山區裡的走走趯趯: 湄南.河泰式船麵 Maenam：「湄」妙聯乘

2024年2月19日星期一

湄南.河泰式船麵 Maenam：「湄」妙聯乘

老婆有飯局，咁就乘機約啲老死陪我食飯啦，兩個麻甩佬過到嚟荃灣食泰菜，皆因知道「湄南」跟「龍華」聯乘推出咗個乳鴿套餐，非常微妙嘅組合，仲以優惠價推出，咁着數，當然專登過嚟試一試啦。

餐廳裝修簡約，但一室白磚牆，襯以青綠、鮮黃嘅座椅，加上夠光猛，望上去好醒神。而餐廳尾尾牆上嘅一幅彩繪，描繪咗好多泰國民間風情，非常吸晴。

餐牌選擇多元化，有泰式沙律、小食、大碗船麵、細碗船麵、各式湯粉麵、飯品、甜品、飲品……等等，一應俱全。當中嘅傳統細碗船面非常有特色，$56有3小碗，可以自由配搭麵底、配料、湯底，而所有散點主食都可以以優惠價追加小食同飲品，非常有彈性。

此外仲有泰式咖哩、喇沙參參、冬陰功系列、特別推介……等等。最正喺全日都唔收加一嘛！

如果覺得散點眼花繚亂，可以晌啲套餐度著手，一個人嚟或各自嗌嘅可以選擇「精選晚市套餐」，如果兩個人嘅就不妨考慮佢哋嘅「泰北風味二人餐」，計落價錢都好划算。

而上文提及嘅同「龍華酒店」合作嘅乳鴿套餐，就喺呢個：一大隻龍華乳鴿王再配一碗雜錦船湯河或者招牌海南雞飯，原價就標$138，但依家只喺賣$88，仲可以追加飲品、小食、沙律等等。

呢度如大多數餐廳都用咗二維碼落單，如果唔太熟悉操作，搵店員落單都喺無任歡迎。

枱上已經整齊擺放好筷子、紙巾，同幾款常用嘅調味料，自由取用。如再需其他餐具，店員都好樂意提供，啲招呼幾殷勤，又好禮貌。

秘製泰式燒豬頸肉 $88

啲豬頸肉燒得好靚仔，有少少燶邊，食落去好有炭火香味，切得厚薄均一，而咬落質感爽爽哋口，又帶有少少油脂香，唔點任何醬就咁食都好好味，若沾上自家製嘅醬汁，酸酸甜甜，又帶微辣，喺一種種風味，但同樣好食。

傳統細船河 $56

泰式湯河粉算食過唔少，但其實傳統細細碗嘅船河就真喺第一次，上文都講過麵底、配料、湯底都可以自由組合，自行睇睇餐牌我就唔多介紹，但溫馨一提，部分選項需要加多少少錢，我哋嘅組合喺：
泰式札肉米粉配清湯
美國牛肉河粉配清湯（+$3）
泰式魚蛋金邊粉配冬蔭功湯（+$3）
整體嚟講味道幾唔錯，最好食喺啲扎肉，幾款麵底都好滑溜，湯底方面始終都喺冬陰功湯較為亮點多啲。食呢啲細船麵最好就喺一個價錢，試到好多樣嘢。

湄南x龍華 • 鴿雞名物全餐 $88
雖然只喺賣$88，但就絕無將貨就價，而且，店員話啲乳鴿都喺有單時先炸，所以，夠晒新鮮，送到嚟真喺堅熱焫焫，直頭熨手。店家提供膠手套，所以，可以食得好豪邁，「龍華」出品果然高質量素，除咗啲乳鴿夠大隻之外，調味啱啱好又夠入味，外皮非常之香脆，肉質細嫩，兼且夠晒肉汁，真喺無咩挑剔。