星期六，唔使返工，輕鬆輕鬆走去睇吓戲就最好架喇，揀去The One嘅百老匯，地點較就腳下一場節目。因為今朝喺屋企煲粥食，都食得幾飽吓，所以去到午飯時間都仲未見肚餓，不過由於場戲開1:15pm，睇完成3點半有多，捱完餓又好似唔喺幾好，所以趁有半個多小時，就去附近嘅飯堂「唯一」，速食一餐簡便午飯。
純為墊一墊肚，所以食乜唔多考慮，就叫慣常食嘅同最鍾意食嘅，就喺鹹豆漿、凍豆漿同北京餡餅！
鹹豆漿 $13
老婆嘅「飛弗」，因為佢唔太鍾意飲凍嘢。鹹豆漿個樣雖然幾樣衰，但勝在料多有內函，真喺「我很醜，但我很溫柔」，溫喺指佢唔太熱，好「溫輕」，溫度啱啱好，唔使等即可入口，而柔就指啲豆花滑滑柔柔。配料仲有蔥花、油炸鬼、蝦米仔，鹹鹹香香，營養豐富又有口感，水準絕對保持到。
凍豆漿 $10
食熱辣辣嘅北京餡餅，小弟都喺鍾意襯凍豆漿多啲。佢啲豆漿唔多講喇，夠晒豆味濃郁又冰凍，總多過飲汽水啦！
北京餡餅 $12
唯一都有幾多遊客嚟幫襯，我偷望過佢哋啲旅遊書，北京餡餅真喺當「唯一」名物咁介紹，確實，佢啲餡餅真喺做得幾出色，賣咁嘅價，晌尖沙咀咁貴租地段真喺抵到爛。餡餅新鮮即做，由生煎整成，底面皆香脆，內餡以手刴牛肉加上大量蔥粒做成，鬆化而爆汁，所以稱得上喺抵食兼好食！
唯一，或者就喺尖沙咀唯一平靚正之選。
個人評分
味道：8/10
環境：5/10
服務：5/10
抵食：9/10
平均每人消費：HK$18
餐廳資料：
唯一麵家
尖沙咀厚福街10號地下
2311 1498
沒有留言:
發佈留言