湕承 · 台式便當 Kinshing TW Food：「承」意便當

代公司過嚟金鐘政府合署辦點事，之後，偶然晌海富中心發現二樓一角有多家外賣小店，其中一家叫「湕承」，主打賣台式便當，一來有啲興趣，二來即時睇睇啲食評，又好似幾OK喎，所以，就順道買咗個便當返去試試。

鋪頭旁嘅牆身印有一個大大餐牌，有烏冬、肉燥飯、台式小食及飲品，不過，無特別影低，因為晌鋪前，有塊黑板列出「是日精選」，簡簡單單晌呢部份揀就可以喇。有3款菜式可供選擇，當中可配白米飯、烏冬、米綠、新竹米粉，揀湯燉或乾拌都得，並奉送一客小食或飲品，均一價賣$68，以金鐘區而言，定價都差唔多啦！

雖然外賣盒喺用上可分解嘅大紙盒，叫做較環保，始終，面蓋都喺膠嘅，外賣點都多咗幾件垃圾，不過，無辨法啦，呢類喺外賣店嘛，都無堂食。

慢煮豬軟骨‧香菇貢丸‧滷蛋肉燥飯 + 熱紅棗桂園茶 $68

揀咗豬軟骨，都喺喜歡食肉多啲，而件豬軟骨都好大件，經過慢煮，肉質極之鬆化，香而不膩；香菇貢丸都好正，咬落好爽口，又有菇香；此外，餸料仲有台式滷蛋、雪菜、青瓜粒，配菜豐富，佐飯亦好好食。

而肉燥飯喺裝晌另一個圓盒，所以，飯量十分之多，一定食得飽人。肉燥亦做得相當有水準，帶微甜，卻好惹味，而且，亦唔覺得太油膩，撈飯真喺就咁食都食到成碗。

餐飲因應天氣仲喺寒寒哋、乾乾哋，就要杯熱嘅紅棗桂圓茶嚟潤一潤。茶色深沉，而入口紅棗及桂圓的味道都算突出，桂圓味就更有種清甜感，所以，飲起嚟感覺好滋潤。

食完個便當，都真喺覺得店家做得有誠意，都唔會馬馬虎虎，而且，落單時店員見我好似好疑惑，都會詳細解釋吓個餐牌，其實就無咩疑惑，只喺自己心大心細唔知揀邊款嘢食好啫。

個人評分
味道：8/10
環境：6/10
服務：7/10
抵食：8/10
平均每人消費：HK$68

餐廳資料：
湕承 · 台式便當 Kinshing TW Food
金鐘夏慤道18號海富中心2座2樓98舖
3619 7067