冬蔭牛牛 Thai OX Baby：「冬」張西望大發現

趁住周末放晴，梗喺要晌戶外走走，今次又同老友踩番轉單車，由上水踩去元朗，再食餐晏先回程。自從無咗「南山軒」而要入元朗市中心搵食感覺有點麻煩，人多車多，不過，有車友就介紹我哋臨入元朗前可以轉去錦田方向，有處叫「天空之城」嘅美食街，裡面有好多餐廳選擇，最緊要就喺方便我哋泊到單車（揸車人士都方便，因為外面有大量泊車位），走一圈，睇啲午餐似乎最吸引就喺「冬蔭牛牛」。

啲村屋餐廳環境間間都喺咁上下，鋪前有啲悠閒半露天位，但算喺專俾人吸煙嘅位，唔啱我哋。

行入去，其實裡面都幾大，裝飾都幾骨子，乾淨企理，有幾張大圓枱，啱晒一棚朋友坐埋一齊，比坐長枱方便傾偈。最緊要裡面有冷氣，踩咗半日單車，可以抖抖涼快吓。

午市提供超多款精選午餐，由A到Z嘅泰式粉麵飯，以及共10款嘅泰式湯粉，包基本熱飲，亦可加錢轉泰式特飲或椰青。

泰式冬陰功海鮮湯河 $71

個冬陰功湯底睇個樣好似好得，飲過先知堅定流，老友話一入口果然有料到，香濃惹味，辣度溫和，帶微微酸同少少香料味，飲落頗為開胃。而海鮮料有啲青口、魷魚、鮮蝦同蟹柳，質素唔錯，食落幾有鮮味，唔喺雪死晒嗰啲貨色，河粉口感滑溜，份量又十足。

椰汁冰 +$10

老友就話椰子味好濃郁，入口清甜，就算飲到尾，啲椰子味都唔會變得太淡，配搭冬蔭功湯河，非常有解辣之效。

馬拉盞豬頸肉炒米 $61

啲豬頸肉燒得好靚仔，有少少燶邊，食落去好有炭火香味，切得厚薄均一，而咬落質感爽爽哋有份脆口感，又帶有少少油脂香；而米粉炒得好爽身，唔算好油膩，因為加咗馬拉盞炒，鹹鹹香香，非常惹味，加上又炒得夠鑊氣，真心好食。

蜂蜜百香果梳打 +$10

餐牌見就需要加$20，埋單後就見只需加$10，抵咗。睇得見粒粒百香果籽，所以，可稱得真材實料，飲落酸香清爽，夏天飲啱晒，亦都好襯呢碟炒米粉。

由於地方大，所以，食完都仲可以慢慢坐，抖多陣。雖然，今日只喺試過佢一款炒米、一款湯河，但兩者質素都高，怪唔得都見幾多外賣單，而老友就話發現呢個地方，以後踩車過嚟元朗，就方便晌度落腳食晏。

個人評分
味道：9/10
環境：7/10
服務：7/10
抵食：9/10
平均每人消費：HK$65

餐廳資料：
冬蔭牛牛 Thai OX Baby
地址：元朗錦田高埔村108號18座地下（天空之城）
電話：2414 3328