美孚區都已經有唔少茶記，集團式經營有金裝燉奶佬、太興 ，其他嘅仲有味味佳、金龍泉、荔苑、金利銀輝、味小館、美味小廚……，不過以一個美孚新村咁大型屋苑，加埋周圍嘅屋村私樓，只以間茶記嘅出品唔差，生意絕對有得做，就好似依間隱身晌村內嘅街坊茶記「美孚冰室 」，感覺咩時候嚟都有唔少人，星期六、日唔使講就更加旺。
又喺兩公婆懶煮落嚟食早餐嘅日子，雖然多客，但茶記勝在搵位唔使講規矩，隨意搭枱。枱面玻璃下一大張A4紙印備所有早餐款式，精美早餐、出前一丁麵餐、美式扒餐、三文治餐……等等，我哋就瞄準精美早餐部份，分A-G其7款，款款$24包啡茶。
（B餐）雪菜肉絲米粉配餐肉煎蛋
本來老婆叫咗G餐（是日靚粥配煎蘿蔔糕 / 炒粉麵），點知咁快買晒，改要B餐嘅雪菜肉絲米粉配餐肉煎蛋，另配烘厚多士半件。雪菜肉絲米粉，雪菜唔多，點知肉絲更少，湯頭「清淡」；厚多士搽牛油「求其」，煎蛋唔喺滑蛋亦唔喺荷包蛋，煎到好似塊蛋皮，加埋薄薄半塊餐肉，但求快手，屬於好無要求嘅水平，味道好一般。最好，可能喺杯熱檸水同奶茶。
（F餐）牛尾湯螺絲粉配腸仔煎蛋
比起個雪菜肉絲米粉，個牛尾湯螺絲粉自然嚟得濃味，加上加入唔少甘筍、洋蔥、西芹……等等，味道調校得酸酸香香，螺絲粉亦煮得差唔多，幾好食；腸仔煎蛋，前者無過鹹毛病，而後者嚟到見佢個蛋漿已溜走晒出嚟，所以搵件多士沾蛋漿嚟食，一樣咁好味，又唔使嘥嘢。西餐廳餐飲要熱咖啡，茶記餐飲要熱奶茶，漸漸依個已成為小弟諗餐飲嘅不變定律，奶茶味道芳香沉實，口感挺柔滑，奶茶始終茶記好！
奇景分享一則，見近門口張枱，枱面上放滿咗幾十杯飲品，每杯都「獨立」包裝，又見有一兜二兜湯粉麵，再加埋枱下幾箱一盒二盒外賣早餐A、B、C、D……，心諗咁早邊鬼個訂咁多份早餐，八卦問一問，先知原來送去附近嘅荔枝角收押所，喺啲囚犯訂嘅早餐。嚴格嚟講，都唔可以叫嗰啲人做「囚犯」，因為晌得荔枝角收押所嘅（留意，唔喺監獄），都喺啲未判刑嘅人，訂多都只可以叫「疑犯」，犯咗事無得保釋而要收監嘅人。仲以為佢哋只有皇家早餐食，估唔到可以叫外賣，但具體守則喺點就無八得咁詳細。如有邊位知得更詳細、準確，不妨幫忙補充！
個人評分
味道：6/10
環境：6/10
服務：6/10
抵食：8/10
平均每人消費：HK$24
餐廳資料：
美孚冰室 Mei Foo Cafe
美孚美孚新村恒柏街6號N29A地舖
2307 4577
沒有留言:
發佈留言