Sammi Pasta：失味意粉

荃灣嘅Sammi Café兩年幾前因朋友介紹，幫襯過一次，雖然有幾多好評，但我食嗰次都喺俾個OK佢，印象唔差亦唔喺好。今次再幫襯就喺佢嘅姊妹店Sammi Pasta，事緣星期日返完老婆教會，同幾個會友一齊食晏，當中約翰兄有好介紹，就喺Sammi Pasta！

飯市時門口都堆咗幾多客

荃昌中心大部分食肆都喺鋪位細細嘅小店格局，Sammi Pasta都唔例外，我哋都喺被安排「走廊」位，即喺鋪外嘅商場通道位，因為晌依度比比皆是，所以又唔喺咩奇景。但為求做盡生意，枱櫈安排逼啲在所難免，不過幫襯嘅絕大多數都喺後生仔，所以都無乜所謂。

食物方面，分基本餐牌同精選午餐，前者有特色意粉選擇（每款$40）或沙律（每款$45），包忌廉濃湯及冷熱餐飲一杯，而所謂特色意粉喺不同主材料配唔同嘅意粉，做到自己心水組合。至於後者，5選1，有焗飯、意粉、沙律，同樣包忌廉濃湯及冷熱餐飲一杯。

粟米忌廉湯

粟米打得好溶，一啲粟米纖維都了無痕跡，如果唔喺呷落有啲粟米味真喺估佢唔到喺咩湯。雖則自稱為濃湯，不過講到粟米味，未有期望中強烈，質感倒還可以。

蜆肉三文魚天使麵

依個喺特色意粉系列之一，主材料一共有8款選擇，如意式肉醬、煙肉茄子、沙樂美腸磨菇……，而意粉則有5款可揀，如天使麵、蝴蝶粉、扭繩粉……。老婆對天使麵情有獨鍾，所以揀蜆肉三文魚搭天使麵，天使麵比較味淡，但仍保持柔韌，無煮過籠。蜆肉同三文魚份量唔太多，算喺適中，味道亦叫過得去，因為蜆肉唔會好似食香口膠咁。

忌廉汁海鮮焗扁意粉

精選午餐系列之一，原本喺配飯，因為賣晒飯，改咗扁意粉，仲啱我呀！不過，極之可惜，個扁意粉絕對喺焗過籠，有啲直情焗燶晒，但喺個店員照俾我，完全無問我介唔介意，所以服務依環一定要扣分。而質素又點呢？海鮮料有魷魚、蝦、蜆肉，較為碎濕濕，忌廉汁亦都稍為淡口，面面焗燶嘅扁意粉口感自然大打折扣，而底下其餘扁意粉其實煮得唔錯。

比吉打豬柳扁意粉

另一款精選午餐之一，幾款意粉以依個比吉打豬柳較好，上面都講過佢啲扁意粉無失手下其實煮得唔錯，煙韌有咬口。而豬柳一共有兩件，每件都有手掌大細，幾軟腍又帶點香脆。伴菜喺烚椰菜絲，充其量叫做健康啲，但無乜提高食慾嘅吸引力。

凍咖啡

餐飲要冷要熱都得，唔使額外加錢，大大方方。糖水同牛奶都自行加多加少，咖啡味道香得嚟唔覺滑，個人覺得喺不過不失之作。其他人飲咩？都喺檸水、檸茶咁囉！

諗住店名叫得Pasta，專注做意粉，應該對主打嘅意粉甚有自信，水準會喺不賴，試過今次都只可勉強俾個OK佢，希望小店繼續努力！

個人評分
味道：5/10
環境：5/10
服務：3/10
抵食：5/10
平均每人消費：HK$40

餐廳資料：
Sammi Pasta
荃灣西樓角路202-216號荃昌中心昌寧商場1樓49號舖
 2414 7779