稻田食堂 Inada Shokudo：「稻」人向膳

早幾日「香港航空」出啲零票價機票，諗住短短哋走一轉日本，可惜都喺唔夠人搶。橫掂今晚兩公婆都唔想煮，做一晚無飯夫婦，就過到嚟家住葵芳嘅老友所推介嘅「稻田食堂」，食返個日式便當，因為佢話店家嘅便當款式多，而且配搭豐富，食咗就當去過！

拉門內進，裝修喺好日式食堂嘅感覺，全木系傢俬，一邊牆上掛咗好多推介嘅食物相，另一邊就有好多日本動漫照片。

餐具簡單嘅調味料就放晌枱側，要落單採用二維碼，今次就無影餐牌俾大家參考， 因為選擇實在太多，所以，只喺截圖番有啲咩大類別；而飲品方面，叫咗主食，跟餐嘅話有平$6嘅優惠。

另外近門口亦都掛咗一張螢光餐牌，一邊喺創意刺身壽司，另一邊喺人氣推介，如果太多選擇唔知揀咩好，不妨喺呢個位度著手！

安格斯牛肩胛蕃茄濃湯烏冬 $80

一打開個點餐程式，就見到一款全新爆茄蕃茄稻庭烏冬系列，唔使多講老婆一定晌呢個系列埋手，但佢平時好少食牛，估唔到佢會揀牛肩胛，原來佢之前食過一次牛面頰肉，覺得好正，今次揀牛肩胛其實喺記錯錯咗喺牛面頰肉，哈哈！

不過，佢都話啲牛肩胛肉好嫩滑、好好食，但喺最得佢歡心嘅喺個爆茄濃湯，酸香濃郁，蕃茄味鮮活，打個滿分俾個湯；另外，佢都大讚啲稻庭烏冬入口滑漏，有煙韌嘅口感，而且唔會有啲平價貨嗰陣酸味，加埋高質素嘅溏心蛋、伴菜嘅粟米粒、紫菜、鳴門卷，成碗烏冬真喺搵唔到挑剔位。

熱柑桔蜜 $12
帶有蜜糖香嘅飲品佢就最鍾意喇，所以選咗杯熱柑桔蜜，聞落去已經有陣陣清香既柑桔香味，飲落鹹鹹地又帶陣陣清甜味，柑桔嘅香味都好突出，加上喺熱飲，飲完你會覺得生津、滋潤！

沖繩便當 $96

嚟之前都稍稍上網睇過其他人嘅食評，確喺有唔少人讚呢個沖繩便當，成份便當超級豐富，可以講喺日式4餸飯，有刺身三點、味附螺肉、汁燒金菇牛肉卷及吉列千層芝心豬扒，單睇呢個牌面已經好吸引，送到嚟最意外嘅就喺咖哩飯超多。

刺身三點有三文魚、帶子及甜蝦，擺得賣相精緻，一啲都唔馬虎，而幾款刺身都食得出好夠鮮甜味，以帶子更有一片薄薄嘅櫻桃蘿蔔墊住，睇啲細節位都好有心思。

味附螺肉相信大家都食唔少，尤其喺啲日式放題，都會攞少少試下，啲螺肉煙韌幾有咬口，作為食吉列豬扒時間下場，幾唔錯。

汁燒金菇肥牛卷有兩大件，厚厚嘅捲住好多金菇，最好喺切開咗方便食，一口咬落去肥牛好嫩滑，夾埋爽口嘅金菇、配以燒汁去煎，食味唔錯。

本身都好鍾意食西式嘅哥頓豬，而呢一款吉列千層芝心豬扒跟哥燉豬有異曲同工之妙，再加埋脆炸，真喺無得輸，外層非常之脆口，唔油膩，裡面豬肉好鬆化，加上芝士嘅鹹香，的確好好食！

最後講到啲咖哩飯，因為喺日式做法，所以帶少少甜味，對唔食得辣嘅人絕對喺對上胃口，而飯粒軟熟，淨喺配個咖哩，齋食都好味。

荔枝椰果梳打 $16

諗住有吉列、又咖喱，所以專登搵杯冰凍嘅梳打嚟涼一涼，雖然知道都喺用糖漿開沖，但杯梳打嘅荔枝味確喺好突出，入口冰涼清爽，而底下亦都有唔少椰果，邊飲邊食。

本來，都打算叫個甜品作結，不過，估唔到個咖喱飯份量咁多，其實有得揀少飯嘅，但無估到正常嘅份量喺多得咁交關，兩款主食，唔單止啱口味，仲好好食；此外，又唔收加一，連埋嘢飲平均每人都喺一嚿水左右落樓，加上招呼又幾好，性價比高。

個人評分
味道：9/10
環境：8/10
服務：8/10
抵食：9/10
平均每人消費：HK$102

餐廳資料：
稻田食堂 Inada Shokudo
地址：葵芳仁芳街2-14號美豐大廈地下6號舖
電話：6994 1917