和緣 Wa-En Kappo：「緣」美無缺

食「廚師發辦」（Omakase）唔單止喺一種享受，更喺一次見學，除咗有機會認識一啲新食材之外，更會見識到一啲新煮法或配搭，今晚嚟到「和緣」，絕對喺一次豐盛嘅體驗，招呼方面更可以講喺做到滴水不漏，非常熨貼，個人覺得喺完美無缺嘅一餐，真嘫無咩挑剔位。

走入店內，地方唔算大，除有幾張散枱之外，大部份主要都喺板前席，喺食「廚師發辦」嘅指定最佳位置，因為可以睇到師傅切魚生嘅刀功、揑壽司嘅手勢，又可以跟師傅交流。而以一貫和風淺木色為主，裝修簡約，配以柔和燈光，襯以淺灰雲石枱面及淺灰座椅，感覺舒服。當然，最大亮點仲有超過180度嘅維港夜景。

晌呢啲高檔餐廳，除咗環境，餐具及服務都喺值得留意嘅一環。一碟、一杯都好古雅，餐巾、熱毛巾更繡埋店家名字，之後盛菜嘅器皿亦都賞心悅目，非常有特色。而服務方面，好熨貼，餐前侍應例必先問問有無嘢唔食得，或食物敏感嘅指定動作，店員又不時為我哋添茶及收拾餐具，態度有禮。師傅上菜嘅速度，亦喺恰到好處，令人用餐感到悠閒唔急促。

晚市「廚師發板」套餐共有3款：8道菜（$1,488）、9道菜（$1,688），10道菜（$1,888），另外，又有幾款店家嘅名物可以追加（$288-$428），侍應更話餐牌大概每2個月就更新一次，務必保持一份新鮮感。雖然，餐牌已列明每道菜用上咩食材，但侍應對每道菜都好了解，會向客人再說明一次，用咗咩食，有咩亮點……等等，小弟都好努力記架。事不延遲，9道菜晚餐立即去片！

先付

睇表面睇唔出乜嘢，其實喺禾旱冚珍珠，面層嘅土佐醋啫喱之下，有煙燻富山灣嘅螢光魷魚、馬糞海膽（餐牌就寫雲丹海膽），再加少少花穗做裝飾，味道紛陳，口感多變，底下仲墊有少少菜之花蘿蔔絲，口感爽脆，第一道前菜就帶嚟多重體驗。

炸物

小弟都幾鍾意食蟹，但就好怕拆蟹，嫌麻煩嘛，所以，呢一個忌廉毛蟹可樂餅就啱晒我，裡面有好多鮮味嘅蟹肉，仲要睇到喺一梳梳，童叟無欺嘅多，再配埋個自家製他他醬，酸香柔滑，正呀喂！加上炸嘢，無咩人唔鍾意囉，更要緊喺炸得甘香脆口又唔油膩。

碗物
一打開碗蓋，真喺好有意境，有種風高亮節、清雅脫俗之感，蕪菁清湯清澈而滿滿蘿蔔嘅清甜味；主角喺魚翅白菜卷，咬落魚翅非常爽口，而底下墊有一大塊豆腐，嫩滑富豆香。

刺身
食「廚師發辦」又怎少得刺身，一口氣奉上6款極尚時令刺身，包括右邊4件：灑咗竹碳鹽嘅醬油烏賊、拖羅、深海池魚、間八蘿蔔青瓜卷及左邊2件：炙燒金目鯛、炙燒鰆魚，單喺賣相已夠晒吸晴，而食嘅次序亦喺由上述嘅排列，即烏賊到鰆魚，真心無得彈，各款刺身夠晒時令、新鮮油潤。

名物追加 $298

另外，仲追加咗店中嘅一款「層層疊」嘅名物，由下而上：天婦羅紫菜、吞拿魚腩（拖羅）、牡丹蝦、馬糞海膽，再灑咗少少淡雪鹽，最上一抹輕盈嘅紅菜頭泡沫，添加一份清香感，侍應更建議以筷子掃平個泡泡，用手成件拎起嚟食，果然，集柔軟、爽脆雙重口感，味道豐富，讚呀！

蒸物

食日本菜不時都有茶碗蒸，不外乎銀杏、雞肉、蟹柳之類，而呢一道蒸物就配上鯛白子，再刨少少柚子青，增加清新感，而鯛白子咬落嘅口感好綿密，至於啲蒸蛋，滑溜到不得了，甚具蛋香，入口熱呼味，好味。

天婦羅
慣常咪海老、野菜天婦羅囉，但晌「和緣」就梗唔喺呢啲啦，甘鯛天婦羅將魚鱗都炸到勁酥脆，半點油膩都無，魚肉嘅質感更喺嫩滑得緊要，又有魚鮮味，食得出食材喺靚貨；以神來之筆喺佐以蝦醬日本春野菜汁，先喺鹹香感，再細味，餘韻帶有一份鮮甜及柔密感，實在出色。

肉料理

上面都食咗好多海鮮類嘅食材，此刻輪到一道肉料理：薄燒和牛，燒得柔嫩，再佐以輕柔嘅玉子泡泡，裡面伴以日本產珍珠米，侍應教路以和牛捲住珍珠米一齊放入口，果然有心思，和牛軟滑富油香，玉子泡泡甚具蛋香，伴上米粒作調和，味道平衡。

食事

近尾聲，喺食事出場喇！今回喺熱焫焫嘅鱈場蟹雜炊，又有蟹，合晒小弟心水啦，雜炊有啲類似燉飯，濕濕哋咁，而呢個雜炊以高湯嚟煮個蟹肉，所以，味道鮮甜到不得了，再加入日本香芹嘅三葉、雞蛋絲，先食一半，之後再加埋啲紫菜同脆脆，別有一番風味；此外，並佐以牛蒡漬及蒜頭漬，兩者都做得高水準，好食。

甘味

最後，就梗喺以甜品作結，咪睇好似好簡單嘅焙茶布甸，最緊要喺布甸做得軟滑，又有好濃郁嘅焙茶茶香，加上純甜脆口嘅焦糖脆脆，完全喺我杯，啱晒小弟口味。

雖然唔喺第一次食廚師發板，但每一次無論在食材上，製法上都有驚喜，亦都學咗唔少嘢！今餐「廚師發辦」又學咗唔少嘢，非常滿足，喺很好嘅美味體驗。

個人評分
味道：10/10
環境：10/10
服務：10/10
抵食：9/10
平均每人消費：HK$2,185

餐廳資料：
和緣 Wa-En Kappo
地址：上環干諾道西48號干諾中心29樓
電話：2117 3735