We Time Cafe：周末好去處

近排逢放假都落雨，都無機會行吓山，所以，索性呢個星期六就走去睇早場，所以，近近哋過嚟荔枝角「麗新」嘅「MCL」，睇姨仔推介嘅「給阿嬤的情書」，果然好睇，好有故事性。睇完就最好喺番附近搵食，晌「麗新」兜咗一圈，見有家西餐廳「We Time Cafe」，門口棟咗個套餐餐牌，幾多選擇，價錢又唔貴，不妨試試。

餐廳其實晌二樓，走到上去原來個環境都幾大，應該喺新開無耐，裝修新簇，地方企理。中間有兩排卡位，闊落舒服，此外，仲有多張可活動嘅4人枱。而且，燈光柔和啲，加上周六中午，唔太多人，感覺悠閒輕鬆。

餐具、基本調味料及紙巾已放晒上枱，自由取用。落單掃二維碼，呢啲操作依家大部份人都駕輕就熟啦！招呼亦幾好，侍應都好有禮貌。

中午時段，除咗精選套餐可揀之外，仲有日式便當、拉麵、烏冬、沙律、小食，以及各式飲品。至於個精選套餐由A-L共12款，定價$62-$82，唔收加一，包是日餐湯及茶啡，轉配其他飲品半價，供應時間喺11:30am-9:45pm，即喺晚餐都喺佢。

羅宋湯
是日餐湯喺豉油西餐嘅「紅湯」、「白湯」，小弟就較喜歡紅湯嘅羅宋湯喇，因為酸咪咪，飲落好醒神，而且，多蔬菜，夠健康。個湯確實幾足料，夠香濃酸活，口感清爽。

香辣咖喱牛肋條飯 $68

因為我哋嚟得早，所以，好快主菜就登場，小弟揀咗牛肋條飯，唔份講笑，份量超十足，仲用個熱焫焫嘅鐵碟裝住，令啲咖喱保持熱度，咖喱確實好香，唔多辣，撈飯真一流，而牛肋條炆得好鬆化，啲肉一咬就開，白飯黏糯有米香，仲有咗少少飯素上面，真有心；此外，以為只包餐湯及餐飲，原來仲附有一小碗胡麻醬田園沙律，啲沙律菜夠新鮮爽脆，真喺無欺場。

生酮料理餐配椰菜花仿炒飯及沙律 $68

老婆就揀個生酮料理餐，貪佢健康啲，主食可以配豬扒、慢煮雞胸、魚柳或牛扒，佢就揀慢煮雞胸，賣相都幾清新，同樣奉送胡麻醬田園沙律。件雞胸都幾大件，因為慢煮過都可謂半熟，再輕輕煎一煎，雞肉入口都幾嫩口，而椰菜花仿炒飯老婆就話比較似椰菜花炒蛋，不過，啲椰菜花就樁都細細粒咁。

低糖薏米水 +$2
老婆向來講健康，平常餐飲佢都喺揀熱檸水，但今次佢就多個選擇，就喺熱薏米水，感覺正氣、健康好多。

拖肥咖啡 +$16

小弟向來就喜歡嘆吓咖啡，鮮奶咖啡就情有獨鍾，而今次又有新選擇，就喺揀咗拖肥咖啡，雖然個拉花唔算好靚，但味道又幾唔錯，相貌有少少似朱古力咖啡，其實飲落都喺，因為加咗拖肥醬，會喺偏甜，但啱我。

周六朝早，輕輕鬆鬆睇場早場，然後食個午餐，寫意的節目。

個人評分
味道：8/10
環境：8/10
服務：8/10
抵食：9/10
平均每人消費：HK$77

餐廳資料：
We Time Cafe
地址：荔枝角長沙灣道680號麗新商業中心地下G55C號舖及1樓155號舖
電話：6335 3957