山區裡的走走趯趯: 點心到MIX ▪大排檔 Dim Sum Here Mix Seafood：美食「心」度遊

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2024年5月29日星期三

點心到MIX ▪大排檔 Dim Sum Here Mix Seafood：美食「心」度遊

今晚專登約咗個老友出旺角傾嘢，就打算搵間好坐啲嘅，地方又大啲嘅，可以坐耐少少嘅餐廳，結果就搵到「點心到 MIX 大排檔」。初時仲同老友講話食住點心傾，點知原來晚市無點心供應，主要喺食小菜，但既來之，則安之，反正我哋都無乜所謂。

餐廳唔單止地方大，裝修光猛闊落，樓底亦相對高。因為都幾旺場，所以就未能夠坐晌近窗嘅卡位，但裏面都有好多大大細細嘅圓枱，比起大排檔當然舒服好坐好多啦，整晚客人絡繹不絕，出出入入人流不斷。

雖然無機會試到佢哋嘅點心，但臨走時喺收銀度拎咗張點心紙，掃描出嚟俾大家當為參考。

而晚市上文都講喺食小菜，翻一翻餐牌，確實有好多選擇，雞牛豬、海鮮、蔬菜、煲仔、小食、甜品一應俱全，而港式飲品、啤酒當然唔少得啦！

另外仲有張海鮮專屬嘅餐牌，因為睇見餐廳都設有大大個魚缸養住各式海鮮，「筆直」多啲嘅就不防試啲海鮮菜式嘆下。呢度好似啲大排檔咁搵阿姐手寫落單，而全程有晒招呼，啲姐姐仲幾有禮貌。不過，就唔收加一，呢一點比較意外，又無收啲餐前小食費，只喺收番$5位茶錢而已。

涼瓜肉碎煎蛋 $72

呢個餸就貪佢有肉有菜又有蛋，煎得金黃完整，雖然加咗苦瓜粒，但食落苦味唔會太重，帶點點甘味，少少爽口感，又唔會冚咗啲蛋香，加上還有少少肉碎，口感確喺唔錯，並且唔會煎到好油膩。

蝦醬骨 $82
京都骨、蒜香骨就食過唔少，不過，蝦醬骨真喺第一次聽，加上餐牌列佢為推介菜式，更有一試嘅衝動。一客有5大件，炸得香噴噴，食落唔喺一般嘅豬扒位，而喺五花腩排，所以，確喺有啲肥膏，但無預期咁肥膩，仲滲出少少蝦醬鹹香味，無過鹹啱啱好，肉質咬落好鬆化。但老實講，如果講健康嘅人就唔太建議點呢道菜喇。