一班以前晌製衣廠做嘅老友，隔一、兩年又會出嚟飯聚，就大部份人都會揀番晌觀塘食，無嚟幾年，依區又變化好多。事前訂位，原屬去apm，不過好多心水餐廳都撞板，一喺就分兩輪時段，一喺就限時交枱，結果就搵到開源道鱷魚恤中心嘅彩晶軒，又唔分時段又無限時，絕對啱我哋慢慢食慢慢傾。
其實有幾款菜式之前食過，打算喺心水推介俾大家，可惜似乎又唔多啱佢哋口味，故此，就等佢哋下決定，小弟就輕輕鬆等食，哈哈！
澄海老四冰鎮鵝肉卷 $48唯一佢哋接受小弟推介嘅冷盤，以鹵豆腐皮包住鴨絲、甘筍絲、芹菜絲……，以煙燻代蒸，濃香嘅煙燻味，又冰冰涼涼，內裡帶少少爽口，喺一道有個性嘅冷盤小食，最緊要大家都話好味。
佛山自家分蹄 $38雖無特別，但算喺一道穩穩陣陣嘅餐前小食。
左宗棠手拍小青瓜 $38「手拍」就明顯唔喺，條條切得「齊輯輯」兼排得整整齊齊，不過，勝在青瓜仔食落非常爽脆，有點點蒜頭香。
例湯:：猴頭菇煲豬展 $68是日例湯喺猴頭菇煲豬展，一窩分到7碗左右，睇湯渣足有兩大舊猴頭菇，落料都算足。味道其實無咩特別，只喺廣東人總喜歡飲飲老火湯啫。
乾清宮保甜酸明蝦球 $98泡好嘅蝦球配以西芹、青椒、木耳同炒，蝦球非常爽口彈牙，雖然甜酸味唔太突出，但喺就幾有辣勁。幾款料頭都喺爽脆嘢，木耳較為好食！
紅樓雪菜毛家竹笙燜豆腐 $78豆腐先泡油再燜，內裡好嫩滑；而竹笙嗦咗茨汁，頗入味；最可惜喺整道菜過鹹，相信唔關加咗雪菜事，因為下面個炒年糕都有用雪菜，但就無過鹹情況出現，估計都喺大廚下鹽重手咗。
玉露凝脂上湯霸王雞 $110（半隻）叫得「霸王雞」，心想有番咁上下睇頭，但真喺估唔到咁細得可憐，睇相你就見，半隻仲要賣成$110。佢哋喺咪應該搵隻細啲合比理嘅碟呢？唔使睇落隻雞更細，仲要伴住啲咁大條嘅芥菜胆添。還好嘅喺隻雞肉質嫩滑，否則就呻笨喇！
八月黃桂花蚌炒年糕 $78以熱窩盛上，時刻保持住啲年糕熱度。炒年糕加咗少少雪菜、辣椒絲，少少惹味，而年糕口感煙韌，整體味道唔錯。桂花蚌又喺白雪雪，混晌啲年糕中變得唔喺好覺，其實都唔算少，質感頗爽身。
以中式酒樓計，甜品、糖水一環都較忽略，但彩晶軒屬於少數會提供多樣化甜品嘅酒家。甜品紙一共有成12款之多，仲要唔喺紅豆沙、綠豆沙、芝麻糊之類普通嘢。再者價錢平到你唔信，仲平過去糖水鋪，不過唔好開心住，查實份量超迷你，可以稱得上一口甜品。
法式焦糖燉蛋 $10較重蛋味，奶香略嫌輕手，而焦糖效果喺有嘅，但無脆糖嘅質感。
不一樣心太軟 $12據有份食嘅老友講，流心效果久奉，焗過籠，但朱古力味夠強幾濃，當朱古力蛋糕嚟食都唔錯。
楊枝甘露 $12小弟揀嘅喺楊枝甘露，西施柚肉較為碎濕濕，汁底方面奶味重而冚過晒啲芒果味，所以$12雖平，但唔叫抵食。
果盤彩晶軒有樣嘢好，就喺食晚飯送果盤，仲要唔喺「求其」俾啲西瓜、橙之類，今晚就有菠蘿、西瓜同哈密瓜，菠蘿喺新鮮貨色，西瓜同哈密瓜就去晒皮，依個傳統值得保持。
個人評分
味道：7/10
環境：7/10
服務：8/10
抵食：6/10
平均每人消費：HK$140
餐廳資料：
彩晶軒 V Cuisine
觀塘開源道79號鱷魚恤中心7樓
2739 8333
沒有留言:
發佈留言