餐廳都幾大吓，一室木系裝潢，配以橙色襯托，加上地方光猛整潔，予人幾醒神嘅感覺。枱櫈編排都算闊落，尤其啲卡位唔會有好擠迫嘅感覺。有一邊牆身仲貼上一張大嘅鐵板海報，寫住港式鐵板世家，承傳30年，真喺唔講唔知咁有歷史。
既然寫到明港式鐵板世家，主打就梗係鐵板餐啦，此外，翻翻餐牌，選項仲有炒粉麵飯、焗飯、沙律、東南亞嘢，而鐵板餐就包埋餐湯、牛油餐包、沙律（或升級為法式田螺）、甜品同餐飲。
羅宋湯、忌廉湯、牛油餐包餐湯就喺港式豉油餐廳傳統嘅紅湯、白湯，前者嘅羅宋湯非常之有料到，除咗見到大量蔬菜之外，仲見佢加咗香葉、辣椒去煮，所以，味道豐富而有層次，而白湯就喺蘑菇忌廉湯，打得香滑，都唔錯。
呢一款豉油西餐廳嘅牛油餐包真喺好有懷舊感，而且，包身做得非常之軟熟，水搽上牛油已好好食。
日式芝麻醬田園沙律雖然只喺沙律菜、車厘茄、粟米粒混埋一齊，再撈上日式芝麻醬，但只要啲沙律菜夠新鮮，自然清新好味道。雖然喺套餐內嘅頭盤，但我哋就當伴菜食，食扒時作為間場，清爽下味蕾。
法式蒜香薯蓉焗田螺 +$8
懷舊鐵板T骨扒配薯菜 $138正當老友考慮緊要雜扒定喺T骨嘅時候，我就建議食T骨扒啦，得一想二呀嘛。見件T骨扒嚟到真喺嚇一嚇，大件到冚晒成塊鐵板，左邊喺肉眼，右邊喺西冷，一次過試晒兩款唔同嘅肉。隨鐵板送上無耐，侍應就會過嚟問問配燒汁定黑椒汁，當醬汁淋到落去，真喺詐詐聲好有動感。老友大讚好食，西冷有油脂香，肉眼肉味濃，賣咁嘅價錢真無冇得輸。
懷舊鐵板肉眼牛扒配薯菜 $128、加配香煎極上牛舌 $38小弟就稍為鍾情肉眼，同樣喺份量十足，有兩大件攤位鐵板之上。雖然唔知啲扒嘅產地喺邊度，但咬落確喺唔錯，小弟要咗5乘熟，落都已經感受到肉質嗰份軟腍，再望望中間呈粉嫩色，無血水，燒得啱啱好；沾上燒汁食味的確一流，仲伴有大量粟米粒、翠玉瓜及懷舊嘅曲紋薯條，真喺細細個去西餐廳鋸扒嘅回憶返晒嚟。
另外加配咗香煎極上牛舌，因為見只需$38。有兩件可以大家「些牙」吓。雖然啲牛舌唔算話好厚切，但本身裁得幾大片，煎得香口，口感軟腍，有牛舌獨特嘅香味。
熱奶茶、凍檸檬茶平常嚟到茶記就梗喺揀熱奶茶，不過，今次就因為食鐵板改飲凍檸茶爽一爽，個茶底幾唔錯，茶味夠，檸檬片又夠多，配鐵板飲得夠爽；而老友話佢杯奶熱奶茶都好高質素，茶味幽香，口感都幾順滑。
雜果啫喱依家啲人食甜品越嚟越要求高，又芝士餅，又法式燉蛋，又慕絲蛋糕，不過，雜過啫哩一樣有捧場客。我自己都不時有喺屋企整，食嘅喺一份懷念嘅味道，最緊要喺有加花奶，咁先喺嗰份感覺。
「馬德里」唔喺玩懷舊嘅餐廳，但鐵板餐做得懷舊，加上份量足，定價街坊，無加一，服務幾唔錯，值得再捧場。
個人評分
味道：8/10
環境：7/10
服務：8/10
抵食：9/10
平均每人消費：HK$158
味道：8/10
環境：7/10
服務：8/10
抵食：9/10
平均每人消費：HK$158
餐廳資料：
馬德里餐廳 Madrid Cafe
地址：深水埗福榮街120-122號地舖
電話：2728 3378
馬德里餐廳 Madrid Cafe
地址：深水埗福榮街120-122號地舖
電話：2728 3378
沒有留言:
發佈留言