Sweetscoop：古早三色刨冰

完咗大澳行程出返東涌，難得入到嚟，咪晌東薈城打個轉囉，嘩，實在太多人，草草行完就算。臨尾上咗大食代望一望，老婆建議食碗糖水先走，所以，就晌Sweetscoop睇睇有無心水，見佢話全新推介個夏日特大刨冰，共有6款：芒果刨冰、蕃薯刨冰、奇異果刨冰、鮮果雙拼刨冰、紅豆刨冰同古早三色刨冰，即管叫一份試試。

正記：景正．豆花平平

國慶日，太太教會搞咗個大澳大旅行，人強馬壯百幾人，包晒車往返（回程東涌解散），晏晝安排晌大澳福滿林酒家食個特惠旅遊團體餐（因當時有啲唔方便，無影相，食評就無謂寫喇，不過總結幾句，碟頭大，份量足，價錢平，質素中等，算抵食），7餸1湯白飯任裝食到飽。期間節目跟大隊行山又得，閒遊大澳市集又得，走去警署舊址大澳文物酒店都得，總之悉隨尊便自由行，想點就點。

早上跟大隊行山，回程逛遊市集，果然有好多地道小食，例如碳燒扇貝生蠔、蝦豬餅、茶果……等等，如非一個鐘後就食晏，「掃街」都可以食個飽。不過，今日天口仍然頗熱，行完山又有點累，最好搵個地方歇歇腳，可以坐下，又可以食少少唔飽肚嘅小食，撞啱「正記」，又有棚屋尾後嘅半露天位，一於入去打打躉唞一唞。

假日嚟喎，何解咁靜？

又一間餐室 Mo-Ikken Cafe：食餐晏．馬來咖喱滑雞飯

平時，返完自己嗰邊教會，都會同啲會友仔落去太子食飯，但因為早前好友阿志買咗車，我哋一班「美孚友」就完咗崇拜驅車返回美孚先食，等我哋慳番程車錢之餘，提升佢架車嘅載客量，哈哈。

第一次晌食晏時段嚟幫襯，之前兩次都喺食夜晚，一樣唔少客喎。因為我哋大人連細路都成6個人，所以要拍枱都等咗10多分鐘。入到去個感覺有啲唔同，裝修無變，但好似大咗，再望真啲原來最入面幅牆無咗大半截，跟鄰鋪賣和食嘅「惠比壽居食屋」打通晒，而且兩邊食物可以互叫，即喺晌又一間可以叫隔離鋪嘅壽司、拉麵……，晌惠比壽又可以叫杯咖啡、三文治……，問問侍應原來兩間鋪都喺同一個老細，如果喺咁就應該一早打通佢增加協同效應啦！

Deli and Wine：鮮蝦先賣

老婆加班，當然懶煮出街食，醒起手上仲有啲用信用卡積分換嘅美心集團現金券，當然盡快用，唔使記掛晌心，萬一過咗期就唔抵啦！因為啲現金券又唔喺好多錢，近期去多咗美快MX食早餐同下午茶，唔多想連晚飯都幫襯佢，想起集團旗下晌文化中心嘅Deli and Wine，一直都有想去試嘅意思，因為好評持續高企，但總喺遺忘咗，今晚就下定決心一試多人稱讚嘅「常餐」。

磯陣：想食就食

老婆一向鍾意晌屋企煮，突然話想請我食番餐，指明食日本嘢，無話咩特別原因，小弟就梗喺點頭話好啦。其實想食日本嘢，依區唔少選擇，仲有羽壽司、御．上澄，不過已經試過，質素麻麻，翻兜機會好微；另外八佰屋、友樂亭依兩間「老店」，閒時經過幾人氣，應該有質素，不過價位屬中高，但有打算今年內試埋佢；既然喺老婆付鈔，就唔想食太貴，所以，搵晚姨仔舅仔都唔返嚟食，得我倆公婆，收工返到美孚，揀嚟磯陣食日本嘢，因為之前食過覺得質素唔錯，況且價位比較相宜。

唯一麵家：速食便餐當午飯

星期六，唔使返工，輕鬆輕鬆走去睇吓戲就最好架喇，揀去The One嘅百老匯，地點較就腳下一場節目。因為今朝喺屋企煲粥食，都食得幾飽吓，所以去到午飯時間都仲未見肚餓，不過由於場戲開1:15pm，睇完成3點半有多，捱完餓又好似唔喺幾好，所以趁有半個多小時，就去附近嘅飯堂「唯一」，速食一餐簡便午飯。

純為墊一墊肚，所以食乜唔多考慮，就叫慣常食嘅同最鍾意食嘅，就喺鹹豆漿、凍豆漿同北京餡餅！

王家沙：小組滬菜小飯局

團契細胞小組唔太齊人，但部份人都想盡量聚一聚，所以簡單啲就晌星期日完咗崇拜後上又一城食餐飯，講講近況、講講家庭。雖然又一城食嘢唔平，不過一來近我哋嘅教會，二來有寶寶室，對有小朋友嘅組員會方便啲，就喺咁我哋3家人一行9個（6大3細）揀咗王家沙。

門外有三幾個人正等位，我哋人多要大枱搵位較難，幸好有光哥一家打頭陣先過嚟攞位，因為星期日午飯時間都幾多人晌又一城搵食。

Pi Hot Dog Gallery：熱狗Pi的芝味漂流

荃灣喺小弟同老婆晌星期日搵食嘅熱點，好多時候都唔會話食貴嘢，幫襯小店居多，依餐返完教會後嘅「晏仔」，就選址於阿Pi，就喺隱於華都中心嘅Pi Hot Dog，唔喺講套戲（少年Pi的奇幻漂流，套戲睇過，個故仔又真喺幾奇幻，而有啲場景拍得認真好靚）。之前去荃豐、華都、荃昌依幾個串燒商場食嘢時，都有留意過依間Pi，裝修摩登簡約，門面裝晒燈光招牌，晌個商場內佢算非常搶眼。但喺當時經過見人多未有幫襯，等近日「人潮」稍退先嚟幫襯，再者，現有多篇食評做參考，可部署吓食乜好。

IKEA Café：宜家要忍忍手好

最近屋企張梳化層面皮猛咁甩，越嚟越肉酸，一心都打算要換，不過行咗好多地方都未有心水，所以再過嚟宜家碰碰運氣，希望睇到張合眼緣，又唔太貴嘅，好了結咗件煩事。可惜，最後，都喺睇唔啱梳化，但就食咗餐飽嘅先走。

宜家家居嘅咖啡室一向都好多人捧場，除咗以前貪口痕試過佢啲熱狗同爆谷外，真喺未有一次正式幫襯，今回都喺第一次，坐定定試佢啲出品。

Simplylife Bakery Café：簡單人生．唔簡單生日飯

又輪到教會團友咖喱嘅生日，佢倆公婆搭小弟倆公婆，約埋食番餐賀一賀，地點喺又一城嘅Simplylife Bakery Café，因為經過好幾次，見有幾多人排隊，心想應該有一定質素。不過，訂唔到位，本打算早啲去攞位，因為問過閒日夠早會未有人排，但喺溝通上出咗少少錯，結果要大家一齊排咗成個鐘先有得食，認真唔好意思。

悅來酒店咖啡室 Panda Café：為食熊貓

有食開自助餐嘅人都知今時今日食一個自助晚餐咩價，唔好講話咩特別節日或星期五六日，就算平日食番個似樣啲嘅，三幾百都只喺基本入場費，食好少少嘅閒閒哋都要四百過外。如果我話今晚所食嘅自助晚餐只喺$150，估計都唔多人信，但事實如此喎。可以平到咁只因太太教會一年一度為有份事奉嘅人搞個大聚餐，地點喺荃灣「熊貓」酒店，出席我想大人細路加加埋埋都近成百人，所以你話幾咁墟撼呀！

餐廳正正做緊「國際滋味自助晚餐」，即刻無主題，乜都有，6:00-9:30pm，比一般自助餐早半個鐘，成人正價每位收$328，指定信用卡有85折，加番一拉勻三百鬆少少。其實個環境都唔錯，樓底夠高，闊落開揚，大枱細枱都安排到，人多人少都唔怕，而且皮櫈高椅背，坐落頗舒服。如果想私隱度高啲，近門口有幾張馬蹄形梳化可供考慮。

彩晶軒：久違廠友

計起嚟，彩晶軒確喺幫襯較多嘅集團式嘅酒家，飲早茶，晏晝飯，食夜晚都幫襯過，幾次嘅觀感都幾好，否則都唔會仲有幫襯啦。

一班以前晌製衣廠做嘅老友，隔一、兩年又會出嚟飯聚，就大部份人都會揀番晌觀塘食，無嚟幾年，依區又變化好多。事前訂位，原屬去apm，不過好多心水餐廳都撞板，一喺就分兩輪時段，一喺就限時交枱，結果就搵到開源道鱷魚恤中心嘅彩晶軒，又唔分時段又無限時，絕對啱我哋慢慢食慢慢傾。

其實有幾款菜式之前食過，打算喺心水推介俾大家，可惜似乎又唔多啱佢哋口味，故此，就等佢哋下決定，小弟就輕輕鬆等食，哈哈！

Sammi Pasta：失味意粉

荃灣嘅Sammi Café兩年幾前因朋友介紹，幫襯過一次，雖然有幾多好評，但我食嗰次都喺俾個OK佢，印象唔差亦唔喺好。今次再幫襯就喺佢嘅姊妹店Sammi Pasta，事緣星期日返完老婆教會，同幾個會友一齊食晏，當中約翰兄有好介紹，就喺Sammi Pasta！

飯市時門口都堆咗幾多客