首爾飯盒 Seoul Dosirak：拿「首」好嘢

雖然大多數都慣晌屋企煮，但偶爾都會貪方便買外賣返去食，今次就介紹一下呢間韓國菜小店「首爾飯盒」，因為真喺做得有質素，加上就晌地鐵出口隔離，非常方便。

環境晌門口已一眼睇晒，雖然主打喺做外賣，但亦設有兩個高腳位，堂食都可以，不過，我哋就一於買返屋企，開住冷氣，慢慢嘆。此外，亦睇得出鋪面乾淨企理，做飲食，最緊要喺講衛生。

鋪仔細細，估唔到選擇都幾多，有腐皮壽司、紫菜飯卷、韓式湯品、韓式蓋飯、韓式拌飯、韓式便當、炸雞、韓式小食……等等，凍櫃內仲見到有啲罐裝韓國果汁售賣，定價亦相宜。

因為真喺幾抵，一口氣買咗炸雞、飯卷、蓋飯同炒粉絲，啲包裝幾好，啲紙碗夠硬淨，膠蓋吸得夠穩，蓋飯又分開兩陣嚟放，而且，每樣嘢食都份量好足。

蜜糖牛油炸雞 $60

炸雞有6款口味選擇，亦有唔同份量可揀，甚有彈性，小弟就揀咗細份量嘅蜜糖牛油口味，志在過過口癮。打開一睇，炸得一身金黃，甚為吸引，最估唔到拎到返屋企都仍然好脆口，少少蜂蜜嘅清甜味，又滲出少少牛油嘅鹹香味，最好喺無骨啖啖肉，肉質亦都幾嫩滑，食得夠過癮。

蔬菜紫菜飯卷 $48
韓國嘅紫菜飯卷跟日式嘅壽司卷好唔同，雖然外觀類似，但唔會好似日式咁搞咁多花款，好似呢款蔬菜紫菜飯卷，屬傳統口味，就捲住青瓜、煎蛋、醃蘿蔔、甘筍絲，捲得好紮實，口感清爽，味道清新，全素，更喺健康之選。。

韓式炒粉絲（含有牛肉）$65

對韓國炒粉絲情有獨鍾，當然，佢哋嘅粉絲同我哋嘅粉絲好唔同，粗身好多，煙韌好多。加埋大量洋蔥、甘筍絲、牛肉一齊炒，入口粉絲煙煙韌韌索滿汁，又帶少少麻油香，牛肉入味又嫩口，真心唔錯！

微辣辣豬肉蓋飯 $65

有飯卷，有炒粉絲，就加多個蓋飯；試咗炸雞，炒粉絲有牛肉，故此，蓋飯就選豬肉，試試個微辣豬肉蓋飯，寫住微辣，其實幾有辣勁，哈哈，但就變得幾惹味，而啲豬肉唔太肥，口感鬆化，而且，真喺幾大兜，拌飯真喺幾好食。

整體嚟講，樣樣都好食，而且，就算拎到返屋企，質素都無話大打折扣，份量又好十足，性價比都算高，值得篛兜！

個人評分
味道：9/10
環境：7/10
服務：9/10
抵食：9/10
平均每人消費：HK$80

餐廳資料：
首爾飯盒 Seoul Dosirak
地址：灣仔軒尼詩道149-151號萬寶樓地下C號舖
電話：5434 5208