香港地 Hong Kong Day：我的星期六美孚早餐 ~ 服務仍然麻麻「地」

之前再試番「品樂冰室」，離開時經過「香港地」，見好多人晌門口等位，加上見佢有款蕃茄湯系列嘅早餐，啱晒老婆，就搵個星期六朝嚟食個早餐，睇吓喺咪好咗！其實我就對「香港地」印象一般般，唔喺話差，但唔叫得好，今次就俾多個機會佢。

自從好幾年前呢間「香港地」擴大咗，小弟都未嚟過，今次再嚟，空間感大咗，但啲枱櫈都排得好密，不過，佢哋為咗做盡生意，會安排人手帶位，盡量填滿每一個位，故此，要有搭枱嘅心理準備。

早餐嘅餐牌棟咗喺門口，款式都唔少，例如全日早餐、港式早餐、蕃茄湯系列、脆炸魚柳系列、珍寶菠蘿包餐、嫩滑豬扒系列、健而麥皮系列……等等，而入到裏面，基本上唔見有餐牌，落單都喺掃二維碼自己搞掂，價錢方面都喺同附近啲茶記差唔多。

餐具放晌枱上，其實佢哋啲枱本身已唔喺大張，所以，嚟齊晒啲食物之後成個枱面都有啲壓逼感。負責送餐個男侍應亦都有啲唔禮貌嘅行為，就係推開我正正食緊嘅通粉，以方便佢擺其他食物上枱。

仿鮑魚絲火腿通粉 $41

本來老婆一心喺想試個蕃茄湯系列，不過，喺點餐時落單系統上搵嚟搵去都搵唔到，跟住再問返啲侍應，原來星期六日公眾假唔供應，再睇返個餐牌，確喺有啲雞屎咁細粒嘅字寫住，真喺走漏眼添。比較啱食嘅就只有呢款通粉，仿鮑絲口感柔韌，食起嚟算清爽啲，配炒全熟蛋及多士，雖然全熟蛋炒得樣衰啲，但老婆唔介意賣相，最緊要夠熟到透啫。

蜜汁叉燒通粉 $43
次次都沙嗲牛肉公仔麵，今次就改試下叉燒通粉，再配上炒滑蛋牛油厚多士。點解咁多人嚟「香港地」，就因為佢哋講明用相對好嘅食材。叉燒雖然無啲燶邊位，但味道唔錯，啲肉質好鬆化，而且比較少肥膏，老婆都可以試多少少；炒滑蛋都確喺有一手，炒得夠滑溜，好夠蛋味，又夠份量。通粉本身味道都唔錯，個湯底幾濃郁，唔喺味精湯，啲通粉煮得仲帶少少咬口感。

熱奶茶、熱咖啡

少有哋老婆話想嘆杯熱奶茶，所以，小弟就改飲熱咖啡，我杯即磨咖啡飲落幾香醇，但完全唔明點解嚟到只喺微暖，明顯喺沖定好晒擺咗喺度，有單就拎俾客。臨走時有同店員反映，佢話下次可以叫做個杯，呢個算喺補救方案，但問題根源喺準備食物嘅流程，會唔會水吧嘅同事貪方便做定好多杯放晌度，快餐店都唔會咁做啦。而老婆杯熱奶茶飲落都算OK，唔算話好柔滑，但都好夠茶香。

今次再幫襯「香港地」，食物方面算中上，喺杯咖啡出咗少少問題，而服務方面，始終如一都喺咁一般，不過，再觀察所見，應該喺嗰個男侍應嘅個別問題居多，因為有另一位女侍應招呼唔錯，態度溫文有禮好多。

個人評分
味道：8/10
環境：7/10
服務：4/10
抵食：8/10
平均每人消費：HK$42

餐廳資料：
香港地 Hong Kong Day
地址：美孚蘭秀道1-15, 2-24號美孚新邨地下N10-12號舖
電話：2743 2793