The Wall Street Bar & Lounge：華爾街內幕好「燒」息

好耐無同老死夏總食飯喇，今晚專誠搵咗佢出嚟食番餐，知道佢鍾意食羊，就揀咗嚟尖沙咀嘅「The Wall Street Bar & Lounge」，除咗風評不俗，位處尖沙咀大家都方便，重點喺知道餐廳推出咗個性價比高嘅套餐，有羊架食，肯定啱晒佢啦，確實喺個好消息。

餐廳嘅環境幾好，裝修都睇得出花咗唔少心思，一邊向街喺落地大玻璃，有開揚街景，中間有個大吧枱，放滿唔同嘅酒，加埋燈效，非常吸晴。

而數到另一打卡位，就喺帶英倫風嘅青綠色皮梳化位，加上背後嘅大書櫃，絕對可以呃到人去咗別家嘅大宅。店員嘅服務都好細心，會主動俾個大籃你擺袋，又主動添水收拾，服務頗為熨貼，而且，都好有禮貌。

食物嘅餐牌設計比較簡單，只印在A4紙上，包括送酒小食、頭盤、薄餅、主菜、甜品。

此外，仲有兩款套餐選項，一款喺燒牛肉全日早餐$188，另一款喺假日燒牛肉套餐$388，包是日餐湯、芝士凱撒沙律，主食可以揀慢煮澳洲M4燒肉眼扒或者慢煮紐西蘭燒羊架。兩款套餐都包基本飲品，亦可以+$38轉非酒精雞尾酒或+$68轉任何生啤或雞尾酒。

至於飲品餐牌就設計得比較精美，設計成皮記事簿，內有多款雞尾酒、烈酒、紅白餐酒、香檳、氣泡酒、非酒精雞尾酒、汽水及果汁……等等。

Grassy Flash +$38（套餐）、Coke $29
餐飲可以加錢配非酒精雞尾酒，當然要試一試啦，揀咗呢一杯以香茅、檸檬汁、茉莉茶同薑啤溝成，睇個樣都已經好清爽，入口陣陣酸香味，又滲出淡淡香茅香，好有一種清新脫俗嘅感覺，最啱配上濃味嘅食物。

龍蝦湯（套餐）
由於我哋只叫咗一個套餐，但店員好醒目俾多個碗仔我哋一齊共享個餐湯。睇到橙紅色嘅色澤，就感覺好對辦，先試一口，雖然未喺一入口就嘩嘩聲，但啲蝦味頗為突出，口感幼滑細膩，而且，更加咗少少蝦肉，絕無欺場。

芝士凱撒沙律（套餐）
比起一般嘅田園沙律，凱撒沙律當然食材又豐富啲，功夫又要多啲。啲羅馬生菜好清爽，咬落嗦嗦聲，配合埋麵包粒、煙肉碎、大量巴馬臣芝士，味道豐富，正好令大家更開胃嚟迎接主菜。

慢煮紐西蘭燒羊架（套餐）

主菜一早就定好咗揀羊架，選上五成熟，再配埋薯餅千層、沙律菜。上枱最估唔到喺竟然有四支羊架，仲要每件喺大大件，確喺份量十足，而且，外層燒得焦香，裡面色澤粉嫩，半點血水都無，煎得啱啱好，師傅拿捏嘅時間準繩。入口唔太羶，相信唔食開羊嘅朋友都食得到，而且，肉質好軟腍，配上香濃嘅洋蔥燒汁，非常之正。沙律菜好新鮮，件薯餅千層亦做得唔錯，其實佢喺一片又一片嘅厚薯片疊成，中間夾咗少少餡料。

意式辣肉腸薄餅 $138
有別慣常見到嘅圓形，而喺搓成長方形，再分開兩大份，每份切開三小件，加咗少少火箭菜作點綴， 整體嚟講其實都幾足份量，而且，睇樣可能唔見啲辣肉腸，其實喺有唔少，只喺被大量莫沙里拉芝士冚過曬，總之用料好足。薄餅新鮮焗製就特別好食，批底口感有韌勁，因為落足料，所以咬落鹹香惹味，味道豐厚，食埋呢個薄餅真喺飽晒。

因為呢度都幾好氣氛，所以，食完之後我哋都坐多咗一陣，講吓旅行嘢，傾吓波經咁，仲有喺食到咁正嘅燒羊架，呢啲就喺麻甩佬嘅浪漫。

個人評分
味道：9/10
環境：8/10
服務：9/10
抵食：8/10
平均每人消費：HK$325

餐廳資料：
The Wall Street Bar & Lounge
地址：尖沙咀金巴利道40號MW Plaza1樓
電話：2389 6018