龍寶酒家 Dragon Palace Restaurant：質素無「寶」證

今年無同細佬妹食團年飯，因為細佬嘅生日好近過年，所以，索性改為食開年飯加生日飯，等我慳番一筆。就返佢哋都喺搵深水埗區，不過今次行遠少少，落到近長沙灣嘅「龍寶」，再者，佢哋一向對食無乜要求，反而呢類街坊酒樓仲啱佢哋。

內裡嘅格局喺好傳統嘅街坊酒樓樣，但估唔到二樓堂座坐到好爆，我哋就被安排上三樓，晚市初段都好鬆動，但坐吓坐吓都差唔多八九成滿。

菜式幾版紙就睇晒，有好多晚市優惠，但啲特價嘢當然就有限制啦，補充一句，餐前小食收$12、茗茶收$14，另外，服務費唔止加一，喺加13%

特價紅燒乳鴿 $20.8

雖然個優惠喺可以每人叫一隻，不過我哋都喺過吓口癮，叫兩隻分嚟食就夠。乳鴿原隻咁上，不過酒樓會提供鉸剪，輕易剪開，味道都幾唔錯，香口好食，只喺嫌比較細隻少少，無咁好肉地，但話晒只喺廿蚊你仲想點。

深海大龍躉兩味 $288
「兩味」分別喺「翡翠炒班球」以及「蒜香雲耳蒸頭腩」，計落好似廿划算，但食過又另一回事，因為份量比預期中少。先講講碟班球，單睇外觀其實幾好樣，啲西蘭花好翠綠，不過，啲西蘭花切到成半個拳頭咁大，再加埋大量燈籠椒，已經無咗一半空間，所以，班球其實得嗰5、6件左右，真喺一人分得一件多啲，至於肉質確喺唔錯嘅，好有魚鮮味，質感亦好嫩滑。

另一碟蒸頭腩，咪睇好似好大碟，同一情況，啲黑木耳佔咗大份，啲頭腩食幾嚿又喺無晒，而且無乜肉，兩碟龍躉都喺菜多肉少，所以，最後覺得唔划算，總之，就嗌條蒸沙巴老虎斑仲抵，話晒都喺一整條，只賣$88。

菠蘿咕嚕肉 $108
呢一道菜喺同細佬妹食飯嘅必叫菜式，亦喺穩膽之選，佢兩個實啱食，而呢度嘅個份量算喺無點欺場，啲咕嚕肉都好鬆化，個醬汁都酸酸甜甜，好醒胃，不過，就嫌佢太杰身，兼且好快凍，都未食到一半，個汁已經漿住晒。

芥蘭炒臘味 $98

呢一碟同龍躉兩味啱啱相反，就喺臘味多過啲芥蘭，啲芥蘭幾靚，亦炒得仲喺幾爽脆，仲帶點臘味嘅油香味，至於啲臘味，臘肉佔多，臘腸、潤腸相對少。

椰青（免費）
大龍躉兩食會另外加送兩個椰青，入口啲椰青水涼涼哋，唔太凍，啱入口，而味道非常之清甜，陣陣椰香，裡面就可以刮到好多椰青肉，算喺補番龍躉兩味唔抵食嘅感覺。

鮮橙

最後，唔喺送糖水，而喺送生果，並非果盤，而喺一人一個鮮橙咁送，仲要喺大大個嘅貨色，超市買都值到廿蚊，唔即場食又可以拎走喎。

今餐飯嘅水準只可以講一般般，唔太好亦唔太差，不過叫做搵個機會同細佬妹聚一聚食餐飯，關心吓佢哋嘅近況。

個人評分
味道：7/10
環境：7/10
服務：8/10
抵食：8/10
平均每人消費：HK$175

餐廳資料：
龍寶酒家 Dragon Palace Restaurant
地址：長沙灣元州街280-288號地舖
電話：2626 0808