譚點 Tam Dim：譚何容易

譚點以新派、創新、中西合璧嘅點心而聞名，如青芥脆蝦一口漢堡仔、蒜茸芝士焗饅頭、沙律香芒盞……等等，要令一啲新嘢成功，可能要經過多次嚐試，多次失敗，要成功真喺談何容易。譚點初初出道有唔少雜誌訪問，好評亦唔少，不過總店晌九龍城，喺小弟甚少踏足嘅區域，但依家多咗間分店仲要開嚟長沙灣，對我同屋企人變得就腳好多。所以細佬餐生日飯，就定晌譚點，只不過唔喺食點心，因為茶市點心只供應到5:00pm，晚市嚟就只好跟點心緣慳一面，不過又可以試試佢啲小菜掂唔掂！

店內無乜太花巧或好重本嘅裝修，一般普通中菜館格局，大黑白格地板磚，啡皮櫈，而枱櫈排得幾企理，牆上、柱上都貼滿各式各樣小菜嘅介紹。反而個菜譜有啲得意，打開好似中文作文用嘅原稿紙，實在有啲懷念，依家莫講話用原稿紙啦，連寫字都少晒啦，啲中文喺「打」出嚟。

是日足料靚燉湯 $98
小弟首推嘅就喺依個足料靚燉湯，日日唔同款，燉乜嘢湯睇睇牆上推介紙就知，今晚就喺淮山杞子螺片燉豬展，每位$38，人多當然點例窩啦，一大窩先賣$98，淨湯已可以分到6碗，湯渣又一大碟另外碟上。湯色睇起嚟挺濃郁，飲落味道鮮甜，又帶點甘，原來仲下咗黨參，雖然小弟對中葯材唔精，不過滋養強身、明目補肝、補中益氣……等等都總會中其中三幾樣啦，哈哈。仲有，唔介意嘅話其實湯渣都唔應該錯過，因為曾聽過人講飲湯食埋湯渣先吸收晒所有精華，螺片、豬展蘸點豉油食，味道都仲喺唔差。

沙田炸乳鴿 $38 / 隻
既然喺細佬生日飯，食得豐富啲就必然架喇，所以特意點兩隻炸乳鴿嚟大家擦吓。乳鴿外皮炸得頗甘香，肉質又唔乾身，而且幾厚肉，點淮鹽當然鹹香惹味啲，不過蘸喼汁減低油膩感就合我心水啲。

粟米新鮮龍躉斑塊 $128
譚點賣嘅粵式小菜大部份都喺$60、$70左右，個別會貴少少去到$80、$90，但依道「粟米斑塊」賣到成$128，就知用料唔喺普通貨色。斑塊用上新鮮龍躉做，自然魚味稍勝一籌，而且份量比一般粵式嘅例牌八兩為多，真喺抵食番晒。最有心思喺粟米芡汁同個斑塊分開上，唔怕個斑塊外層脆漿被芡汁浸腍晒，只喺略嫌個芡汁好少粟米，蛋花就多，同埋有少少稀，唔喺好掛上啲斑塊度。因為個芡汁都幾大兜，相信通常都點唔晒，大可以撈飯食，效果唔錯，又唔好嘥嘢！

冰梅焗肉排 $63
成晚較失望嘅一道菜，查實味道唔差，冰梅醬微酸而清甜順喉，但喺啲肉排始終頗肥，同埋肉質咬落唔鬆化。

芝士琵琶豆腐 $68
之所謂叫琵琶豆腐就因為做嘅時候，將豆腐搓爛再放晌中式湯匙度蒸熟成琵琶之形，不過，依家好多時凡搓爛再成形嘅都叫琵琶豆腐，做法仲層出不窮，眼下嘅琵琶豆腐就喺一例。琵琶豆腐成為炸豆腐球，再澆上芝士芡，味道一濃一清，幾鮮明嘅配搭。

瀨尿蝦（免費）
食到孻尾，見個唔知老細定店長，手捧一大碟清蒸瀨尿蝦通枱派，人人有份，無講因乜事咁高興，總之一人一隻免費送啦。雖然啲瀨尿蝦都幾細隻，拆開後都無乜肉食，不過唔使錢就無謂多多聲氣喇！

杞子桂花糕（免費）
大家都食得好飽，而且除小弟之外，細佬妹對甜品都唔算好，所以就無點甜品作結，不過，原來店方又會送埋飯後甜品。甜品喺一客杞子桂花糕（4件），如果堂食價都要$13，雖然只喺小恩小惠，但都值得加分。桂花糕用上蔗糖做，色澤比常見嘅深，味道唔錯，清甜帶有桂花幽香，不過最唔得喺糕身頗削，削到一個地步枝牙籤都撩唔起舊糕。

試咗多款小菜，相比起點心，雖未有太大驚喜，但質量都唔錯，環境亦算舒適，服務無話特別好，但事事到位，至少斟茶遞水、上菜收碟都無咩大過。早午茶位收$3，晚市茶位就收$8，另外酸菜（是晚喺醃青瓜同鹹脆花生）收$10碟，但好就好在無加一，所以小弟有少少預錯數。因為無收加一，所以原先自己計落加埋一應該過$500，可以用張減$50嘅優惠券，但店員話唔夠數，又唔好意思再追問差幾多，費事搞嚟搞去，就用張減20嘅優惠券算數！

個人評分
味道：8/10
環境：8/10
服務：8/10
抵食：8/10
平均每人消費：HK$115

餐廳資料：
譚點 Tam Dim
長沙灣元州街481-483號地下
2959 0330