK$148 / 盒

餐廳資料：
曲奇四重奏 Cookies Quartet
尖沙咀加拿分道10B號嘉芬大廈地下E號鋪
2311 5119