Espresso Alchemy：一個人嘅閒情

以餐廳嘅類別計，咖啡店絕對喺幫襯得最多，比幫襯茶餐廳仲要多，早前晌網上見到「Espresso Alchemy」被評為「The World’s 100 Best coffee shop」，喺對咖啡店嘅一份肯定。今早就專登一過人嚟食個全日早餐，純粹想犒賞自己呢排嘅辛勞。

餐廳嘅環境採開放式，所以，未入餐廳都可以睇晒全貌，裝修簡約，暖色燈效，予人感覺悠閒舒適。

如果喺堂食，侍應會送上餐具、紙巾、暖水，不過，出面亦有個自助角落，可以自由取用暖水、熱水及其他調味料。

早餐由8:00am供應到11:30am，選擇非常之多，並配基本即磨咖啡，反轉後頁就見到其他飲品，可以加錢轉配，落單後會由侍應送餐，卻無加一服務費。

Alchemy全日早餐 $149

雖然都食過「Espresso Alchemy」嘅早餐，不過，都喺啲三文治，全日早餐都喺第一次食，單喺賣相已經非常吸引，打卡度高，大大份好豐富，一次過試到好多款食材，包括炒野菌、豬肉腸、炒滑蛋、煙肉、車厘茄、牛油果、哈蜜瓜、暴汁、炸薯角同牛角包。食得出用料具質素，好似啲豬肉腸，腸衣脆口有肉香，唔係啲平價貨可比，煙肉唔喺得啲肥膏嘅貨色，炒蛋炒得嫩滑，野菌甚具菌香，車厘茄爆晒汁，牛油果好綿滑，哈蜜瓜甜到不得了，反而估唔到啲薯角喺幾辣吓，而牛角包酥脆富牛油香，真喺無欺場，實在物超所值！

自家製藍莓核桃蛋糕 $34
意猶未盡，加上當喺早午餐一齊食，就追加多件藍莓核桃蛋糕，入口蛋糕好鬆軟，帶微微濕潤，用上新鮮藍莓果肉，味道清甜，又混入唔少香脆嘅核桃，真喺好食。

鮮奶咖啡 +$11

小弟一向偏愛奶系嘅咖啡，加上飲過店家嘅鮮奶咖啡，印象深刻，做得非常好，所以，梗喺加少少錢轉配啦。單睇啲拉花已經好有水準，圖案對稱，線紋細緻，要留意喺沖到滿杯過頂而無趟瀉出嚟；此外，好鍾意喺呢類厚身杯，有手感，又較保溫。而入口除咗醇香之外，有陣陣果仁香，口感有種厚身感，晌完全無攪過之下，每口口感都好平均，無論用豆、沖泡手勢，都喺上佳嘅出品。

雖然得一支公，但小弟也樂在其中，因為一來食到啲高質素好嘢，二來又可以無拘無束咁樣，一個人靜靜哋hea住用餐，喺生活中的一份小確幸！再者，閒日朝，嚟食早餐嘅客人唔多，份外寧靜舒服。

個人評分
味道：10/10
環境：9/10
服務：8/10
抵食：8/10
平均每人消費：HK$196

餐廳資料：
Espresso Alchemy
地址：尖沙咀彌敦道132號美麗華廣場1期1樓113B號舖
電話：2674 1838