太平洋咖啡 Pacific Coffee Company：貪「桃」安逸

最近，因事趁食晏時間行到過嚟中上環嘅海港政府大樓一趟，要等一段時間先攞得番件文件，所以，穿天橋過到嚟華懋廣場二期搵間餐廳打打躉。一落天橋，正正門口位就有間咖啡店，原來喺Pacific Coffee，真哋認佢唔到。

平常見慣嘅Pacific Coffee都喺一室以深紅為主調，然而，呢間則以全新面貌，以純白為主調，而且，無咗啲大大張嘅梳化椅，感覺似喺走簡約嘅北歐風，環境變得柔和愜意，予人感覺輕省悠閒。

另一不同之處，喺佢哋嘅櫃枱採開放式，同咖啡師嘅距離更近，除可以清楚睇到佢哋點沖泡、製作咖啡之外，亦可以更易同到佢哋交流。

而晌收銀旁，就放咗一系列、多元化嘅美食，有各式各樣嘅包點、沙律及三文治……等等。

本來想飲番杯至愛嘅熱鮮奶咖啡，不過，啱啱晌收銀機前嘅顯示器打出新產品「粒粒白桃系列」，外間天氣又咁熱，轉轉口味，一於暫時「桃」出悶熱天氣。

粒粒白桃朱古力咖啡 $43

兩款新品中，以朱古力咖啡合我心水啲，而且，過往都不時有試Pacific Coffee嘅出品，都知道佢哋用啲農地直購嘅靚豆，沖泡出嚟嘅咖啡好唔錯。打開杯蓋，清新嘅白桃粒粒浮於如雲朶嘅鮮忌廉之上，晌炎夏之下，感覺特別治癒。而今次嘅朱古力咖啡亦出色，朱古力跟咖啡嘅味道幾平衡，唔會話邊個味冚咗邊個味，入口更喺涼透心；待面頭嘅鮮忌廉融入咖啡中，更添柔滑，之後，可再細味清甜嘅白桃果肉（沉晌杯底有好多架）。

飲完杯凍飲，再過返去拎文件，時間就啱啱好。識我嘅朋友都知小弟份人hea hea哋，雖然，未至於得過且過，但做事都喺捨難取易，何必過於太過辛苦，正所謂吊頸都要抖吓氣，一杯美味嘅凍飲，真喺幾好嘅抖吓氣。

個人評分
味道：8/10
環境：8/10
服務：8/10
抵食：7/10
平均每人消費：HK$43

餐廳資料：
太平洋咖啡 Pacific Coffee Company
中環干諾道中68號華懋廣場二期1樓3號舖
2824 3968