第一次晌食晏時段嚟幫襯，之前兩次都喺食夜晚，一樣唔少客喎。因為我哋大人連細路都成6個人，所以要拍枱都等咗10多分鐘。入到去個感覺有啲唔同，裝修無變，但好似大咗，再望真啲原來最入面幅牆無咗大半截，跟鄰鋪賣和食嘅「惠比壽居食屋」打通晒，而且兩邊食物可以互叫，即喺晌又一間可以叫隔離鋪嘅壽司、拉麵……，晌惠比壽又可以叫杯咖啡、三文治……，問問侍應原來兩間鋪都喺同一個老細，如果喺咁就應該一早打通佢增加協同效應啦！
餐湯有紅湯（羅宋湯）、白湯（粟米忌廉湯）及中湯（青紅蘿蔔煲豬展），餐湯屬大路貨式，唔叫好，亦唔太差，只喺一般套餐嘅「必備」。如果夜晚嚟，西湯會附送多一片蒜蓉法包添。
沙律沙律菜、罐頭什果、車厘茄、紅腰豆，細細碗，唔會有咩驚喜，跟套餐上嘅附加產品，志在令客人覺得抵食啲。晚市跟餐嘅沙律成份都大同小異，只喺份量再多啲。
松板牛肉飯 $45肥姐要咗個松板牛肉飯，飯量都幾多，相反牛肉份量就普通，以燒汁煎煮牛肉粒，喺唔喺真係松板牛小弟就唔識分，但牛肉粒口感都鬆軟嘅，汁醬味濃，上面灑咗啲木魚碎，整體嚟講都唔錯。
老闊炒一丁（海鮮） $45池哥嘅身形老闊咁款，所以佢就揀個老闊炒一丁，睇落幾足料，用料不賴，雖然賣相有啲亂堆堆，但池哥話唔錯，一丁炒得少少爽。
泰式豬頸肉炒飯 $45志兄點咗個炒飯，單睇賣相，幾掂喎，飯粒炒得分明，色澤又「勻巡」，不過，見佢食得一半就停手，似乎有啲唔對路。佢話豬頸肉唔喺好得！
菜遠牛腩炒麵 $45咖喱姨姨好似幾鍾意佢啲牛腩，其實對上一次同老婆、姨仔嚟食，都有試佢個招牌牛腩，今次問咖喱姨姨整番舊一試，果然水準依然，肉質勁鬆化，炆得夠晒腍身，反而個炒麵做得麻麻，稍為炒過籠有啲乾。
馬來咖喱滑雞飯 $48小弟嘅選擇，對咖喱比較有好感，所以就揀咗個馬來咖喱滑雞飯。睇得出佢哋用上新鮮雞件，所以肉質比較滑溜，老套啲講句雞有雞味；而咖喱屬馬來風味，無印度咖喱咁多香料咁多層次，亦唔似日本咖喱帶甜味，食起嚟椰香略重，都幾香，稀杰度調校得唔錯。鍾意咖喱因為可以攞嚟撈飯，好老實，無餸淨撈咖喱汁撈飯我都無問題喎！
日式炸餃子（隨炒飯麵餐附送）一客兩粒炸餃子，內餡喺免治雞肉，雖然都喺啲雪藏貨，不過炸得幾香又卜卜脆，只喺油咗啲。
個人評分
味道：6/10
環境：7/10
服務：6/10
抵食：6/10
平均每人消費：HK$48
餐廳資料：
又一間餐室
荔枝角寶輪街1號曼克頓山商場(曼坊)G08舖地下
2886 8778
沒有留言:
發佈留言