信和系嘅酒店，咁多年唯獨香港黃金海岸酒店無試過佢嘅自助餐，原因不外乎位置覺得偏，但佢個價又唔喺賣得特別平，一客自助晚餐，成人價平日要$438 + 10%，五六日公眾假期索價就$488 + 10%，絕對拍得住市區啲4、5星酒店，今晚試過之後，就明白點解佢會賣得咁貴，而咁貴又仲點解咁多人幫襯。小弟有幸，晌ufood網站嘅寫食評遊戲中獲獎，獎品就喺黃金海岸酒店雙人自助晚餐，所以揀個星期日晚同老婆嚟嘆番餐。
 |
| 聆渢咖啡廳要由大堂經樓梯落地庫一層 |
 |
| 餐廳入口接待處 |
 |
室內環境，柔和暖意！
|
 |
室外環境，極度開揚！
|
 |
| 外面對住遊艇會，又有海濱長堤，食完有時間不妨散吓步。 |
 |
| 盛宴準備起動 |
冷盤、沙律
冷盤同沙律款式非常豐富，我同老婆一人一大碟都仲未試晒所以款式，選擇實在特別多，都喺揀啲想食嘅嚟試試，詳細就唔多講，大家睇睇相概略知有乜。重點推介一下小弟心水，冷盤類，漬醃魚皮非常爽口，芝麻櫻花蝦好惹味，蓮藕片既薄且脆，芝麻吞拿魚很鮮味，酥皮三文魚卷挺酥嫩，此外仲有凍切肉腸、燒牛肉、芝士盤、煙三文、泡菜、筍乾……等等都喺值得一試嘅選擇。而沙律類，有心機嘅就當然晌自助沙律吧自己砌，基本材料、醬汁一應俱全，反而今勻預製沙律喺我嘅心水，有成9款咁多，實屬少見，當中烤南瓜沙律同大蝦雜果沙律較得我歡心，前者純屬喜好問題，後者鮮蝦多過生果，爽呀！
海鮮
海鮮吧前後共有7款，包括：長蟹腳、大甜蝦、青口、翡翠螺、大扇貝、澳洲藍青口、瀨尿蝦。初段要排隊拎，客人都好守規矩，加上貨源不絕，未有搶食情況。我哋一碟過成份海鮮拼盤咁，樣樣兩件試一試（瀨尿蝦則無試，因為喺後尾轉款時出，臨走先發現）。除咗蟹腳海水味重，偏鹹之外，其他都唔錯，幾鮮甜，尤其大甜蝦同翡翠螺，蘸點自家製辣茄汁，好醒胃。雖然海鮮屬回本嘢，但無再添，因為實在仲有好多嘢想試嘛！
麵包籃．熱盤
麵包籃放晌中湯側邊，對住海鮮食物區，有3款小圓包，平時食自助餐我總會食一、兩個配餐湯，但今次則要忍手留肚食其他。仲有就喺小弟破天荒，食自助餐咁耐以嚟，喺第一次一啲都無沾手過熱盤，唔喺唔好食（因為老婆有拎，試咗一條燒豬肋骨），更加唔喺少選擇，而喺取捨之下，放棄咗熱盤類。因為戶外區有太多即煮即煎即燒美食，平時食自助餐少有，所以先投向其懷抱。咁多想講少少熱盤，等大家有個參考，晌餐廳一入門口兩旁就放咗17款熱葷，賣相幾好，有燒雞、魚塊、鴨件、羊腩、蜜糖豆、豬肋骨、蠔油時蔬、八珍豆腐、青咖喱、炸雞寶、蝦餃、長通粉、炒飯……等等，外面都仲有幾盆熱葷：咖喱肉丸、水煮魚等，如果逐款要啲都飽到上心口呀！
刺身．卷物
黃金海岸喺無壽司供應，但刺身同卷物就唔少，先講卷物，兩大盆卷物但望落來來去去其實得3款，又唔多吸引，所以睇嘅人多，夾嘅人少。相反，刺身就長期人龍，其一，款式多，共有6款刺身：甜蝦、吞拿、油甘、三文、八爪魚、鯛魚，吸引度大增；其二，要多少又無限制，要得多自然切得耐；其三，款款魚生放晌雪櫃保鮮，全部都喺叫到先切，永無切定，所以變成輪候需時。老婆唔好魚生，只好點個一人份，每款一件，以甜蝦、三文最鮮甜，鯛魚則唔多啱口味，而且切得太厚，層皮又韌。
食到依個時段先停一停，抖一抖，作個中場休息，因為都食咗唔少嘢。不過下半場就仲正，殺出戶外食物區搵食，多款新鮮即做美食都喺亮點，仲有一系列「燕窩」佳餚，以及豈能錯過嘅甜品呢！
下半場先上陣有燒烤美食，跟住喺多款亮點菜式，以及主題嘅燕窩佳餚，晌橫掃甜品之前再來一轉生果盤，下半場咁嘅人腳，絕對喺「夫添」出場，所以麵包、熱葷、炒飯……依啲大後備，真喺要借開囉。
一出到外面，都分開幾個食物區域，中央圓型開放式廚房提供多款即煮、即煎、即燒美食；而最左邊有炭燒香腸、牛扒、羊架、燒蠔、牛仔骨……等等，側邊少少又有炭燒海皇羹、炸乳鴿、燒雞翼；另一邊最右邊遠處，喺明爐燒乳豬同燒鵝，真喺炭火香十足，難得大廚密密燒、密密做，永遠唔使等好耐。
炭燒拼盤
燒烤嘢都喺熱氣啲，都喺有啲節制好，所以老婆精選咗一碟返嚟兩份食，有燒乳豬、燒琵琶鴨、乳鴿、燒牛肉，點解無攞燒蠔，唉！走寶。必試之選喺燒乳豬、燒鴨、乳鴿，火光熊熊之下，乳豬經炭火燒得層皮卜卜脆，唔太肥，又無過鹹，新鮮熱辣，超正；燒鴨都一樣正，暖暖鴨肉，鴨油甘香豐腴；乳鴿雖然炸起一陣間，但外皮依然香脆，肉質細嫩。
蘑菇忌廉湯
之前晌裡面搵食時都覺得有啲奇怪，麵包籃側竟然只得一款湯，仲要喺中湯，一貫自助餐中西湯必備都已經喺不成文規定，但睇勻都唔見，原來西湯晌外面。蘑菇忌廉湯，唔喺一大壺擺晌度，而喺你叫嘅時候先再搵攪拌機再打，加忌廉，咁處理法小弟都喺第一次見，個湯有少少起泡，外觀有啲意大利泡沫咖啡嘅感覺，飲落菌味極濃，口感挺滑溜，估唔到咁正喎！
煎虎蝦．帶子．燒生果
咁嘅組合喺咪好吸引呢？就晌大圓型食物台度，有依3樣美饌分別供應，因為每次都煎少少，尤其燒菠蘿，額外需時。煎虎蝦配瑞士汁，瑞士汁我就無要，因為香煎虎蝦已經夠鮮甜，肉質還算爽彈；煎帶子連肉帶裙邊，大過個5蚊銀，好厚肉，伴少少忌廉汁，好好味；而燒生果有菠蘿同香蕉，各試一件，菠蘿略嫌未夠濃，唔夠炭火香，燒耐啲收乾多啲水份就仲香仲甜，而烏卒卒嗰舊喺燒香蕉，香蕉已經燒到熟透，軟腍腍，蕉味濃郁，質感會有啲爛撻撻，不過就好似食緊啲暖暖哋嘅香蕉慕絲咁。
蟹肉脆酥配黑魚子
開放式廚房另一亮點食物，蟹肉以酥皮包住烘焗，方形細細一件，要嘅話即由暖櫃取出，再加黑魚子，賣相好精巧，下黑魚子亦無手緊。咪以為有限住攞，要幾多都得，不過小弟要一件，小食多滋味，留力繼續食。內裡蟹肉頗多，酥皮盒勁脆，「卡嚓」應聲脆開，黑魚子鹹鹹香香，確喺一道別緻小食。
試完咁多道精選亮點菜式，開始入肉輪到是晚自助餐嘅主題菜「燕窩」，有鹹甜點、有粥、有羹、有熱葷，燕窩南瓜肉碎粥無試，因為一大碗實在食唔落，而燕窩杞子桂花糕初時有影相，不過去到尾小弟嘅甜品時段就唔見有。
燕窩海皇羹伴紫薯飯糰
晌戶外以炭火明燒，迷你小瓦煲，滿滿嘅海皇羹燒得燙熱，內裡有一球紫薯飯糰，上碟時廚師再滔一羹燕窩，由外面行返去入面埋位，真要小心睇熱。海皇羹材料十足，有新鮮蝦肉、魚肉、蟹肉、冬菇，稀杰剛好，羹底又鮮味；反而個紫薯飯糰又唔喺太覺咩特別，蕃薯味算不上強，但浸晌湯羹嘅飯糰有點似食湯飯；面面嘅燕窩就足令此菜式更富營養。
燕窩香蕉龍脷柳煙肉卷
要選依晚驚喜菜式，我會投依道煙肉卷一票，因為龍脷柳煙肉卷都曾經試過，但加埋香蕉晌龍脷柳裡面，集鹹甜香於一身，但食落又唔會不倫不類，當然添上點點燕窩上面，令佢變得更矜貴。
燕窩燉雙皮奶
焦點燕窩甜品，每人限送一客，熱辣辣嘅雙皮奶，富奶香，滑嘟嘟，尤其晌冬日，食落真喺好暖心窩，加上燕窩，大抵可以叫得做又養顏，又美白，相信好多女生都鍾意。
燕窩檸檬撻
另一款焦點燕窩甜品，仲喺註場廚師不斷即製，以牛油皮撻殼，底下鋪上金寶，再唧入檸檬慕絲烘焗，最後伴粒紅桑莓，加啲燕窩，灑上糖霜，並以紅莓醬畫花做伴碟裝飾，單單賣相已甚靚仔。味道又如何，撻殼頗脆，檸檬慕絲稍為酸啲，不過軟綿細滑好醒神，底下嘅金寶好鬆脆，回味無窮，若非有更多甜品正等緊我，真喺會添食多一客！
燕窩鮮果雪糕班戟
唔知點解，近幾次食自助餐都有班戟供應，又總喺以班戟為自助餐作結，今晚又無例外，來一客燕窩鮮果雪糕班戟。講真，燕窩就唔喺太食得出，但鮮果班戟再配上雪糕球，永遠都喺好食，而雪糕喺指定芒果味，但小弟貪心啲，自我加多一球Häagen-Dazs流心雪糕，大體上變成一道超正甜品。
雪糕
未講甜品，先特意講講雪糕，因為除咗喺Dreyer's同Häagen-Dazs細杯裝兩大品牌之外，Dreyer's選上精選味道嘅紐約藍梅芝士餅味道，而HD更用上兩款流心系列，法式焦糖燉蛋同馬令紅桑莓軟心。3款味都試勻晒，藍梅芝士餅雪糕作為食完燒烤後嘅間場，法式焦糖燉蛋雪糕就淨食，馬令紅桑莓軟心雪糕就添加落班戟度，馬令喺音譯，老派叫法，依家就文雅啲叫蛋白脆餅。.
鮮果拼盤
老婆食完個燉雙皮奶已經幾近無晒戰鬥力，不過都拎咗一份鮮果拼盤搵我「共享」，晌度都有幾多生果：哈蜜瓜、蜜瓜、西瓜、菠蘿、火龍果、士多啤梨，最好食喺菠蘿，夠晒甜。
甜品拼盤
其實，一開始「巡場」時對甜品吧已好注視，因為成廿幾呎長嘅甜品吧，放超過廿款甜品，仲有曲奇餅、糖果、朱古力噴泉……，點會唔引死人吖。除咗以上提過嘅甜品外，依輪嘅甜品拼盤DIY都拎咗唔少嘢，都有9款，味道、種類款款不同，各有特色，整體屬中上質素，非常好食。例如以方形白碗裝住嘅朱古力慕絲，以為普通嘢，原來加咗咖啡酒，食落好香，又幼滑，面層嘅Oero餅碎，添加口感，正！如果逐款甜品嚟評，真喺可以開另一篇食評，所以無謂多講，俾大家睇睇相當參考就算。
自助晚餐資料：
凡於推廣期間，憑任何信用卡惠顧自助晚餐，逢星期一至五可享75折優惠，星期六至日、公眾假期及其前夕則享8折優惠。
供應日期: 2013年1月2日至2013年3月31日
供應時間: 晚上6時30分至晚上10時
價錢：星期一至四 - 成人港幣$438、小童港幣$268
星期五至日，公眾假期及其前夕 - 成人港幣$488、小童港幣$298
個人評分
味道：9/10
環境：8/10
服務：8/10
抵食：8/10
平均每人消費：HK$440
餐廳資料：
聆渢咖啡廳 Cafe Lagoon
屯門青山公路1號黃金海岸酒店低層地下
2452 8448
沒有留言:
發佈留言