Essence：快閃自助午餐

東涌就一向少入嚟，然而，同呢間餐廳「Essence」都算喺有啲緣，先後因為大型聚會、Staycation而嚟過好幾次。今次再寫又喺因為搞大型聚會，入到嚟食自助午餐，由於小弟有份幫手做車長，事前事後要安排車務、聯絡司機，仲要幫吓手扶老攜幼上上落落，所以，真正用餐時間大概得一個鐘。如果普通食晏當然無問題，食自助餐就肯定唔夠，故此，揀食物要有取捨，快閃當食個飯堂快餐。

講環境呢度確喺唔錯，一來地方大，二來樓底超高，加上一面又有好多落地大玻璃窗，令到空間感更強，被安排坐啲梳化位，坐得舒適。

因為時間有限，今次就唔可以慢慢影、慢慢食，趁快手影咗每一個食物區先，等大家知大致有啲咩選擇。麵包籃、冷盤、沙律、朱古力噴泉、湯品、中西式熱盤、凍海鮮、刺身、串燒、燒肉眼、點心、甜品、雞蛋仔、爆谷、生果、Movenpick雪糕櫃、果汁及啡茶，基本上都可以講樣樣都有齊，不過，貴價嘢就唔多。

沙律、冷盤、凍海鮮

照慣例，第一轉就喺食沙律開開胃先，再加少少冷盤嘅凍海鮮、半片麵包，就成為小弟嘅頭盤，你見到啲食材語而言，唔算話好高質，都喺普普通通嘅料，所以，味道還可以，不過就無乜亮點。

熱盤、串燒、烤西冷
第二菜就算喺我嘅主菜，佔大部分嘅都喺肉：串燒、燒肉眼、咖喱羊肉、豬肉腸配薯蓉，再配啲 醉鮑片，搭個生煎包、印度米。估唔到啲肉眼同羊肉幾好食，鮑片亦都有料到，喺食得到有鮑魚味，其他嘅都OK啦。

甜品拼盤

轉眼剩返唔多時間，作為甜品控梗喺最後衝刺去 進擊甜品區，好老實，甜品嘅款式就無太多賣點，不過，都掃番10樣返嚟試吓。有啲慕絲蛋糕、意式奶凍、葡撻、忌廉蛋糕……等等之類，質素中等，過過口癮咁啦。

Movenpick雪糕拼雞蛋仔

講到真正是日亮點就喺最尾食呢個雞蛋仔伴雪糕，仲要一口氣試咗佢6球，Movenpick即喺Mövenpick，質素始終有保證，配上外脆內軟嘅雞蛋仔，襯埋杯熱咖啡，算喺有個美好嘅結束。

總結而言，呢度環境就舒舒服服㗎喇，至於食物，質素叫做OK啦。一來無乜貴價嘢食，二以菜式亦都比較大路，平平穩穩唔會有咩驚喜。

個人評分

味道：7/10
環境：8/10
服務：7/10
抵食：8/10
平均每人消費：HK$200

餐廳資料：
Essence
地址：東涌文東路51號諾富特東薈城酒店大堂
電話：3602 8808