泰排檔 Thai Pai Dong：「泰」滋味午餐

老表搵我食晏，當然應約啦，晌中環搵食唔難，但搵個地方好坐又可以坐耐啲，最好走上啲，例如荷里活道打上，會比較少寫字樓客。晌網上搵一搵，就過咗嚟「蘇豪」嘅「泰排檔」試試，睇佢風評不俗，加上老表話可以行吓「大館」，又可以順道買埋酸種蛋撻。

好在我哋嚟得早，暫未見人龍，再晏啲，就坐滿人，臨走先見到門口貼有「米芝蓮2025」嘅貼紙，相信有唔少人都喺慕名而來。而餐廳環境都有點泰式悠閒風情，枱面砌上花磚，亦別樹一格。人手好足，侍應招呼熨貼又有禮，佢哋睇落大部份都似喺泰國人，但都識聽識講廣東話。

枱面除了擺放咗餐具，仲有好多種泰國地道醬料，侍應更話呢啲地道醬料固然從泰國入口，而絕大部份食材、用料亦一樣從泰國直接入口，期望做出百份百地道口味。

午市餐牌一張A4紙餐牌就陳列晒，種類包括有湯麵、炒粉麵飯、泰式小食、沙律、飲品及甜品，有少部份飲品以優惠價供應。最終，就點了一客船麵加一客炒飯，最尾再加一客甜品，就成了我哋豐富嘅午餐組合。

和牛船麵 $108

船麵我哋都比較少食，所以，點都要叫一客嚟試試。船麵湯底嘅色澤非常深沉，先飲啖，夠晒濃郁，帶少少酸香味，有份醒胃感，而金邊粉本身好滑溜，再嗦滿湯汁，自然更好食；厚薄適中嘅和牛片生熟度啱啱，腍滑又帶少少油脂香，此外，仲有炸豬皮、肉丸、通菜，同樣好食，喺一道非常豐富嘅泰式湯粉。

蟹肉炒飯 $118
小弟向來都鍾意食蟹，但怕拆蟹，麻煩嘛，所以，一見有呢一款蟹肉炒飯就二話不說想試佢，呢個飯睇落好似好普通，但一食就知師傅炒得手勢好，粒粒分明，又夠乾身，兼且唔會太油，最緊要喺蟹肉已經拆好晒，而且，份量比想像中多，食落有蟹鮮味，再唧上少少青檸汁去提味，多添份清爽感，變得更好食。

泰式奶茶 $8

只加$8就有杯泰式奶茶，無理由唔試，估唔到又幾香滑，除咗茶味，多咗一陣陣嘅香料味，跟港式嘅截然不同嘅感覺。

芒果糯米飯 $68

老表話無甜品餐飯唔夠完整，所以，試埋呢個泰式經典嘅芒果糯米飯，椰漿以小兜放晌一旁，自行添多添少。暖呼呼嘅糯米飯好煙韌，椰漿味道濃郁，加上芒果十分清甜，果然做得有水準！

今餐大家都食得好稱心，每道菜都做得實而不華，而且，晌度亦食得輕輕鬆鬆。

個人評分
味道：9/10
環境：8/10
服務：9/10
抵食：8/10
平均每人消費：HK$155

餐廳資料：
泰排檔 Thai Pai Dong
地址：中環士丹頓街6-8號地舖
電話：9527 3188