延南洞 Yeon Nam Dong：「延」外之音

西環一帶有好多特色小區，就好似今日嚟到西營盤高街呢邊，區內有好多特色小店落戶晌度，令到呢啲小區更加有個性化，就好似今晚到訪嘅「延南洞」就喺其一，喺一家韓國小餐館，在地老友嘅極力推薦。

從門面嘅設計已覺得好有個性，因為鋪面前專登設計成一張長條櫈，可以俾人坐低，嘆杯咖啡，欣賞吓街景，而門面嘅落地大玻璃下，放置長型吧枱，亦喺另一個欣賞街景嘅好位置。

而餐廳裡面，設計摩登型格得嚟，又有一種復古風，尤其是木條牆身同啲壁燈，以及一啲小擺設。一室深色木系嘅裝潢，加上一角嘅吧枱，高腳木椅，極有一種小酒館嘅氛圍，予人感覺非常輕鬆；此外餐廳採用開放式廚房，不時傳出陣陣香氣，侍應、廚師之間嘅對話，聽得出大部分都喺韓國人，出品應更正宗、地道。

去親韓國餐廳，都一定備有一壺凍水，呢個喺韓國餐廳嘅特色，而今次就有一大壺冰涼嘅麥茶，老友話麥茶仲啱佢，所以，我哋就無嗌飲品。枱上嘅餐具都好韓式，隻水杯亦都好有復古風。

翻一轉餐牌，常見嘅韓國菜式類別都有，睇得出菜式喺貴精不貴多，反而，飲品嘅選擇編幅仲多，有一樣都幾特別，就喺所供應嘅甜品都喺西式嘢，反而唔見有韓式嘅添。

韓式前菜

食韓國菜另一特色就喺會提供好多極具韓式嘅前菜，今次所見就有3款，但唔喺慣常見到嘅泡菜、大豆芽之類。唔知喺咪大廚嘅刻意，3款前菜嘅顏色分別係紅黃綠，交通燈顏色，好鬼馬，當中有酸有辣，有腍有爽，唔單止過過口癮，更加喺令人食落開胃咗。

Grilled Shrimp and Avocado Salad $128

健康啲，梗喺先食個沙律啦，烤大蝦配牛油果呢個基本盤，應該都無乜點輸，前者爽口鮮甜，後者腍滑夠熟；底下墊有多款沙律菜，簡單淋上橄欖油，再唧啲青檸汁調和，咬落沙律菜嗦嗦聲，十分清新爽脆。

Cheese Kimchi Pancake $148

韓式嘅海鮮煎餅都算食過唔少次，而呢一款芝士泡菜煎餅肯定未試過，食過真喺好有特色，而且，師傅做得手勢好，因為唔單止煎餅底面都好焦香脆口，而裡面夾有大量芝士及泡菜，睇見有拉絲效果己好吸引，芝士入口軟綿綿，好有芝士香，估唔到又夾到泡菜喎，好食。

Pork Neck BBQ $230
韓燒亦喺頗有特色嘅韓國菜，好多時睇韓劇都見啲人燒完一大條肉就會剪成一小件嚟食，或會包生菜食，老友話五花腩太肥，所以，就試咗款烤豬頸肉，上枱時已經燒好並剪成一條條，試試淨食，好香口，肉質鬆化帶少少爽身。另外，再加$50加配一份蔬菜籃，有好幾款蔬菜，將豬頸肉沾上韓式豆瓣醬，加入蒜片，以生菜包住食，更有風味，更大大有去膩之效。

Tiramisu $68

作為一間韓國餐廳，做得好啲韓國喺應該，估唔到啲意大利芝士餅一樣出色喎。食落喺無酒嘅版本，但浸有濃香嘅咖啡味，蛋糕夠濕潤，馬卡風芝士打得柔滑細緻，餅面灑滿唂咕粉，真心唔錯。

Strawberry Cake $78

做得好有誠意，一層疊一層，包括海綿蛋糕、士多啤梨慕絲、士多啤梨果肉、士多啤梨漿，本身已幾好睇，食落酸香鮮甜，士多啤梨味突出，口感多元化，確喺好食。

晌度用餐的確好舒服，招呼熨貼細心，例如睇我哋飲晒一壺麥茶，就自動更換一壺新嘅，上甜品時，又會主動換上新嘅餐具、餐紙，而所試嘅菜式亦好有韓國風味，不妨多晌香港探索吓啲小社區，相信會有更多開心大發現。

個人評分
味道：9/10
環境：9/10
服務：9/10
抵食：8/10
平均每人消費：HK$385

餐廳資料：
延南洞 Yeon Nam Dong
地址：西環西營盤高街46C號地舖
電話：6175 9330