山區裡的走走趯趯: 安娣瑪萊 Auntie MALAY：搵食好「娣」議

2024年2月15日星期四

安娣瑪萊 Auntie MALAY：搵食好「娣」議

近來出親尖沙咀都人頭湧湧，尤其海旁、天星一帶，連帶搭天星過海都要排長龍。唔想同人逼，可以走入「海運大廈」，裡面有唔少高質素嘅食店，其中主打馬拉菜嘅「安娣瑪萊」就是其一，單睇門面已好洋溢一股南洋風情。

近鋪面嘅用餐區裝修得比較少女風，除了因為以薄荷綠襯紫色之外，更刻意設計成鳥籠花園咁，有點夢幻嘅感覺，大大提升打卡度。

而另一邊主用餐區，由泥黃色嘅地磚、牆上嘅大型彩繪，以至精緻嘅吊燈及翠綠嘅植物，營造出一片盎然悠閒嘅氣氛，很有舒適感。而且，餐廳尾嘅幾排位，透過落地大玻璃窗更可以欣賞到維港景致，感覺怡人。

雖然都喺賣馬拉菜，但睇見啲菜式名稱，就見有唔少心思在其中。以分類而言，有齊招牌海南雞、特色飲品、前菜、海鮮、麵飯、肉類、蔬菜、甜點、花草茶、汽水、餐酒……等等。但溫馨一提，店家收取餐前小食、茶芥等費用，餐牌亦有標明。

荔枝紅茶 @$8

茶芥收$8位，送上嘅喺荔枝紅茶，茶味非常之幽香，入口散發出陣陣荔枝清香味，感覺好唔錯，尤其配以一啲濃味嘅食物，嗰種清膩嘅感覺更明顯。此外，餐具亦都好靚、好精緻，仲印上店名。

迷你魚醬蝦米春卷 $12
而餐前小食我就覺得好有誠意，因為賣相的骰又好講手工，店員介紹呢款小食叫魚醬蝦米春卷，喺大馬常見嘅過年小食，入口香脆帶微辣，原來裡面喺加咗少少辣椒醬炒嘅魚仔，香口惹味，叫人食到唔停口。

斑蘭紅豆冰 $68、菠蘿熱情果沙冰 $68
因為提供咗荔枝紅茶，所以，唔嗌嘢飲都OK，不過，啲特飲又幾有特色。紅豆冰就飲得多，加入斑蘭元素就第一次，當然要試試，賣相好靚，好有層次感，以椰汁、斑蘭汁、紅豆組合而成，單喺椰汁溝上斑蘭汁已經飲落清香怡人，加埋清甜夠綿嘅紅豆，自然輸唔得去邊；

另一杯菠蘿、熱情果喺一對勁清新嘅組合，酸酸甜甜的確醒胃，夾一陣個黃金軟殼蝦真喺絕配，再者，沙冰嘅質感打到好綿滑，令人飲落夠晒暢快！

瑪萊沙嗲 $128 / 6串

沙嗲可以揀雞肉或豬肉，亦可以兩溝，而馬來沙嗲一向有特色。睇到啲串燒嘅燶邊位，已感受到嗰份炭火香，無論雞肉，抑或豬肉，肉質軟腍，又富肉汁；當然，另一亮點喺個沙嗲醬，自家炒製非常之惹味，充滿花生香，細心位喺仲伴有少少醃菠蘿、青瓜、洋蔥，酸香味十足，作為間場就最好不過。

黃金軟殼蝦 $288

睇見啲海鮮菜式都幾特別，所以，揀咗一款黃金軟殼蝦，一來喺店家推介，二來軟殼蟹就食得多，軟殼蝦都喺第一次試。啲蝦本身都幾大隻，每隻都沾滿鹹蛋黃醬，所以，入口非常之惹味，再加上咬落啲蝦殼真喺軟身可以直接入口，而蝦肉又好鮮甜，確喺一道美味海鮮菜式！此外，啲南瓜亦唔好錯過，又粉又甜，加上鹹蛋黃醬，別有一番風味。