美心西餅 Maxim's Cake Shop：「月」出越新奇

一年容易又中秋啦，仲有兩個星期左右就喺中秋節，依家啲月餅廣告宣傳真喺好厲害，早幾個月就有。最近，試咗兩款月款，不約而同都喺嚟自「美心」，一盒就朋友送嘅，知小弟喜歡試新嘢，就醒盒新品我試；另一盒就老婆公司送嘅，年年都喺送同一款，印象都俾咗有4、5年。

美心拔絲蓮蓉月餅

先介紹呢一款月餅先，因為都幾得意，包裝盒比較型格，黑底加上金線勾畫出蓮花圖案，再加啲彩線如水流般，睇落唔似月餅，有啲似高級嘅朱古力裝潢，用上紙盒製作，相對環保少少，易循環再做。

打開包裝盒，內有月餅嘅特色同建議食法，原來，唔建議就咁切開，反而，一掰、一拉，可以營造出拉絲嘅效果。

依家啲月餅都喺以迷你裝為主導，一盒共有8個，唔使一次食得太多，而且，獨立包裝已喺必然，耐放啲，又衛生啲。

「拔絲蓮蓉」4個字都算多筆劃，不過，月餅面上嘅呢4個字都做得清晰可見，而且，外皮都烘得金黃。建議食法嘅首要，就喺烘番熱佢，張簡介紙無寫，我哋估估吓就以多士焗爐750℃火烘佢5min，等啲餡心受夠熱。

熱烘烘嘅月餅，一掰、一拉，真喺做出絲絲相連嘅效果，可能焗完未攤得夠耐，餡心未軟透，拉絲效果未夠強勁，不過，軟滑嘅餡心已非常好食，可以講喺有濃濃嘅蛋黃香，又有清甜嘅白蓮蓉味，最得意喺外皮仲嗒到有啲花生粒碎碎，真喺既有香氣、又富層次。

美心低糖蛋黃白蓮蓉月餅

相對盒「拔絲」，賣相就比較「月餅」樣，一身橙紅色鐵盒，亭臺樓閣配荷花，帶中國色彩之餘，透過鮮艷嘅色彩配搭，雖然喺黃昏景致，但帶嚟一份活力感。

唔只盒面印住「低糖」，更喺盒角大大隻字標示含糖量低於5%。

一盒共有6個，均以獨立包裝處理，衞生方便。順帶一提，近呢一、兩年嘅月餅，已少咗奉送啲膠刀、膠叉，對環保方面又再進步。

月餅面印壓住「美心低糖」，同樣喺筆劃多，但字紋壓得非常清晰，一樣烘焗得金黃均勻。

個低糖蓮蓉月水準依然，皮薄而平均，白蓮蓉好軟滑，最正喺個鹹蛋黃流晒油，的確，食落真喺少甜好多，尤其對比起件拔絲蓮蓉月餅，甜度明顯低好多，搭杯熱茶，喺下午茶嘅好拍檔。

今次品嚐嘅兩款月餅，都可謂各有特別色，多謝老友，亦多謝老婆公司，等小弟預早應吓節。

個人評分
味道：8 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
美心西餅 Maxim's Cake Shop
深水埗深旺道28號V Walk 2樓25號舖
2788 2313