磯陣：想食就食

老婆一向鍾意晌屋企煮，突然話想請我食番餐，指明食日本嘢，無話咩特別原因，小弟就梗喺點頭話好啦。其實想食日本嘢，依區唔少選擇，仲有羽壽司、御．上澄，不過已經試過，質素麻麻，翻兜機會好微；另外八佰屋、友樂亭依兩間「老店」，閒時經過幾人氣，應該有質素，不過價位屬中高，但有打算今年內試埋佢；既然喺老婆付鈔，就唔想食太貴，所以，搵晚姨仔舅仔都唔返嚟食，得我倆公婆，收工返到美孚，揀嚟磯陣食日本嘢，因為之前食過覺得質素唔錯，況且價位比較相宜。

我倆個就坐晌迴轉帶旁卡位！

閒日嘅星期一晚，客唔多，都有約7乘左右。晚市有幾款套餐：晚市一人前（$72-$128）、築地二人前（$288）、札幌四人前（$588），仲有其他散嗌嘢，不過反而吸引小弟嘅，喺一個製作簡陋手寫嘅「新鮮空運到港」嘅餐牌，有9款「新鮮」選擇。我哋都揀咗當中平平哋嘅3款，然後晌主餐牌要多一個人氣菜式，加埋一都唔使兩舊水，比起個二人前同四人前划算好多。

晚市一人前、築地二人前、札幌四人前餐牌。

「新鮮空運到港」餐牌

無花果沙律 $38
搵無花果乾嚟煲湯間時都有飲，新鮮無花果亦曾經食過，但唔多，雖知一粒鮮無花果唔平，成十幾蚊粒。咁依道無花果沙律睇落幾抵食呀，睇外觀就唔落唔少無花果啦，墊底仲有沙律菜、白蘿蔔絲、火箭菜、車厘茄粒，沙律之上仲加少少蟹籽，賣相幾討好。味道以為喺以清爽為主，食落點知帶有少少辣味，但無乜辣度，而無花果則很香甜，所以個沙律又幾特別，再者，份量又夠足喎，$38都好抵食。

汁煮東風螺 $25
以為得啲東風螺，原來仲有蘿蔔，細細碗，有啲似關東煮。蘿蔔好入味，軟腍無渣，東風螺大概6粒左右，都煮得夠味，螺肉挺結實，不過部份咬到有砂粒。另外，有個侍應似乎喺新手，雖然禮貌周周，但就比較緊張，初時無拎啲長竹簽俾我哋篤東風螺，慢咗幾拍要個經理提一提至醒起。

胡麻牛肉卷 $28 / 3件
見佢晌餐牌註明喺超人氣，一客又唔喺貴，所以就點嚟一客試吓先。以反卷形式，內裡捲住煎好嘅薄牛肉片，反卷外面沾上紫菜碎，又喺加少少蟹籽，插棵火箭菜，寧捨醒神晒。最正喺啲芝麻醬汁，好香濃，而牛肉卷嘅飯粒緊緻，唔太實又唔太鬆，口感唔錯。

北海道海鮮炒飯 $78
賣七十零蚊嘅炒飯，喺咪用晒北海道嘅海鮮，大家心裡有數。但老實一句，材料落得足秤，你見成碗炒飯都有好多餸料，包括：蝦仁、鳴門卷、蟹柳、魷魚、獅子狗魚蛋，一分錢一分貨，餸料可能唔喺咩貴價嘢，但飯粒勝在炒得爽口唔油，大可作為臨尾墊肚之選。

整體每道菜式都唔差，價格又相宜，唯一要挑剔喺迴轉帶下嘅自助斟水龍頭，啲熱水唔夠熱，令到啲綠茶唔香！

個人評分
味道：8/10
環境：7/10
服務：8/10
抵食：8/10
平均每人消費：HK$95

餐廳資料：
磯陣
美孚美孚新邨吉利徑23號地下A舖
2959 2022