Season. Café：假日午餐小清新

每週都會過嚟葵興呢邊，有時都會喺附近食個晏，今次就專登過嚟KCC搵食，其實晌Life@KCC呢幢商廈都試過好幾間餐廳，都喺一啲特色小店，而今次就上到8樓試下「Season. Café」。

餐廳都佔地好大，裝修簡約，一室淺色木系，甚有文青風，枱櫈編排闊落，加上放置咗唔少植物，令人覺得悠閒舒服，加上周日下午都比較少客人，更加喺無侷促感。

而餐廳尾仲有一排「露台」位，全落地大玻璃，對出雖然只喺屋邨景，但因為無遮擋，所以，景觀極為開揚。

食物選擇方面都有很多，食物分類為前菜、小食、沙律、意大利粉、意大利飯、主菜、薄餅、漢堡……等等，收銀旁仲有個凍櫃，放咗好幾款甜點。

飲品方面，就有多款咖啡及非咖啡類飲品，以及少量酒精飲品供應。

桑葚玫瑰洛神花茶 $40

桑葚喺乜嚟？上網睇睇先知其實就喺黑桑子，味酸甜，功效多多，如抗氧化、補血、護眼、助消化、延緩衰老……等，加埋玫瑰、洛神花，飲落酸香醒胃，舒服好飲。

鮮奶咖啡 $40
小弟就慣常揀鮮奶咖啡，因為一向都鍾意奶系嘅咖啡。阿妹嘅拉花及沖泡手勢喺唔錯，拉花線紋細緻、工整，的拉花也是一件賞心樂事，而奶泡撞落咖啡度好均勻，所以，每啖嘅味道都好平均、一致，再者，咖啡味很醇厚芳香，帶點果仁香氣。

蟹肉帶子蘆筍羅勒忌廉汁意大利飯 $148

通常一間餐廳有賣意大利飯，我一定會試試，因為佢喺最能考到廚師手藝嘅菜式。單睇賣相，非常對辦，因為每粒飯都沾滿忌廉汁，再者入口飯粒口感有一份煙韌，又夠濕潤，絕對喺做得上乘呢！意大利飯內混咗唔少蟹肉，再加埋鮮蘆筍仔，故此，味道豐富，雖然餐牌都寫到明只得一粒帶子，但所用嘅喺刺身級，煎得啱啱好，味道鮮甜，質感柔軟。

伊比利亞黑毛豬鞍配田園沙律炸薯條鳳梨蜜糖汁 $238

本來老婆就想試春雞，可惜未有貨，故此，改為試吓黑毛豬鞍，一送上嚟，賣相果然好有霸氣，因為黑毛豬鞍切得極之厚身大件，目測起碼有成寸多厚，但一落刀你就知道煎得啱啱好，果然，入口好鬆化，肉質好有彈性，而外層仲有少少焦脆感；雖然菜名寫住配鳳梨蜜糖汁，但嚟到嘅係蜜糖芥末醬，無緊要，配豬鞍同樣好食。順帶一題，田園沙律好新鮮，沙律菜非常爽口，而炸薯條甘香脆口，一啲都唔油膩，確喺做得高水準。

伯爵茶巴斯克蛋糕 $54

最後當然都想以一道甜品作結，凍櫃內只有三款蛋糕供應，最心水就喺呢一款伯爵茶巴斯克蛋糕，雖然喺巴斯克，但面頭加咗一層酸忌廉，變得有美式芝士蛋糕嘅風格。食落口感挺身而柔軟，芝士味中滲出陣陣伯爵茶茶香，的確好食，襯埋我杯鮮奶咖啡，喺一份慢活嘅享受。

呢度可以講喺廠廈中嘅一個小綠洲，環境舒服寫意，氣氛悠閒，加上無論咖啡、主菜抑或甜品，做得有質素。

個人評分
味道：9/10
環境：8/10
服務：7/10
抵食：8/10
平均每人消費：HK$260

餐廳資料：
Season. Café
地址：葵涌葵昌路72-76號Life@KCC 8樓801號舖
電話：6131 2290