CHUTNEY：午間足「印」

原來都好耐無食過印度菜，早排搵咗東叔叔幫手訂料，所以，今日就搵佢食餐晏，多謝吓佢。地點就梗喺就返小弟返工區域，咁請得東叔叔，當然喺要食好啲，所以，嚟到「CHUTNEY」試一試。

一出電梯門，門面已裝修得金碧輝煌，但出奇哋唔俗氣喎，就連接待處亦設計到有種古印度嘅神秘風，非常別緻。

揭開幕簾走進用餐區，又有份好唔同嘅感覺。一室暖和感，弧線形天花，配以柔和燈光，實在蠻有氣氛，枱櫈間安排得有一定距離，加上舒服好坐嘅坐椅，我哋又被安排坐晌窗邊，景觀開揚之餘，仲送埋個「大館」景，非常寫意。

此外，喺餐廳尾設有一個專區，可以透過玻璃睇到師傅點樣製作印度薄餅同一啲炭火燒烤菜式，都幾有睇頭。

順便都講講啲餐具同盛菜嘅器皿，全都喺好精緻，多多少少都會增加用餐嘅好感度。

雖然嚟食晏，不過，呢度就無午市套餐供應，都喺照常嗌番散點。選擇都非常之多，除印度咖喱，仲有印式頭盤、印度炭火燒烤、蔬菜、印度薄餅……等等，至於飲品方面，亦有好多款式，以及多種餐酒。

胡椒餅

甫坐低無耐，就會送上一小份胡椒餅，佐以3款醬：印度辣醬、薄荷醬及菠蘿醬，胡椒餅超薄超脆，又有黑胡椒香，最睇唔出啲薄荷醬喺最辣。

Lassi $98

朋友甚少食印度菜，所以推薦佢試吓印度嘅特色飲品芒果酸奶，基本上凡喺印度餐廳都會提供呢款飲品。佢話真喺幾入口口感細滑，芒果味好濃郁，乳酪帶出嘅酸味唔太酸，反而有少少醒胃感，跟芒果嘅清甜味好平衡；因為單單以乳酪同鮮芒果打成，所以，飲到尾，味道跟質感都無走樣，堅真材實料。

Jwala Ras $78

我就想揀杯清爽啲、醒神啲嘅飲品，因為印度菜味道都偏濃、口味重，故此，最後揀咗呢一杯由紅莓、薄荷、薑啤溝成嘅特飲。味道唔錯，酸酸甜甜，好有清新感，襯咖喱真喺一流。

Raj Kachori $138

上完飲品，好快就嚟個清新嘅前菜，中文譯為鮮果餡料脆餅，侍應會幫忙將脆餅一開四，裡面原來有好多生果粒粒，以及晌印度菜常見嘅豆粒，再淋上乳酪同雜莓醬，酸酸爽爽食落好開胃，同埋，外層嘅脆餅超脆口，令整體嘅口感好豐富。

Lamb Seekh Kebab $228

呢道菜屬Tandoor「天多尼」做法，即喺印度炭火燒烤，喺印度菜其中一款常見嘅菜式，而今次呢一款炭火烤免治羊肉串做得好有風味，因為經多種香料、乳酪醃製再燒，寧舍香口，又有炭火香，加上免治羊肉搓得鬆化，沾上薄荷醬，更為美味，而羊羶味唔重，相信唔食開羊嘅客人都接受到。

Chicken Tikka Masala $268、Garlic Naan $42

食印度菜點可以少咗咖喱份架，所以，試咗香料烤雞咖喱，並配上印度薄餅。Masala「瑪沙拉」呢款菜除咗加入好多印度香料去煮之外，仲加埋乳酪，味道帶少少辛辣，刺激惹味，又有份香滑感，而雞肉意料之外幾嫩滑。餐廳提供嘅烤餅款式非常多，揀番店員推介嘅蒜蓉口味。每片口感煙韌富蒜香，沾埋啲咖喱，再夾埋啲雞肉，真喺好食到暈。

呢道除咗環境舒適之外，食物都做得地道，又別具印度風味，此外，招呼非常好，服務又貼心，讓人感到稱心滿意，喺個很好嘅體驗。

個人評分
味道：9/10
環境：9/10
服務：8/10
抵食：8/10
平均每人消費：HK$470

餐廳資料：
CHUTNEY
地址：中環雲咸街75-77號嘉兆商業大廈4樓
電話：2330 0027 / 6069 7400 (WhatsApp)