元朗冰室 Yuen Long Bistro：失敗「元」因

如果用膳時間有限，快餐店以外嘅選擇，最快靚正嘅就梗係搵茶記。今晚出到嚟尖沙咀出席大型聚會，收工趕到過嚟，食飯時間只有半個鐘，因為順路關係就走咗入嚟呢一間茶記「元朗冰室」，睇返啲菜式先想返起原來好多年前幫襯過太子分店，不過，當期時嘅印象喺麻麻地。

餐廳嘅環境都幾大，跟一般茶記差唔多，都喺以卡位為主，但好就好在啲卡位夠闊落，此外，今晚嚟到客人唔多，所以，唔太嘈雜，感覺舒服。

食物方面，茶記選擇夠多，而呢度出名嘅喺佢嘅厚豬扒，所以，我都將目標定喺呢個系列之上。

厚豬扒配辣肉醬飯 $61
小弟食飯喺撈汁控，所以，倒咁多肉醬俾我就啱晒，塊豬扒都算喺厚切，而且大大件炸得金黃，幾有睇頭，伴上少少粟米粒、炒椰菜，叫咗少飯，都仲喺好港式碟頭嘅飯量。先講件豬扒，醃得夠入味，咬落好鬆化，而且好香口，不過個人覺得就少少油，啲椰菜有炒過，當然好過嗰啲淨喺白烚貨色；而最大問題喺啲肉醬，因為都幾鹹吓，試咗兩啖之後，撈白飯都都覺得仲喺鹹，後尾只挑啲肉碎撈下，啲汁就無謂喇！

熱奶茶
茶記揀熱奶茶喺慣性喜好，反而杯奶茶真喺幾唔錯喎，既有茶香，口感又算滑，茶奶比例平衡，不過，可惜都幫唔到碟飯拉番啲分。

今餐都喺求求其其，最緊要喺快，不過，都想食得啱口味，可惜，今次個碟頭飯敗晒喺啲肉醬個汁茨度，真喺好彩無一起手全部撈勻晒啲飯，否則就瀨嘢喇。

個人評分
味道：5/10
環境：7/10
服務：7/10
抵食：8/10
平均每人消費：HK$61


餐廳資料：
元朗冰室 Yuen Long Bistro
地址：尖沙咀金馬倫道48號中國保險大廈地下A2號舖
電話：2603 2686