金裝燉奶佬餐廳 Daniel's Restaurant：早餐例選

大表哥退咗休，生活比較清閒，所以，星期六就拉埋佢一齊去行吓山，由美孚起步，經馬騮山一直行到去大圍。起步前，就索性約埋一齊嚟「燉奶佬」食個早餐，貪佢就喺地鐵站口側邊，方便到佢唔使周圍搵。

餐廳環境格局唔多講，都喺典型茶記，絕大多數都喺卡位，不過啲位就有少少窄，我哋幾個都喺瘦底，所以，坐落就唔覺逼，如果大隻少少嘅可能會感覺唔太舒服。

但有別大多數茶記，啲調味料、餐具就唔喺放枱側櫃桶，而就咁晌晒枱面一旁，但有蓋冚，感覺回都衞生啲。

底面兩頁餐牌，羅列晒所有早餐款式，跟同區嘅茶餐廳比，定價會平$1、$2，但份量會交足，所以，你見都幾多人嚟食早餐。採用二維碼落單，落單可以自己搞掂。

B3 沙爹牛肉湯公仔麵餐 $41

表哥就揀咗B3，呢個系列主要喺跟北海道3.6牛乳炒滑蛋，但你可以改為煎雙蛋，比起同樣食沙爹牛麵嘅B26餐，呢個貴$1，但多隻蛋喔。沙嗲牛麵一陣先講，但要讚嘅喺兩隻太陽蛋就煎得幾靚仔，碗麵又加幾炷菜俾你，真有心。

B27 自選湯粉麵餐 $39

湯粉麵餐會跟個甜餐包，仲要好懷舊款式嘅甜餐包。婆就想自主啲，乜餸料都自己揀，所以，就食呢款餐，揀仿鮑絲搭煎全熟蛋，配通粉，大大碗，份量俾足，當然唔會有咩驚喜，但佢話整體味道唔錯。

B26 沙爹牛肉湯通粉餐 $40
小弟今次茶記早餐又回歸到沙嗲牛肉，再搭午餐肉，同樣配通粉。雖然睇落啲沙嗲汁唔喺好深色，但嗒落都算香濃，而牛肉幾軟腍，通粉無煮過腍，完全收貨。

熱奶茶

表哥同我都揀咗飲熱奶茶，亦喺小弟去茶記嘅必然心水。佢哋啲奶茶唔差架，睇色澤夠深沉，飲落醇香，茶奶比例合我心水。

今次再嚟「燉奶佬」食早餐，整體感覺唔錯，至少無乜邊樣嘢出問題，無伏位。食飽飽，就起行。

個人評分
味道：8/10
環境：7/10
服務：7/10
抵食：8/10
平均每人消費：HK$40

餐廳資料：
金裝燉奶佬餐廳 Daniel's Restaurant
地址：美孚美孚新邨第五期蘭芳街6A及6B號地下N21-22號舖
電話：2959 1126