極上冰室 Premium Ice Room：茶記尋鮮

今晚約咗親友出嚟食餐便飯，都喺簡簡單單好隨意嗰隻，最緊要喺就到大家方便，所以，揀晌尖沙咀，而搵茶記食吓小炒，較經濟嘛。晌網上搵搵下就見到呢間新開無耐嘅茶記「極上冰室」，睇番啲環境相，好似幾感覺幾光猛闊落，所以，就揀嚟呢度。

因為餐廳位處街角，門面招牌黑底白字紅字，窗框邊又加咗啲霓虹光，非常搶眼。入到舖內，淺灰襯鮮橙色，望上去非常醒目；而座位、通道都做得算闊落，相信就算坐滿人都唔會覺得好擠迫，加上新開無耐，裝修比較新簇。

餐廳以二維碼落單，但有實體餐牌，小弟比較鍾意咁樣。早餐、午餐、常餐、下午茶餐，呢啲喺茶記基本必有。此外，仲有湯飯、炒粉麵、特色小炒、煲仔菜、蒸餸、二人套餐、四人套餐、馬來咖喱、小食、西式焗飯、意粉……等等，選擇十分之多。

餐具、簡單調味又喺一般茶記擺晒喺枱側拉櫃桶之內。題外話，呢度啲招呼算唔錯，侍應幾好禮貌，不時又會幫你收走食完嘅嘢，等你坐得舒服多少少。

是日例湯
呢度嘅餐湯唔喺分紅湯白湯，而喺分中湯西湯，前者喺啱晒依家飲嘅消暑湯水冬瓜湯，飲落都夠火喉，唔會「淡茂茂」，然而後者喺羅宋湯，亦都幾夠味，酸香好飲，裡面又多料。

黃金蝦球 $98
香口嘢、海鮮嘢相信冇乜人唔鍾意，所以，先嚟呢個黃金蝦球，就喺油泡蝦球再鋪一層鹹蛋黃醬，入口自然惹味十足，有陣陣鹹蛋黃嘅鹹香味 ，咬落去外層夠脆，啲蝦肉既鮮甜，又彈牙，加上夠大隻，食得過癮。

港式脆蠔餅 $108
潮式蠔餅就知係乜，呢個港式蠔餅又會喺點呢？份量好夠，新鮮炸起，自然份外甘脆，咬落脆到咔咔聲，食落亦唔算油膩，裡面混有唔少蠔仔肉，飽滿肥美，沾上少少魚露更具風味。跟潮式嘅分別就喺呢個用粉漿做，出嚟外觀比較大件同立體，餡心口感比較粉糯。

豉汁煎鯧魚 $88

食新鮮魚蒸就最好不過啦，揀豉汁就特別惹味，條鯧魚都幾大條，望落去色澤閃閃爧，食落去真喺蒸得啱啱好，肉質好滑身，亦好有魚鮮味。睇外觀你都見除咗加咗豆豉之外，仲加埋豆瓣醬去蒸，所以，除咗有豆豉香，仲有微微鹹鮮香味，啲蒸魚汁用嚟撈飯真喺一流。

紅豆冰 +$9
朝早餐飲咗咖啡，夜晚就節制少少，唔飲奶茶改試紅豆冰，因為見佢加$9都唔喺貴。嚟到杯紅豆冰非常之大杯，睇到裡面有好多紅豆，最緊要喺啲紅豆煮得夠綿，又夠香甜，撈勻啲奶水，好飲又好食。

整體嚟講，啲小炒都幾有水準，環境夠大坐得舒服，同啲朋友小聚，每人百零蚊，食到幾款算喺海鮮小菜，抵過上酒樓啦，哈哈！

個人評分
味道：8/10
環境：7/10
服務：8/10
抵食：8/10
平均每人消費：HK$108

餐廳資料：
極上冰室 Premium Ice Room
地址：尖沙咀漆咸道南41-45號其士大廈地下D號舖
電話：9791 9195