王家沙：小組滬菜小飯局

團契細胞小組唔太齊人，但部份人都想盡量聚一聚，所以簡單啲就晌星期日完咗崇拜後上又一城食餐飯，講講近況、講講家庭。雖然又一城食嘢唔平，不過一來近我哋嘅教會，二來有寶寶室，對有小朋友嘅組員會方便啲，就喺咁我哋3家人一行9個（6大3細）揀咗王家沙。

門外有三幾個人正等位，我哋人多要大枱搵位較難，幸好有光哥一家打頭陣先過嚟攞位，因為星期日午飯時間都幾多人晌又一城搵食。

食物方面有咩揀？兩張A4呎吋點菜單就一眼睇晒，分類包括：涼菜、點心、湯羹、小菜、蔬菜．豆腐、飯．麵．年糕、魚翅．烏參．鮑魚、甜品、飲品等，好似啲點心紙咁照剔，減少叫錯嘅情況。因為都只喺食餐晏，小朋友又多，貴嘢就排除以外，都喺叫吓點心、小菜、飽肚嘅麵食之類。

先嚟點心，一共有成30款供選擇，都喺上海特色嘢，分別叫咗4款：

蘇式鮮肉小籠包 $32
一籠有4件，何謂「蘇式」，侍應嘅回答就喺話淨肉。小籠包嘅底皮就好薄，但摺位較厚，所以令到包面嘅皮變得稍厚，未能透出內裡湯汁，亦影響整體口感。既然喺淨肉餡，做到肉鮮、汁多，總算扳回唔少分。

鮮菜肉小籠包 $32
試咗個淨肉，就要試埋個菜肉，同樣一籠4件，餡料由豬肉跟紹菜做成，肉餡唔肥，都喺講求健康嘅世代減少肥豬肉比例，但質感仍然鬆軟，唔錯！

王家沙牛肉餅 $32
牛肉餅外皮比較厚，牛肉餡亦偏少，雖然煎得蠻香，但跟晌尖沙咀「唯一」食到嘅北京餡餅，就真喺技術性擊到喇。雖然小弟仲未試過清真牛肉館嘅牛肉餅，因為甚少踏足九龍城，但唯一嘅北京餡餅已好能夠滿足我，因為餡餅底面香脆、餡料十足、肉汁充沛。王家沙嘅牛肉餅，改善空間絕對超大。

炸饅頭 $20
愛心媽媽阿Wing，專燈點啲炸饅頭俾啲細路仔食，總好過炸薯條啦。一客有6粒，其實我都幾鍾意食，蒸或炸我都OK，當然炸就香口好多。小弟都算嗜甜之人，蘸煉奶喺要蘸得滿滿先擺休，單睇外觀就知啲饅頭炸得好平均，色澤金黃，饅頭心好鬆軟綿綿，雖然喺平價嘢，估唔到幾款點心佢最得我歡心喎。

點心以外，我哋仲嗌咗幾道小菜，份量都喺的的骰骰。
上海話梅骨 $72
雖則一碟份量唔多，但粒粒小排骨沾滿話梅醬，惹味得嚟，酸甜有緻，又唔嗆喉，餸飯、淨食都得。

瑤柱賽螃蟹 $66
加入咗瑤柱為升級版少少嘅賽螃蟹，不過瑤柱碎碎唔多，觀感上唔明顯；然而手勢紮實，蛋白炒得頗嫩滑，再將蛋黃打開撈勻，加點陳醋，味道多咗幾分層次，唔會食落好寡。

糟溜魚片 $72
魚片做得非常滑溜，帶有少少酒糟味，就算唔好酒嘅人，相信都應該接受到。而配菜嘅木耳好大塊，咬落挺爽口，跟魚片一黑一白，相映成趣，值得推介嘅菜色！

雪菜毛豆百頁 $54
雖為小菜，但屬蔬菜．豆腐類一欄。雖然加入咗雪菜，整體味道都比想像中清淡，原因喺雪菜加得唔多，較為點綴性。而毛豆質感粉粉，實質都只喺有啲清草味，反而啲百頁有趣啲，長長粗粗，口感有少少爽，但豆味濃度有中上級別。

食完幾款小菜飽肚程度都有番咁上下，所以臨尾墊肚嘅粉麵飯就唔打算叫得會太飽肚嘅嘢，最終決定揀來兩碗湯麵。查實佢哋嘅粉麵有好多選擇，如：鍋巴、菜飯、兩面黃、炒年糕……等等。

雪菜肉絲湯麵 $40
賣相平實，上海湯麵配以雪菜同肉絲，無驚喜，亦唔叫失望，只喺較為清清哋，啱小朋友食所以先叫啫。還好嘅喺麵條咬落有韌勁，又拉得幼細，賣到成$40一碗，晌又一城個場唔叫得貴，但個人覺得晌度食始終唔太划算！

嫩雞煨麵 $42
另一碗嫩雞煨麵，睇樣幾對板，湯色奶白滲出少少鹹香；煨麵喺上海菜獨有嘅煮麵方法，一般湯麵就先搵大滾水淥煮再加入上湯，煨麵就將啲麵同肉湯一齊煮，麵條吸味更強。個煨麵煮得頗滑溜，可恨嘅喺青菜跟雞丁都喺偏少，之前晌美孚小店滄浪亭食過嘅嫩雞煨麵，湯味比依度更濃，但雞丁又喺得好少，嫩雞煨麵嘅亮點喺啲湯，嫩雞變成「大茄」！

甜品
奶黃小麻球 $28
見個名幾得意，想知喺乜，所以點咗一客嚟試試，啊！原來喺加咗奶黃餡嘅煎堆仔。煎堆仔渾圓沾滿白芝麻，咬落幾香口，外層又帶點脆身，不過外皮有點厚，而奶黃餡唔夠軟滑，否則應該幾好食。

豆沙窩餅 $36
靚媽阿Wing指定點嘅，因為一對仔女喜歡食，當然小弟對甜品一樣喺來者不拒啦。外皮炸得甘香，但略嫌厚身，無咗脆口感，相反又多份煙韌感，另外豆沙餡下得唔少，味道又幾清甜，作為人多易分享嘅甜品，豆沙窩餅都算喺一個理想之選。

有小朋友同枱食飯都喺麻煩啲，真喺辛苦晒幾位媽咪、爹哋，幾位細路都算乘，無搞事。最後埋埋單計計數，除茶位每位收$4之外，小食花生$10一小碟，不過睇單見佢哋只收7個人茶錢，應該無計坐BB櫈嗰兩個B仔，又算幾勻真有人性化。

個人評分
味道：8/10
環境：6/10
服務：6/10
抵食：8/10
平均每人消費：HK$105

餐廳資料：
王家沙  Wang Jia Sha

九龍塘達之路80號又一城 G23鋪
2265 8488