雲香園小鍋米線：靈「雲」之湯

不時都會過嚟深水埗睇嘢、買嘢，有時就會順便過去「西九龍中心」搵食，貪上面多選擇，今次就試咗美食廣場裡面嘅「雲香園小鍋米線」，想食啲濕濕哋嘅嘢。有別一般美食廣場嘅餐廳，有部份小店會有自己嘅座位區，呢間「雲香園」就喺咁，鋪前有一列吧位，櫈下設有藤籃，方便客人擺嘢。

收銀旁貼有一大張餐牌，有啲咩食就一眼睇晒，包括各款小鍋米線、配料、特色小食及飲品。落單時，店員話佢哋啲湯底每日新鮮做，仲熬足6個鐘，所以，真喺要試真啲。

手拍青瓜 $25

堅喺手拍，因為睇住店員現場即做，大大力拍爛條青瓜，再加入醬料，選小辣。青瓜形狀不一，入口爽脆多汁，微微辣，但又有份清新感。

雲香園米線 $67

以餐廳名字命名，又放晌第一位，自不然喺招牌嘢，上到枱大大嘅一碗，有非常多材料，包括台灣腸、雞絲、雞翼、魚肉春卷、螺旋草、豆卜、芽菜、酸菜、韭菜、蔥同芫茜，夠晒大堆頭，而且，每樣餸料都打孖上，好豐富，兼且味道唔錯；揀清湯，呈奶白色，呷一啖，果然濃郁鮮甜，好夠火候，所以，千祈唔好嘥啲湯，而米線質感爽彈滑溜，有質素。

牛腩小窩米線 $54

另一碗要牛腩，再加手打牛丸（+$11）．自製牛魔王小窩米線，同樣夾埋有好多餸料，仲齊芽菜、酸菜、韮菜、蔥、芫荽，同樣揀咗清湯底，只喺少咗啲辣豬肉碎。啲牛腩炆得好鬆化好入味，仲搭埋少少牛筋，牛丸咬落幾彈牙，米線滑溜爽身，份量足，清晒成碗確喺幾飽肚。

凍奶茶、可樂 +$9

支樽仔奶茶幾好喎，茶底確喺唔錯，都算幾芳香馥郁，有啲回甘，由於唔喺加冰嘅貨色，所以，飲到尾都仲喺咁香濃。原來，佢老闆自己走去學沖港式奶茶，真喺誠意可加。

今次簡簡單單食飽就走，但都試咗款涼菜加兩碗米線，幾樣嘢都唔錯！

個人評分
味道：9/10
環境：7/10
服務：8/10
抵食：8/10
平均每人消費：HK$88

餐廳資料：
雲香園小鍋米線
地址：深水埗欽州街37K號西九龍中心6樓51-53號舖
電話：Nil