豬屋日本料理 Pig House Japanese Restaurant：共「豬」同好

晌上水嘅食評可謂廖廖可數，難得今次又喺入嚟上水同老死踩單車，踩完都已經6:00pm，就打算一齊食埋個早鳥晚飯先走。由在地老死帶路，嚟到「豬屋日本料理」，佢話間嘢平靚正，性價比高，望見啲便當就好眼熟，原來年初就幫襯過美孚分店。

地方唔太大，枱櫈排列都用盡樓面每吋地方，左右兩邊喺卡位，中間就喺４人枱。而整體裝修平實，牆上就貼滿唔少食物介紹嘅海報。

我哋嚟得早，未喺晚市尖峰時段，但兩邊卡位已經坐滿唔少客。醬油碟、調味料、筷子、牙簽就放咗晌枱上，自由取用。

食物方面，有刺身丼、豚肉便當、雞雞雞便當、特鮮便當、期間限定、飲品、甜品……等等，可謂選擇多多，又有好多加配優惠。

三文魚味噌湯 +$7

小弟叫咗個魚生丼，本身就包味噌湯，而老友叫嘅便當，就可以加配一客三文魚味噌湯，個味噌湯做得有水準呀，鹹香適中，濃而不濁，裡面有唔少油潤嘅三文魚同昆布，夠晒足料。

北海角切雜綿魚生丼 $78
我就怕便當太大份，所以，一碗魚生丼就好足夠了，雜綿魚生丼賣相色彩亮麗，有三文魚、油甘魚、鮑片、蟹籽、熟蛋粒、青瓜粒……等等，口感豐富，魚生味道鮮甜，加上日本米粒黏糯好食，食完就發覺份量都好十足。

薩摩便當 $112

佢哋便當款式真多，睇到眼花潦亂，老友最好牛，又睇見呢款標示人氣，就選上試試看。奉到上枱，真喺好大份、好豐富，包咗鹽燒安格斯封門柳、七味燒豬頸肉、挪威三文魚壽司、味附螺肉、咖喱飯，改選多飯，真喺勁多飯。封門柳煎得剛好，既有肉香，又腍滑，豬頸肉口感爽脆，三文魚壽司好油潤，螺肉好有咬口，而日式咖喱帶點甜味，用嚟拌飯向來都無得輸。

荔枝蜂蜜鴨屎香茶 +$12

飲品可以加配，而加配一杯要$12，加配兩杯要$20，當然加到兩杯啦。睇落平平無奇，實際飲落好有荔枝嘅清甜香味，加了蜂蜜令甜味自然，個茶底亦都醇香。

再幫襯，雖然唔同分店，但質與量都無欺場，加上卡位坐得舒服，嚟得早客人又唔多，招呼亦好唔錯，喺好稱心嘅一餐飯！

個人評分
味道：9/10
環境：8/10
服務：8/10
抵食：9/10
平均每人消費：HK$120

餐廳資料：
豬屋日本料理 Pig House Japanese Restaurant
地址：上水馬會道170號地舖
電話：2889 6079