明星海鮮酒家：團年飯之便飯三寶餐

團年飯點少得自家屋企人架，因為人少少容易就，晌過年前求其搵日就得架喇，當便飯一餐。以往屋村對面間「名豪」未執，通常會行過去幫襯，因為佢哋對食完全無要求，最緊要都喺就腳方便。雖然佢哋要求唔多，但都想一家人坐得舒服食番餐團年飯，「明星」嘢食唔喺好，不過點都較附近啲大牌檔、中菜館環境企理、坐得舒適。

雖然年近歲晚，都無話要食指定賀年套餐或菜式嚟搶錢，仍然有啲精選小菜、合時小炒、優惠孖寶、三寶……等等。既然齊齊整整，又想屋企人食得好啲，所以揀個優惠三寶餐（有魚、有菜、有大元貝），再加埋細佬幾啱食嘅生炒骨，一個湯羹，半隻雞，我哋只喺得5個人，一定好夠食啦！ 

精選小菜、合時小炒……等等

優惠孖寶、三寶……等等

極品燒雞 $78（半隻）
落單無耐就可以上到枱，絕對喺整好翻炸嘅出品，還好嘅喺無想像中咁差，外皮依然都幾香脆，雞肉嫩滑講唔上，至少無到「乾爭爭」，還可以，「極品」？言重喇。

瑤柱珍菌浸時蔬（三寶餐之一）
時蔬喺菜心，搭埋瑤柱絲、菇菌，常見精選小菜菜式，唔喺什菜煲，就喺浸時蔬，幾款菜大包圍俾屋企人嘅穩陣菜式。個浸時蔬算唔差，雖然啲瑤柱絲就少啲，但起碼個上湯清甜有味唔會淡茂茂！

新鮮菠蘿生炒骨 $65
個餸名真喺寫明「新鮮菠蘿」，不過摷勻成碟菜，姑勿論菠蘿喺唔喺用新鮮貨，但搵唔到幾多粒，大部份都喺洋蔥同青椒。雖然問親細佬想食乜，佢就例牌話無所謂，但依道菜其實佢就幾鍾意食，酸酸甜甜好送飯；雖然無乜菠蘿，但洋蔥、青椒都爽甜，生炒骨亦算炒得不俗，唔喺太厚粉，甜酸茨都無嗆喉問題。

海皇豆腐羹 $98
中途嚟個湯羹，感覺都總喺無咁好。個海皇豆腐羹既足料又大窩，清甜鮮味，大概都分到成8碗之多，抵飲喎，喺餐飯嘅加分之作。

蒜茸蒸日本大元貝（4隻）（三寶餐之一）
個優惠三寶餐賣$328，除上面個瑤柱珍菌浸時蔬外，仲有依道蒜茸蒸日本大元貝及下面道清蒸沙巴龍躉。早前睇雜誌話依家好多新鮮大元貝（另叫扇貝，日本人就叫為帆立貝）都喺晌大陸養殖，佔全球產量超過一半，味淡纖維粗，但勝在夠平，幾十蚊一斤。搵得蒜茸蒸為求控制成本用大陸貨都唔出奇，反正普通人如我也未必食得出，始終蒜茸味濃比較搶，只可講話啲元貝肉大粒彈牙。

 清蒸沙巴龍躉1條（約1斤）（三寶餐之一）
沙巴龍躉屬海魚，如果野生一條都唔平，幾百蚊個三寶，相信就應該唔會野生。不過，睇落條魚就真喺足一斤，食魚就最好清蒸，食出其鮮味嘛，咁啲肉質又確喺幾鮮嫩，蒸得恰到好處。

白飯$10碗，茶芥每位收$11，另收加一服務費，埋單$720。食物、環境都OK，不過服務就真喺差啲。首先晌我枱附近個疑似知客嘅阿姐，舉手叫親佢佢就當睇唔到，叫佢幾次佢先搵其他侍應過嚟幫手；另外，上菜真喺求其兼亂嚟，上面所寫就喺當晚出菜次序，感覺就唔理三七廿一，有咩嘢就出咩嘢，但佢又唔喺催埋單趕你走喎。

個人評分
味道：7/10
環境：7/10
服務：6/10
抵食：7/10
平均每人消費：HK$145

餐廳資料：
明星海鮮酒家
深水埗大埔道168-178A號地下至3樓
2778 8138