Simplylife Bakery Café：簡單人生．唔簡單生日飯

又輪到教會團友咖喱嘅生日，佢倆公婆搭小弟倆公婆，約埋食番餐賀一賀，地點喺又一城嘅Simplylife Bakery Café，因為經過好幾次，見有幾多人排隊，心想應該有一定質素。不過，訂唔到位，本打算早啲去攞位，因為問過閒日夠早會未有人排，但喺溝通上出咗少少錯，結果要大家一齊排咗成個鐘先有得食，認真唔好意思。

晌排隊期間，有個侍應捧咗啲brownie俾排隊嘅人試食，雖然只喺細細粒，都表示一番心意。此外，仲未有得入場，就走咗入內鋪，睇睇佢啲凍餅同麵包，啲凍餅睇落外貌都幾掂喎，當晚所見有成8款選擇，款款都只喺賣$25，大可作為飯後甜品。可惜，我哋4個人叫4個餐，最後食得好飽，所以食唔落甜品咯！而佢啲麵包就有試，因為叫餐有免費麵包籃跟，講開啲麵包，原先晌入面嘅麵包喺一盆盆或一籃籃，後尾包成一袋袋，因為8:30pm後有促銷，原本啲麵包賣$15/個，之後嘅促銷價就賣$25/袋（3個），差唔多平近半，所以都幾搶手，之不過無得揀，袋袋款式配搭都唔同，睇吓搭唔搭得啱你最鍾意嗰幾款啫。



8:30pm後促銷袋裝包，賣$25/3個。

 晚餐餐牌一張紙過，大體分為三類：沙律、肉、飯或意粉，當晚嘅餐牌，沙律類有4款可揀，肉類最多選擇，一共有10款，而飯或意粉類則有8款，價錢個範圍少少闊，最平喺素菜有機糙米飯$92，而最貴喺牛柳、黑豚豬扒之類，賣到$188。基本上，以上各款食物都喺單點，加$30就包湯或沙律，及自家制凍茶或汽水，如想加個飯後一點甜，再加多$15有交易，不過佢只喺寫精選甜品，未知可唔可以晌佢個餅櫃度隨意揀，相信應該唔得喇，喺咩甜品大可問問！

 麵包盤
既然喺Bakery Café，餐前嘅麵包當然唔少得，免費送嘅麵包盤黑麥同法包各有3件，由於麵包送來時已經唔暖，雖未至冰冷，但著實令人感覺麻麻，小弟就覺得已經要扣分。仲有就喺我哋4個人，6片麵，只喺得一小盅牛油，無其他沾醬或佐料，真喺搽得兩片都已經無晒。黑麥質感較好，重麥味又夠煙韌，而法包包面唔夠脆，得個硬字。

意大利什菜湯
橙紅色嘅什菜湯，內裡什菜唔多，不過味道幾濃郁、幾實在。啲法包比較乾硬，撕小片小片沾點什菜湯同吃，效果會好啲嘅。

青瓜沙律
佢哋3個人揀咗餐湯，小弟為要試埋個沙律喺點，自不然協調吓要份沙律。大量沙律菜墊底，上面放有幾片青瓜，及半塊橙肉，意大利醋下得幾重手，所以醋味濃，沙律菜食落清新爽脆。

香煎鱸魚茴香有機糙米飯 $118
其實份量有啲少，女士絕對無問題，大食嘅男士應該唔多夠。賣相好簡約，煮好嘅意大利有機糙米放晌碟中，飯心有少少硬，但每粒都有香濃醬汁包住，令個飯嘅味道好唔錯；而香煎鱸魚雖然煎到外表黑黑，但肉質依然嫩口，外皮有少少焦脆；最上面條燒茴香，聞落陣陣幽香，味道幾特別，唔單喺裝飾，咬吓都有趣。

香烤紐西蘭嫩羊扒．燴茄子．香草燒薯 $168
賣相烏卒卒唔算好睇，羊架共有3支，肉質軟腍油潤，羊味又幾夠，兼且唔太羶。配菜嘅燴茄子同香草燒薯唔太多，燴茄子切到細細粒，而薯仔連皮炸再以香草略炒，粉腍嘅薯仔挺好食喎。

安格斯一級牛肉（8安士）車打芝士煙肉漢堡 $128
賣過百蚊一個漢堡真喺晌食啲地方有喜慶先會叫嚟食吓，平時鋸一份扒都喺8安士左右，依家用嚟做漢堡，所以可見中間扒漢堡牛肉幾厚身，加埋用上安格斯一級牛肉嚟手做，好鬆化肉味又濃郁，配埋烘軟咗嘅車打芝士同塊唔肥嘅煙肉，雖然只喺「配給」得1/4個漢堡，都好滿足。伴菜仲有洋蔥、蕃茄、酸瓜同炸薯條，而酸瓜雖則好酸，但唔搶喉，仲要超爽脆，正！

雞胸意大利黑醋芝麻菜紐紋粉 $118
唔好以為紐紋粉有好多紐紋，外觀幾似迷係豬腸粉，細細條咁，粉嘅兩側向內捲，如果睇條紐紋粉橫切面，喺呈S形，故此內坑好掛汁。個紐紋粉以意大利黑醋為主醬汁，而醬汁較為杰身，細問之下喺因為加入咗忌廉，怪不得醋味強，但又唔覺難入口；因為啲雞胸肉晌晒底，初時仲以為好少添，撈勻個粉先發覺其實都唔少。

蘋果烏龍茶
今晚嘅自家制凍茶喺蘋果烏龍，冰冰涼，帶點蘋果味，又滲出茶香，又估唔到幾好飲喎。

整體上食物嘅用料同配搭都花過心思，唔會太普通，尤其喺個紐紋粉。同枱幾位都食得稱心，坐得又頗舒服，至於服務方面，侍應表現嘅一環取得較高分，除咗基本傳菜、斟水、收拾之外，對每個菜式都幾熟悉，因為我哋對今晚菜式嘅味道都有頗多問題，分別問過幾個侍應，幾個都答得上，無話口窒窒、慌慌張。另外，食滿$600有2小時免費泊車，阿志啱啱成為新車主，個優惠叫幫佢慳番少少。

個人評分
味道：8/10
環境：7/10
服務：9/10
抵食：7/10
平均每人消費：HK$180

餐廳資料：
Simplylife Bakery Cafe
九龍塘達之路80號又一城 L2-42 舖
2265 7418