麵包司 Pan'yasan by Fung Yeh Bakery：「麵」貌一新

「荃新天地2期」我都算去得多，因為不時會過嚟「英皇」睇早場，亦試吓商場內嘅唔同食肆，數吓數吓都試過好多間，而呢一家麵包店「麵包司」都知道佢開咗好耐，最近知佢有提供埋堂食位及咖啡，所以，就過嚟食個早餐。

座位就設晌鋪面對出，以間板圈起，自成一角。

麵包不斷陸續出爐，不過，始終時間仲比較早，款式當然肯定未齊，但都有唔少心水款式。而從牆上嘅標語所見，講明所以麵包都喺以日本麵粉製作。

除了咖啡，仲有熱茶供應，此外，一邊嘅凍櫃仲有其他飲品供選擇。

忌廉芝士箭豬包 $10、蒜香可頌 $14、牛奶咖啡 $24

箭豬包造型幾有趣，包身軟熟，裡面填有大量忌廉芝士，軟滑綿綿有濃郁芝士香，真不錯；可頌（牛角包）本身烘得金黃，咬落超香脆，又極富牛油香，加埋蒜香元素，蒜味香濃，超好食。

開心果菠蘿包 $15、蒜香可頌 $14、牛奶咖啡 $24

睇到呢款開心果口味嘅菠蘿包當然要試一試啦，菠蘿酥皮好脆口，估唔到裡面勁多開心果蓉，開心果味突出，喺誠意之作；牛奶咖啡正價賣$33，跟餐就賣$24，雖然喺機沖，但價目牌都標明咖啡豆嚟自自巴西、哥倫比亞及危地馬拉，入口唔錯，有果仁香。

紅莓合桃包 $20、日式紫薯包 $16

另外再要了兩個「大包」作為家人嘅早餐，一來兩款都好啱口味，二來定價唔貴。紅莓合桃包混有好多紅莓及合桃，帶點紅莓嘅微酸，合桃好香脆，加埋包身有嚼勁，再烘番熱，搽少少牛油，勁正；至於日式紫薯包同樣真材實料，裡面有一大嚿紫薯蓉質感綿密，清甜軟滑，加埋柔軟嘅麵包，真好食。

睇啲廣告牌，仲有款法包三文治，可惜要12:00pm先有供應，不過，今次所試嘅幾款包亦好唔錯，下次再嚟開，打算試試其他口味嘅可頌！

個人評分
味道：9/10
環境：7/10
服務：7/10
抵食：9/10
平均每人消費：HK$50

餐廳資料：
麵包司 Pan'yasan by Fung Yeh Bakery
地址：荃灣楊屋道18號荃新天地2地下一門町市場內J31號舖
電話：Nil