老祖食堂：「祖」鳥晚餐

今日有活動入到嚟機場，之後，趁返回東涌，就順道上咗東薈城嘅食代館食個早鳥晚餐先打道回府。晌裡面打咗個轉，就揀咗「老祖食堂」，因為，差唔多兩年前，幫襯過晌「葵廣」嘅「西關老祖」，知道佢哋嘅「叉燒飯」有一手，所以，再重溫一下當中滋味。

雖然位處美食廣場，地方勝在夠大，光猛闊落，又算喺夠整潔，加上未喺晚飯尖峰時段，無話擠滿人。

店家主打老廣州嘅西關嘢，但整體嚟講，選擇非常之多，更有唔少招牌嘢，仲可以加錢升級Set A、Set B。大概等10分鐘左右，就整好晒。

S4. 西關瀨粉配XO醬爆炒蘿蔔糕 $76+ 蘿蔔湯 $10

碗西關瀨粉非常之大碗，睇相你都見到有菜脯、蔥花、豬油渣，將三者跟瀨粉混合，一次過放入口，不單止味道多變，口感亦富有層次，非常之特別。

至於個炒蘿蔔糕，亦都非常之出色，蘿蔔糕切成方粒，的的骰骰，大細剛好一口一件，自家製蘿蔔糕本身亦做得唔錯，夠挺，唔會太削，都足料， 所以，食得到有蘿蔔嘅清甜味，加埋XO醬爆炒，自然惹味十足。

加$10要埋呢個蘿蔔清湯，真喺無揀錯，除咗好大碗之外，嗰陣陣嘅蘿蔔味非常之清甜，比預期好飲。

7A. 黑叉燒停午餐肉飯 $76+ 黑松露炒蛋 $28

睇見一片片嘅叉燒，以及勁厚切嘅午餐肉，就知呢碗飯有幾咁邪惡。呢度嘅叉燒用上西班牙杜洛克黑毛豬，亦唔會用啲色素去醃，並且有別平時港式嘅叉燒用啲梅頭，睇樣你都見喺用上五花腩位，不過食起嚟又唔會覺得好肥膩，但就好香口，肉質好鬆化；啲午餐肉煎得好香脆，加埋啲飯好軟熟，落咗秘製豉油，零舍芳香，食完碗飯唯一要講嘅就係膽固醇萬歲！

至於啲黑松露炒蛋其實都炒得幾滑身，咬開裏面仲有少少蛋汁，而黑松露都落得算唔少，幾有黑松露嘅幽香。而碗迷你蘿蔔湯應該喺額外送嘅，因為都唔見餐牌有寫附送「例湯」。

雖然小弟本身就唔喺太追逐米芝蓮嘅餐廳，但今次再食「老祖」，覺得仍然保持到高水準表現，真喺抵佢攞到2023年嘅米芝蓮推介。

個人評分

味道：8/10
環境：7/10
服務：8/10
抵食：8/10
平均每人消費：HK$95

餐廳資料：
老祖食堂
地址：東涌達東路20號東薈城名店倉7樓704號舖食代館8及8A號舖
電話：5779 2338