秋意 Autumn Feeling：勁「秋」豉油雞

星期五晚又喺無飯夫婦日，既然過到嚟灣仔處理點事，就順便買啲外賣返去食，乾手淨腳。聽食友介紹，「秋意」嘅豉油雞好得，加上又近地鐵站，故此過嚟買兩盒飯返去試試。

雖然只喺買外賣，但都影一影吓環境，裝修雅致，坐滿晒客人，就知出品有番咁上下。另外，見收銀後有樓梯上二樓，不過，既然唔喺堂食，就無謂走上去。

睇睇餐牌，就知店家喺貴精不貴多，幾款小食，招牌主食同麵類。

主食嘅招牌嘢有豉油雞、口水雞、貴妃雞同醉汁雞，我哋就揀咗豉油雞同醉汁雞試試，一個配白飯，另一個配蝦蝦撈麵。事後睇番張收據，收據底底寫住：「食雞唔食皮，不如唔好食」，有道理，哈哈！

陳年醉汁去骨雞配白飯 $70

醉汁雞同白飯分開裝，無論喺雞，還是飯，都好夠份量，雞肉夠晒入味，有淡雅嘅酒香，酒味醇和，而且，雞肉嫩滑，雞皮爽口，皮下脂肪又少，好食，最正喺去晒骨，啖啖肉，食得夠爽。

白飯故然軟熟，更附上蔥油涼拌雙耳同半隻酒釀溏心蛋，前者爽脆有蔥油香，後者就溏心做得啱啱好，蛋黃香味濃郁，蛋白部份滲出微微酒香。

秋意去骨豉油雞配蝦蝦撈麵 $76

豉油雞有店名加持，自不然更加要試，嗰陣陣豉油味好醇厚，撈飯相信更喺一流，而事實上，啲豉油雞好入味，雞肉一樣咁嫩滑，雞皮同樣咁爽口，去晒骨喺最貼心嘅做法。

撈麵同樣奉送蔥油涼拌雙耳同半隻酒釀溏心蛋，仲加咗少少炒椰菜，而麵條算幾彈牙，炒得爽身，沾上少少豉油汁，正呀喂！

雖然只喺試咗豉油雞同醉汁雞，但兩者都食得出用料不賴，制作確喺有誠意。

個人評分
味道：9/10
環境：8/10
服務：8/10
抵食：8/10
平均每人消費：HK$70

餐廳資料：
秋意 Autumn Feeling
地址：灣仔軒尼詩道44號新基大廈地舖
電話：3614 5706