禮 Sake Bar Present：「瀛」在質素

日本菜，一向俾人嘅感覺都喺做得夠專，拉麵店就喺賣拉麵，壽司店就喺賣壽司，鐵板燒店嘅就主打鐵板燒，不過，居酒屋就好似茶餐廳咁，食物包羅萬有，難得嘅好多都做得有水準，就好似今晚同老死嚟到位於九龍城較偏嘅打鼓嶺道嘅「禮」，食到多款高質素嘅菜式。

就好似大部份居酒屋嘅格局，環境昏暗得嚟，又打咗啲射燈，地方唔算大，但佈置有心思，一室深色全木系，有種復古風，加上牆上、天花都有好多和風擺設，氣氛輕鬆，極具居酒屋氛圍。

我哋被安排坐近門口對窗嘅一排位置，可以睇睇街景，而枱上達磨公仔、迷你鳥居、日本鯉魚旗……等等，都添加唔少和風感。

作為居酒屋，食物自然有好多選擇，主打有串燒，此外，仲包括前菜、野菜、玉子燒、揚物、煮物、燒物、烏冬、丼飯及甜品……等等一應俱全。

飲品方面，既然自詡為Sake Bar，就梗係唔少得各款酒類，包括有超多款式清酒、啤酒、威士忌、燒酎、梅酒……等等，而非酒類嘅選項亦有供應，如各式梳打、日本直送果汁汽水。

店員更補充一句，期間限定，各種日本清酒、果酒、燒酎，都有買二送一優惠，好酒之人就啱晒，不過，我哋唔好酒，就無福消受；此外，原來晌Openrice訂座仲有85折優惠，走寶添！

前菜 $10

坐萵無耐，先送上胡麻蕃茄沙律，蕃茄比預期鮮甜，一份小清新，為今餐有個好開始。

黑松露枝豆 $48

枝豆味道鹹鹹哋，裡面嘅豆粒口感好粉，然而加咗啲黑松露醬，立時昇華高幾級，絕對唔單止餐前過過口癮咁簡單。

酒盜芝士 $78

酒盜喺種醃漬物，加咗酒盜（有啲似生嘅螄蚶）鹹鹹鮮鮮，令忌廉芝士味更突出，跟脆口嘅梳打餅一齊食，鹹香濃郁、味道嘅層次感極強。

芝士玉子燒 $88

厚厚嘅玉子燒上枱之時仲有啲熱氣騰騰，咬一口，蛋味極之濃郁，口感濕潤嫩滑，中間半溶嘅芝士仲有拉絲嘅效果，鹹香嘅芝士更突出到蛋嘅甜味。

唐揚炸雞 $78

個炸雞一來外層甘香酥脆，二來一啲都唔油膩，已經討人歡心，三來雞肉質感嫩滑，又富肉汁，再唧啲檸汁，沾少少沙律醬，罪惡感全消。

兵庫縣室津生蠔 $68

日本菜向來講求賣相精緻，雖然只喺生蠔兩隻，但賣相亮麗。生蠔外觀極之肥美，有光澤，入口海水嘅鹹味唔會太重，蠔肉飽滿而軟滑，甚富蠔鮮味。

雞皮、雞軟骨 @$32

喺時候食吓店家嘅主打：串燒。先嚟雞皮、雞軟骨，前者香脆帶點油脂香，後者有咬牙、有嚼頭，簡單灑點鹽調味，已經啱啱。

雞腎 $32、厚切牛舌芯 $68、味噌大腸燒 $48

再嚟3款串燒都好精彩，雞腎爽口得嚟有份韌勁，牛舌芯厚身咬落柔韌，大腸燒絕對喺挑戰我哋嘅膽固醇指標，但難得洗得乾淨，加咗味噌，油脂感唔重喎！

鵝肝釀雞全翼 $88

呢款串燒真喺辰推，雞翼本身就已經燒得皮脆肉嫩，一咬爆汁，而裡面堅釀入好多鵝肝，所以，多添一份香腴嘅鵝肝油香，正呀喂！

清酒煮大蜆 $88

睇樣就已經見啲蜆又大隻、又肥美，入口真喺夠晒厚肉，有蜆肉嘅鹹鮮味，又慢慢滲出清酒香氣，而且，處理得宜，一粒沙都無。

月見醬唐揚飯團 $48

飯團搓完再炸，故此，咬落外層脆卜卜，裡面飯粒就好黏糯，而飯團打咗隻日本蛋，蛋漿滲入飯中，別有一番風味。

芝士年糕 $48

甜點時間，就以芝士年糕作結，年糕烤得微焦，加上有少少坑紋，份外好睇，而裡面煙韌軟糯，芝士味香濃，甜甜鹹鹹咁。

今晚食到嘅樣樣都做得有水準，實在高興又稱心，加上環境好有氣氛，招呼到位，侍應又好有禮貌，確實喺很好嘅用餐體驗。

個人評分
味道：9/10
環境：9/10
服務：9/10
抵食：9/10
平均每人消費：HK$400

餐廳資料：
禮 Sake Bar Present
地址：九龍城打鼓嶺道79號地舖
電話：2630 7266